سوڭعى رەت جەرلەستەرىمىز 16 قاڭتاردا ۋفانىڭ «سالاۆات يۋلاەۆىن» بۋلليت سوعۋ بارىسىندا جەڭگەن ەدى. ودان كەيىن ماسكەۋدىڭ تسسكا (2:5), ەكاتەرينبۋرگتىڭ «اۆتوموبيليست» (2:3), سانكت-پەتەربۋرگتىڭ سكا (0:7) جانە ءتولياتتيدىڭ «لادا» (0:2) كلۋبتارىنا ەسە جىبەردى. كەشە «بارىس» ءوز مۇزايدىنىندا قازاننىڭ «اق بارسىن» قابىلدادى. ءبىرىنشى كەزەڭدە تاتارستاندىق دميتري يۋدين مەن كيريلل سەمەنوۆ سوققان شايباعا چەحيالىق لەگيونەر داۆيد سكلەنيچكانىڭ عانا گولىمەن جاۋاپ قايىرۋعا جارادى. ۇزىلىستەن كەيىن قوس كوماندا ءبىر-ءبىرىنىڭ قاقپا كىلتىن تابا المادى. 47-مينۋتتا ميتچەلل ميللەر ماتچتىڭ سوڭعى نۇكتەسىن قويدى. ەسەپ – 1:3.
قازىر «بارىس» جارىس كەستەسىندە 20-ورىندى قاناعات تۇتىپ تۇر. ەلوردالىق كلۋبتىڭ ەنشىسىندە نەبارى 41 ۇپاي عانا بار. ءوزىنىڭ كەلەسى كەزدەسۋىن وتانداستارىمىز 31 قاڭتاردا ومبىنىڭ «اۆانگاردىنا» قارسى وتكىزەدى.
