نۇرزادا امانگەلدىنىڭ جوباسى «Inclusion and emprowment» نوميناتسياسى بويىنشا ۇسىنىلعان 80 جاھاندىق يننوۆاتسيالىق ونەرتابىستىڭ ىشىنەن ىرىكتەلىپ تاڭدالدى. اقپاراتتىق تەحنولوگيالار فاكۋلتەتىنىڭ «جاساندى ينتەللەكت تەحنولوگياسى» كافەدراسىنىڭ اعا وقىتۋشىسى قازاقشا ىمداۋ ءتىلىن تانۋدىڭ قولجەتىمدى جۇيەسىن بۇۇ دۇنيەجۇزىلىك بايقاۋىنا ۇسىندى. بىرەگەي ازىرلەمە جاساندى ينتەللەكتكە نەگىزدەلگەن جانە قىمبات سەنسورلاردى, بىرەگەي كامەرالاردى نەمەسە سۋپەركومپيۋتەرلەردى قاجەت ەتپەيدى. قازاق ىمداۋ ءتىلىنىڭ اۆتوماتتى سۋردواۋدارما جۇيەسى ەستۋ جانە سويلەۋ قابىلەتى بۇزىلعان ادامداردىڭ ءومىر ءسۇرۋ ساپاسىن جاقسارتۋعا, ولاردىڭ ءبىلىم الۋ جانە باسقا دا ۇردىستەرگە كەدەرگىسىز ەنۋىنە باعىتتالعان.
«جوبامىزدى World Summit Awards ساراپشىلارىنىڭ ماقۇلداۋى ونەرتابىسىمىزدىڭ يننوۆاتسيالىق قۇرامداس بولىگىنە ۇلكەن سەنىم بار ەكەندىگىن كورسەتەدى. ەگەر جوبامىزعا حالىقارالىق ينۆەستورلاردىڭ نازارىن اۋدارا الساق, وندا بۇل ءبىز ءۇشىن ۇلكەن جەتىستىك بولادى», دەيدى نۇرزادا امانگەلدى.
امانگەلدى نۇرزادا بيىل ل.ن. گۋميلەۆ اتىنداعى ەۇۋ جىلدا تاعايىندايتىن «Jana asu» گرانتىن ەكىنشى مارتە يەلەندى. ۋنيۆەرسيتەتتىڭ بۇل باستاماسى عىلىمي قىزمەت ناتيجەلەرىن كوممەرتسيالاندىرۋعا قولداۋ كورسەتۋگە باعىتتالعان.
قازاقستانداعى World Summit Awards ساراپشىسى اناتولي كرەمەنچۋتسكي قىسقا تىزىمگە 60 ەلدەن 136 جوبا ەنگىزىلگەنىن اتاپ ءوتتى.
«2023 جىلى World Summit Awards بايقاۋىنا قازاقستاننان 8 ۇمىتكەرىمىز بولدى. بىراق باسەكەلەستىك وتە جوعارى بولعاندىقتان, ىرىكتەۋدەن تەك ءبىر جوبا عانا ءوتتى. بايقاۋدىڭ ارالىق قورىتىندىسى 8 اقپاندا بەلگىلى بولادى. كەلەسى كەزەكتە ۇمىتكەرلەردىڭ قىسقا تىزىمىنە ەنگەن كوماندالار چيليگە جاھاندىق كونگرەسكە بارادى. ۇمىتكەرلەردىڭ ارقايسىسىنا بۇۇ-دان, باسقا ۇكىمەتتەردىڭ وكىلدەرىنەن جانە قازىلار القاسىنىڭ مۇشەلەرىنەن شامامەن 400 ادامنان تۇراتىن الاڭ ۇسىنىلادى. كوماندالار ءوز جوبالارىن تانىستىرادى, سودان كەيىن قازىلار القاسى جەڭىمپازدى انىقتايدى», دەدى World Summit Awards ماراپاتىنىڭ قازاقستانداعى ساراپشىسى اناتولي كرەمەنچۋتسكي.
ايتا كەتۋ كەرەك, WSA بايقاۋىن بىرىككەن ۇلتتار ۇيىمى وتكىزەدى جانە حالىقارالىق ساراپشىلار جاھاندىق ماڭىزى بار ەڭ جاقسى يننوۆاتسيالىق شەشىمدەردى باعالايدى.
