فوتو: qr_tjm
«كوميسسيا 4-24 قاڭتار ارالىعىندا تەرگەۋ جۇرگىزدى. وسى كەزەڭدە تجم ونەركاسىپتىك قاۋىپسىزدىك كوميتەتى توراعاسىنىڭ ورىنباسارى مۇسا تاناباەۆتىڭ توراعالىعىمەن كوميسسيا مۇشەلەرى جوبالىق قۇجاتتامانى زەردەلەپ, تەرگەۋگە 4 ساراپتامالىق ۇيىمدى, ونىڭ ىشىندە رەسەي فەدەراتسياسىنىڭ ساراپشىسىن تارتىپ, التىن ءوندىرۋشى كاسىپورىننىڭ كۋاگەرلەرى مەن لاۋازىمدى تۇلعالارىنا ساۋالناما جۇرگىزدى. سونىمەن قاتار كوميسسيا شاحتاعا ءتۇسىپ, وقيعا ورنىن زەرتتەدى.
جان-جاقتى تەرگەۋ جۇرگىزە وتىرىپ, كوميسسيا جۇمىس ىستەگەن كەڭىستىككە تاۋ-كەن ماسساسىنىڭ قۇلاۋى سالدارىنان ورىن العان توپتىق جازاتايىم وقيعانىڭ سەبەپتەرى مىناداي: جۇمىس ءوندىرىسىن قاناعاتتانارلىقسىز ۇيىمداستىرۋ;
«مايقايىڭالتىن» اق جاۋاپتى تۇلعالارى تاراپىنان تاۋ-كەن جۇمىستارىنىڭ قاۋىپسىز جۇرگىزىلۋىنە وندىرىستىك باقىلاۋ ءتيىستى تۇردە جۇزەگە اسىرىلماعان;
بلوكتاردى وڭدەۋ كەزىندە قازبالاردان قۇلاۋ پروتسەسىن باقىلاۋ تيىسىنشە جۇزەگە اسىرىلماعان دەگەن قورىتىندىعا كەلدى.
سونىمەن قاتار بۇل بوس ورىندارعا ءتيىستى باقىلاۋ جۇرگىزىلمەگەنى, جوبالىق قۇجاتتاماعا سايكەس ازىرلەنگەن تازارتۋ كەڭىستىگىنىڭ بوس جەرلەرى, قۇلاۋ ىقتيمالدىلىعى بار ەكەندىگى جۇرگىزىلمەنى انىقتالدى.
ناتيجەسىندە كەنەتتەن قۇلاعان تاۋ ماسساسىنىڭ سالدارىنان جازاتايىم وقيعا بولدى.
تەرگەۋ ناتيجەلەرى بويىنشا كوميسسيا مۇشەلەرى جازاتايىم وقيعانىڭ سەبەپتەرىن جويۋ جونىندەگى ءىس-شارالاردى جانە ولاردىڭ ورىندالۋ مەرزىمدەرىن ايقىندادى. ونىڭ ىشىندە شاحتا ديرەكتورىنىڭ, باس ينجەنەردىڭ, باس ماركشەيدەردىڭ, ۋچاسكەلىك ماركشەيدەرلەردىڭ لاۋازىمدىق نۇسقاۋلىقتارى ونەركاسىپتىك قاۋىپسىزدىك سالاسىنداعى زاڭنامانىڭ تالاپتارىن ەسكەرە وتىرىپ قايتا قارالاتىن بولادى. بۇدان باسقا, تاۋ-كەن قازبالارىنىڭ ونەركاسىپتىك قاۋىپسىزدىك تالاپتارىنا سايكەستىگىنە ەگجەي-تەگجەيلى تەكسەرۋ جۇرگىزىلەدى. قۇلاۋى مۇمكىن ايماقتاردى جانە قاۋىپسىزدىك نورمالارىن قامتاماسىز ەتۋدى ەسكەرە وتىرىپ, اۆتوكولىك قوزعالىسىنىڭ مارشرۋتتارى ازىرلەنەدى. كوميسسيا 7 جاۋاپتى ادامدى انىقتادى, ولاردىڭ ارەكەتتەرى سالدارىنان توپتىق جازاتايىم وقيعا ورىن الدى. ەڭبەك زاڭناماسىنا سايكەس تەرگەۋ ماتەريالدارى قۇقىق قورعاۋ ورگاندارىنا جىبەرىلدى», دەپ جازىلعان اقپاراتتا.
اپات بولعان جەردە اۆاريالىق-قۇتقارۋ جۇمىستارى وقيعا بولعان ساتتەن باستاپ دەمالىسسىز ءجۇرىپ جاتىر. توپىراقتىڭ گەوسكانيزاتسياسى جۇمىسى مەرزىمدى ۋاقىتتا جۇرگىزىلىپ وتىر. جۇمىستار وتە قيىن جاعدايدا جۇزەگە اسىرىلىپ جاتىر. تاۋ جىنىستارىنىڭ قۇلاۋ قاۋپى جانە پايدا بولعان شۇڭقىردىڭ استىنداعى بوس كەڭىستىك تە قاتەر تۋدىرىپ وتىر.
