راس-اۋ, اپات كەزىندە ءتۇرلى اۋىر جاراقات العان ادام الدىڭا كەلگەندە ابدىراپ قالماي, العاشقى كومەك كورسەتۋ ءۇشىن جۇرەكتىڭ تۇكتى بولماعى كەرەك. الماگۇل امانگەلدىقىزى وزىنە ءتيىستى قىزمەتتى ابدەن مەڭگەرىپ العان مامان رەتىندە ابىرويلى.
جاس تالاپكەر الماگۇل بۇقار جىراۋ اۋدانى سۋىق سۋ اۋىلىنداعى مەكتەپتى ۇزدىك ءبىتىرىپ, قاراعاندىنىڭ مەديتسينا اكادەمياسىنا وقۋعا تۇسەدى. ءتورت جىلدىق بىلىمىمەن قوسا, مامانداندىرىلعان العاشقى جەدەل كومەك كورسەتۋ بويىنشا تاعى ءتورت اي بىلىكتىلىگىن جەتىلدىرەدى. العاشقى ەڭبەك جولىن تەمىرجول ەمحاناسىندا دارىگەر بولىپ باستاعان ول جەدەل جاردەمدە دە جۇمىسىن جالعاستىرادى. كەيىن ءوزى ءتالىم العان قاراعاندى مەديتسينا اكادەمياسىندا العاشقى جەدەل كومەك كورسەتۋ بويىنشا ستۋدەنتتەرگە ءدارىس وقىپ, بىلگەن-تۇيگەنىمەن بولىسەدى. تاجىريبە, ءتالىمىن ابدەن جەتىلدىرىپ العان سوڭ, قازىرگى قىزمەتىنە اۋىسادى. مۇنداي مىقتى مەديتسينا مامانى اپاتتار مەديتسينا ورتالىعىنا اۋاداي قاجەت ەدى. الماگۇل امانگەلدىقىزى اق حالاتىن قۇتقارۋشىنىڭ فورماسىنا اۋىستىرا سالۋعا بىردەن كەلىسىپتى. كەلىسكەن سەبەبىن ءوزى بىلاي تۇسىندىرەدى:
– اكادەميادا العاشقى جەدەل كومەك كورسەتۋدى وقىدىق. مىقتى دەگەن مەديتسينا ماماندارىنان تاجىريبە تۇرىندە ۇيرەندىك. كەيىن «جەدەل جاردەمدە» دارىگەر بولدىم. ودان سوڭ ستۋدەنتتەرمەن بىلگەنىمدى ءبولىستىم. ءار ءدارىس ساباعىنا تىڭعىلىقتى دايىندىقپەن بارۋ قاجەت. سونىڭ ارقاسىندا مەنىڭ دە ءبىلىمىم جەتىلىپ وتىردى. بىردەن قازىرگى ورتالىققا قىزمەتىمدى اۋىستىردىم. ارينە, مۇندا جۇمىس ىستەۋ ءۇشىن وجەتتىلىك كەرەك. ءومىر بولعان سوڭ, ءتۇرلى قاتەر دە بولادى. سودان زارداپ شەككەندەرگە ەم-دوم جاساپ, جانىن امان الىپ قالۋعا كۇش سالساق دەگەن نيەت بولدى مەندە.
قايسار قىزدىڭ ورتالىق قابىرعاسىندا قىزمەت ەتىپ جاتقانىنا بەس جىلعا جۋىقتاپتى. ءتىپتى, تۇركياداعى ءزىلزالا كەزىندە قۇتقارۋ جۇمىسىنا قاتىسقان. ونداعى اۋىر وقيعانى تەرەڭ تەبىرەنىسپەن ەسكە الىپ, اڭگىمەلەپ بەردى.
