الاياقتار ايىلىن جيار ەمەس

جامبىل وبلىسى بويىنشا ەكونوميكالىق تەرگەپ-تەكسەرۋ دەپارتامەنتى ماماندارى كەلتىرگەن دەرەككە جۇگىنسەك, 2023 جىلى قارجى پيراميداسىنا قاتىستى ءۇش قىلمىستىق ءىس تىركەلىپتى. ال وبلىس بويىنشا 200-دەن اسا ازامات قارجى پيراميداسىن ۇيىمداستىرۋشىلار قۇرعان قاقپانعا ءتۇسىپ, ايتار­لىقتاي زارداپ شەككەن. ءبىر جىلدىڭ ىشىندە ەكى جۇزدەن اسا ازاماتتىڭ الدانۋى كىم-كىمدى دە ويلاندىرسا كەرەك.

«الەۋمەتتىك جەلىگە اربال­­عان الەۋمەت ينتەر­نەت-­رەسۋرس­تار­داعى, YouTube ارنالارداعى جانە مەسسەند­جەر­لەردەگى جار­نا­مالارعا اربالىپ, جىل سا­يىن جۇزدەگەن ادام قارجى پيرا­مي­دا­سىنىڭ قۇربانىنا اينالىپ جاتادى. بۇل ماسەلەگە كەلگەندە حالىق قۇقىقتىق جاعىنان ساۋاتتى بولسا دەگەن تىلەك بار», دەيدى جامبىل وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ وكىلدەرى.

راسىندا دا, قارجى پيراميداسىن ۇيىمداستىرۋشىلاردىڭ زاڭسىز ارەكەتتەرى حالىقتىڭ قالتاسىن تەسپەي سورىپ جات­قانى انىق. وبلىس بويىنشا ەكونوميكالىق تەرگەپ-تەكسەرۋ دەپارتامەنتىنىڭ اعا جەدەل ۋاكىلى شەرحان پىرىمقۇل مەن اسا ماڭىزدى ىستەر جونىندەگى تەرگەۋشى جاعىپار يساتاەۆ كەلتىرگەن دەرەكتەر قىلمىستىڭ بۇل ءتۇرىنىڭ جىل وتكەن سايىن ارتىپ بارا جاتقانىن اڭعارتادى.

مامانداردىڭ ايتۋىنشا, دەپارتامەنت قىزمەتكەر­لەرى جۇرگىزگەن جۇمىستىڭ ناتي­جە­سىندە زارداپ شەككەن ازامات­تار­دىڭ 45 ملن تەڭگەدەن اسا قارجىسى كەرى قايتارىلىپ, كەلتىرىلگەن زالالدىڭ ايتار­لىق­تاي سوماسى وتەلگەن.

«ماسەلەن, «Chia Tai Tianqinq Pharmaceutical Group» قارجى پيراميداسىن ۇيىمداس­تى­رۋشىعا قاتىستى قىلمىستىق ءىستى تەرگەۋ بارىسىندا ساتىپ الىنعان پاتەر مەن 10 ملن تەڭگەدەن اسا قاراجات تاركى­لەندى», دەيدى ش.پىرىمقۇل.

دەپارتامەنت قىزمەتكەرلەرى ءوڭىر تۇرعىندارى اراسىندا الاياقتىقتىڭ الدىن الۋ ماقساتىندا ءتۇرلى پروفي­لاك­تيكالىق ءىس-شارالار ۇيىم­داس­تى­رۋدى دا قولعا العان. ءتۇرلى سايت­تاعى قارجىلىق پيراميدا بەل­گىلەرى بار 1013 سىلتەمەنى دەر كەزىندە بۇعاتتاپ, جەرگىلىكتى جانە رەسپۋبليكالىق باق ارقى­­لى ءتۇسىندىرۋ جۇمىستارىن جۇر­­گىزۋ دە نازاردان تىس قالعان ەمەس.

جاۋاپتى ورگان تاراپى­نان الاياقتىقتىڭ الدىن الۋ ماقساتىندا اۋىز تولتىرىپ ايتارلىقتاي جۇمىس اتقا­رىل­عانىنا قاراماستان, قارجى پيرا­مي­دالارىنىڭ سيپاتى بار ۇيىمدارعا الدانعان ازامات­تاردىڭ سانى ازايماي, شىعىن­نىڭ كولەمى دە ورتايماي وتىر.

مامانداردىڭ ايتۋىنشا,­ قارجى پيراميداسىن قۇرۋ جانە باسشىلىق ەتۋ ارەكەتتەرى قىل­مىستىق كودەكستىڭ 217-بابىندا كوزدەلگەن قىلمىستىق جاۋاپكەرشىلىككە اكەپ تىرەيدى. سونداي-اق 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراس­تىرىلعان. سونىمەن قاتار قارجىلىق پيراميدانى جارنامالاۋ ارەكەتىنە دە قاتىس­تى جازا بار. ناقتىراق ايت­ساق, قىل­مىستىق كودەكستىڭ 217-1-بابى­ بويىنشا 2 جىل­عا دەيىنگى مەر­زىم­گە باس بوستان­دىعىنان ايىرۋ تۇرىندەگى جازا قولدا­نى­لادى.

زاڭدا ءبارى تايعا تاڭبا باسقانداي كورسەتىلگەنىنە قاراماستان, وڭىردە قارجى پيرا­ميداسى ۇيىمدارىن قۇرۋ مەن باسقارۋ ارەكەتتەرى ءالى دە تىيىلار ەمەس. اڭعال حالىق الاياقتاردىڭ ارباۋىنا تۇسە بەرگەندىكتەن بولار, الاياقتاردىڭ قاراسى ازايماي تۇر.

جامبىل وبلىسى