ءوندىرىس وركەندەگەن شاعىن شاھارعا جاڭا 29 اۆتوبۋس كەلەدى. جاعىمدى جاڭالىقتى «ورتالىقترانسسەرۆيس» جشس باس ديرەكتورى رۋستام يساەۆ جەتكىزدى.
– قالا تۇرعىندارى ءۇشىن وتە قولايلى اۆتوبۋستار قاتىنايدى. سىيىمدىلىعى ۇلكەن اۆتوبۋستار بالقاشتىڭ كليماتىنا سايكەس كەلەدى. وتاندىق ءونىم. ءبىزدىڭ تالابىمىزعا سايكەس اۆتوبۋستى مەيلىنشە جولاۋشىلارعا ىڭعايلى ەتىپ جاساعان. زاماناۋي ۇلگىدەگى ۇزىندىعى 10,5 مەتر بولاتىن ءىشى كەڭ اۆتوبۋستار. سونىمەن قاتار قىستا اۆتوبۋس ءىشىن جىلىتۋ ءۇشىن پەشتەر سانى كوبەيتىلگەن. بالالى جولاۋشىلار مەن مۇمكىندىگى شەكتەۋلى جاندارعا ارنايى ورىندار بار. جازعى قاپىرىقتا ىستىقتى باساتىن كونديتسيونەرى دە قويىلعان. ارنايى بەينەكامەرامەن دە جابدىقتالعان, – دەيدى ر.يساەۆ.
بۇگىندە قالاىشىلىك جولاۋشىلاردى تاسىمالداۋدا 25 اۆتوبۋس جۇمىس ىستەپ كەلەدى. وسى ايدىڭ سوڭىنا دەيىن جاڭا قوعامدىق كولىكتەر شاھارعا جەتەدى دەپ جوسپارلانىپ وتىر. وسىلايشا, بالقاشتىقتار ەندى ەسكى اۆتوبۋستارمەن قوش ايتىسادى.
قاراعاندى وبلىسى,
بالقاش قالاسى