– سول جولى ىرىكتەلگەن قۇراممەن تۇركياداعى نۇرداعى قالاسىنا ۇشىپ باردىق. ءبىز قازاقستان ەلىنىڭ اتىنان كەلدىك. العاشقى كۇنى كىرپىك قاقپاي جۇمىس ىستەدىك. بالاسىن ىزدەپ شارق ۇرعان انانى, اكەسىن كۇتىپ وتىرعان بالانىڭ زارىن ەستىپ, باسپاناسىز قالعان, شاراسىز كۇي كەشكەن ەلدى كورىپ, جانىمىزدىڭ جابىققانىن نەسىنە جاسىرايىن؟ ءوز-ءوزىمىزدى جيناپ, جۇمىسىمىزدى ارمەن جالعادىق. مەنىڭ جۇمىسىم – العاشقى كومەك كورسەتۋ. ەم-دومىمدى جاسادىم. ازان-قازان بولعان جۇرتتىڭ كوبىنىڭ كۇيزەلىستەن قان قىسىمدارى ءتۇسىپ كەتىپ جاتتى. بىرىنە وكسىكتەن دەم جەتپەدى. سونىڭ بارىنە كومەك كورسەتتىك. 9 اقپان كۇنى قاراعاندىدان بارعان قۇتقارۋشىلار ءۇيىندى استىنان ءۇش ادامدى تاۋىپ, امان الىپ شىقتىق. سوندا بوس كەلمەگەنىمىزدى تۇسىندىك. ادامنىڭ ومىرىنە اراشا ءتۇسۋ – ول دەگەن ۇلكەن نىعمەت. جانىن ساقتاپ قالعان سايىن ءبىز كەرەمەت كۇي كەشەمىز. ادام – ەڭ قۇندى بايلىق. ۇلكەن بايلىققا كەنەلگەننەن دە كەرەمەت اسەر الامىز, – دەيدى قىزمەتىنە ادال الماگۇل.
الماگۇل الدابەكوۆانىڭ تۇركياداعى قۇتقارۋ جۇمىسى كەزىندەگى كۇنى-ءتۇنى جاساعان ەڭبەگى ەلەندى. مەملەكەت باسشىسى قىزمەتتىك بورىشىن اتقارۋداعى جانقيارلىعى ءۇشىن «ەرلىگى ءۇشىن» مەدالىمەن ماراپاتتادى.
ورتالىققا ويدا-جوقتا تۇسەتىن دابىل دامىل تاپتىرمايتىنىن ايتادى. كوبىنە جول اپاتىنا تۇسكەن جاندارعا كومەك كورسەتىپتى. «بىلتىر «قاراعاندى-الماتى» كۇرە جولىندا جان تۇرشىگەرلىك جول اپاتى وتە كوپ بولدى. نەگە ەكەنىن بىلمەيمىز, مۇمكىن جول جوندەلىپ جاتقاننان بولار, جاز بويى سوندا جۇردىك. دابىل تۇسكەن سايىن ورتالىقتان تەرەڭ كۇرسىنىپ الىپ شىعامىز. سوسىن شىدامدىلىق تانىتامىز. ايتۋعا اۋزىمىز بارمايتىن ءتۇرلى اپاتتارعا بارىپ, ونداعى ادامداردى الىپ شىعىپ, مەديتسينالىق كومەك كورسەتەمىز. وڭاي ەمەس», دەيدى قۇتقارۋشى-دارىگەر.
الماگۇل امانگەلدىقىزى – ءبىر اۋلەتتىڭ كەلىستى كەلىنى. ءتورت بىردەي ۇلدىڭ اناسى. جولداسى اباي ساعات ۇلى ىشكى ىستەر سالاسىندا ەڭبەك ەتەدى. «ەكەۋمىز دە ەلدىڭ اماندىعى ءۇشىن قىزمەت ەتىپ جۇرگەندىكتەن, ءبىر-ءبىرىمىزدىڭ جانىمىزدى تۇسىنەمىز, قولداۋ كورسەتەمىز», – دەيدى.
ۇلكەن ۇلدارى بەكسۇلتان فاگوت اسپابىندا ويناسا, نۇراسىل دومبىرانى شەبەر تارتادى ەكەن. ال ادىلبەك ەسىمدى بالالارى جۇزۋگە قاتىسادى, شاحمات وينايدى. كەنجەلەرى بالاباقشاعا بارادى.
– ەكى ۇلىمىز انگە اۋەس, كۇيگە قۇمار. وتاعاسى ەكەۋمىز ولاردى ونەر سالاسىنا بەت بۇرادى دەپ وتىرمىز. ءۇشىنشىمىز سپورتتى جاقسى كورەدى, جولىمىزدى سول جالعار, – دەيدى اناسى ك ۇلىمدەپ.
الماگۇل امانكەلدىقىزى – مەديتسينا سالاسىنداعى 15 جىلىندا قانشاما ادامنىڭ ءومىرىن امان الىپ قالدى. وجەت دارىگەردىڭ ەرىك-جىگەرىنە قايران قالدىق. ال بىزدەر قارا نارداي قادىرلى انالاردىڭ ءىزىن جالعاعانداردى الىستان ىزدەپ جۇرسەك...
قاراعاندى وبلىسى
