ء«سابيتتىڭ ءومىرى مەن ەڭبەگى جازۋشىنىڭ ءبىر باسىنىڭ ەرەكشەلىگىن عانا بايان ەتپەيدى. ول قازاق ادەبيەتىنىڭ تاريحىنداعى اسا كۇردەلى ءداۋىردىڭ وسكەن جولىن, ىزدەنگەن مۇددەسىنە جەتكەن ءورىسىن دە بايان ەتەدى», دەپ زاڭعار جازۋشى مۇحتار اۋەزوۆ ايتقانداي, سابەڭ ءسوز جوق ءوز ءداۋىرىنىڭ تارلان قالامگەرى بولعانى انىق. كوزى تىرىسىندە بيىكتەن ءتۇسىپ كورگەن جوق. جارىقتىق ءومىرىنىڭ سوڭىندا دا سول بيىكتى اڭساعان ەكەن.
«كادىمگى ءسابيت مۇقانوۆ» اتتى ەستەلىكتەر جيناعىندا ورىس جازۋشىسى الەكسەي براگين, ناۋقاسى مەڭدەپ ءسوۆميننىڭ اۋرۋحاناسىندا جاتقان سابەڭنىڭ القىمىنا اجال تىرەلىپ, باقيعا اتتانار شاقتا جارى ماريامعا ايتقان سوڭعى ءسوزىن كەلتىرەدى. ء«ماريام مەنى قايدا ءتۇسىرىپ بارادى مىنالار؟ مەن تومەنگە ەمەس, تاۋعا شىققىم كەلەدى», دەپتى مارقۇم («كادىمگى ءسابيت مۇقانوۆ». ەستەلىكتەر جيناعى (قۇراستىرعان: س.شايمەردەنوۆ, ق.ەرگوبەكوۆ). – الماتى: جازۋشى, 1984. 295-ب).
زامانداسى عابيت مۇسىرەپوۆ ايتقانداي, ونىڭ دارىنىنىڭ قاينار كوزى – حالىقتىڭ قالىڭ ورتاسى مەن قازاقتىڭ كەڭ بايتاق دالاسى ەدى. سوندىقتان دا شىعار ونىڭ ءولىمى كۇللى بۇقارانى قايعىرتتى. جازۋشىنىڭ قازاسى حاقىندا «سوتسياليستىك قازاقستان» گازەتىندە 1973 جىل, 20 ءساۋىر, №93 سانى رەسمي قازاناما جاريالانىپ, وعان قازاقستان كومپارتياسى ورتالىق كوميتەتىنىڭ ءبىرىنشى سەكرەتارى د.ا.قوناەۆتان باستاپ, بارلىق رەسپۋبليكا دارگەيىندەگى اتقامىنەرلەر كوڭىل ايتىپتى.
گازەتتىڭ كەلەسى كۇنگى (21 ءساۋىر, №94) سانىندا اقىن عافۋ قايىربەكوۆتىڭ جوقتاۋ جىرى جاريالانىپتى. وندا:
«كوزىم كۇيىپ بارادى جاستان مەنىڭ,
تاعدىر شىركىن, تاس پا ەدىڭ, تاستان با ەدىڭ,
قايران سابە, سۋىماي جاتىر ءالى,
تابانىڭمەن كەپ-كەشە باسقان جەرىڭ.
ارقاشان دا داڭقىڭ بار سوعان سەنبەك,
قالدىردىڭ سەن باي مۇرا, ەرەن ەڭبەك,
تومدارىڭدى قولتىقتاپ بارا جاتقان,
سان ۇرپاقتىڭ جۇرەگى سوعار سەن دەپ...»
دەپ جازىلىپتى.
وسىلاي الماتىلىقتار شەجىرە-جازۋشى ءسابيت مۇقانوۆتى 21 ءساۋىر كۇنى اقتىق ساپارعا شىعارىپ سالادى. بىراق بۇل شارۋانىڭ ىشىندە قاھارمان اتامىز باۋىرجان مومىش ۇلى بولا الماپتى. سەبەبى سىرقاتتانىپ, اۋرۋحانادا جاتقان. سويتسە دە, جازۋشىنىڭ جارىنا حات جازىپ, كوڭىل ايتقان ەكەن. حاتتا: «قادىرلى جەڭگەم ءماريام, قاراقتارىم بالالار! ابزال اعام ساكەڭنىڭ الىس ساپار سالعانىنا قاتتى قايعىرىپ جاتىرمىن. باسىنا بارۋىما دوكتورلار رۋحسات ەتپەي وتىر. اۋىر قايعىلارىڭىزعا ورتاقپىن. ورنى تولماس ابزال اعامنىڭ جاتقان جەرى تورقا بولسىن. ب.مومىش ۇلى. 20.04.73 ج. بولنيتسا».
بۇل جادىگەر قازىر س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىنىڭ قورىندا ساقتاۋلى تۇر. مۋزەي قىزمەتكەرلەرىنىڭ ايتۋىنا قاراعاندا, بۇل حات-جادىگەردى جارىنىڭ قۇجات-قاعازدارىمەن بىرگە ءماريام مۇقانوۆا تاپسىرىپتى.
