مەملەكەت باسشىسى قاسىم-جومارت توقاەۆ: «بالالارعا بيلىك تاراپىنان دەنساۋلىق ساقتاۋ, ءبىلىم بەرۋ جانە الەۋمەتتىك قامسىزداندىرۋ سالاسىندا بالالاردى قورعاۋ ماقساتىندا ناقتى ءىس-شارالار جاسالۋى كەرەك», دەگەن ەدى. بۇل وي بالالارمەن تىكەلەي جۇمىس ىستەيتىن وقۋشىلار سارايىنا دا ۇلكەن جاۋاپكەرشىلىك جۇكتەگەنى بەلگىلى. تالدىقورعانداعى 2016 جىلى ىرگەسى قالانعان نىسان بالالاردىڭ بوس ۋاقىتىن قامتاماسىز ەتۋدە ءھام العان بىلىمدەرىن پراكتيكا جۇزىندە ىسكە اسىرۋدا ماڭىزدى رولگە يە. ەستەتيكالىق, لينگۆيستيكالىق, مۋزىكالىق, كوركەمونەر, عىلىمي-تەحنيكالىق, سپورتتىق, تۋريزم, بالالار قوزعالىسى باعىتىندا جۇمىس ىستەيتىن ۇيىرمەلەر زەرەك وقۋشىلاردىڭ جانسارايىن اشادى. وقۋشىلار سارايىنىڭ ديرەكتورى ءلاززات مۇقامەتقاليقىزىنىڭ ايتۋىنشا, وسكەلەڭ ۇرپاقتىڭ قىزىعۋشىلىعى مەن شىعارماشىلىق قابىلەتتەرىن
دامىتۋدا ورتالىقتىڭ قوسار ۇلەسى وراسان.
– ءوز ۇلتىنىڭ تاريحىن, مادەنيەتىن, ءتىلىن, ونەرىن بىلەتىن, ونى قادىرلەپ, قاستەرلەيتىن ۇلتجاندى ازامات تاربيەلەپ جاتىرمىز. جەتكىنشەكتەردىڭ ءوز مۇمكىندىكتەرىن جۇزەگە اسىرۋ قاجەتتىلىكتەرى مەن ۇستانىمىن قالىپتاستىرۋدا دا جۇمىستار ءجۇرىپ جاتىر. وقۋشىلار سارايى 44 ۇيىرمە, 8 باعىت بويىنشا جۇمىس ىستەيدى. تالاي شاكىرتىمىز حالىقارالىق ءارى رەسپۋبليكالىق بايقاۋلاردا توپ جارىپ, ءوڭىردىڭ عانا ەمەس, ەلدىڭ ابىرويىن اسقاقتاتىپ ءجۇر, – دەيدى ل.مۇقامەتقاليقىزى.
بۇگىندە وقۋشىلار سارايىندا 2 230 بالا وقىپ جاتىر. ولارعا ءوز سالاسىن جەتىك مەڭگەرگەن 63 پەداگوگ ساباق بەرەدى. كەز كەلگەن وقۋشىنىڭ دارىنىن ۇلتتىڭ رۋحاني يگىلىگىنە ءتيىمدى پايدالانۋعا بولاتىنىن دالەلدەگەن اتالعان شاڭىراقتىڭ جەتكەن جەتىستىگى ءبىرشاما. ماسەلەن, وسىدان ءۇش جىل بۇرىن «سولنىشكو» حورەوگرافيالىق بي ءانسامبلى پاريجدەگى «Magnifique Paris International festival of arts» جانە تاشكەنتتەگى «Roze of the east» بايقاۋلارىنا قاتىسىپ, جەڭىمپاز اتانعان. بي ونەرىنەن بولەك, ءان-جىر, قولونەر شەبەرلەرى حالىقارالىق, رەسپۋبليكالىق بايقاۋلاردا جوعارى ناتيجە كورسەتىپ ءجۇر. عىلىمعا جاقىن جاستاردىڭ دا ونەرى كوپتى تاڭعالدىرادى. ونىڭ ارقايسىسىنا جەكە-جەكە توقتالۋ مۇمكىن ەمەس.
شىعارماشىلىق ورتالىق ۆوكال, اكتەرلىك ونەر, ساتيرا ونەرى, بي, ءداستۇرلى ءان, اسپاپتاردا ورىنداۋ, شاحمات, بالالار تەلەجۋرناليستيكاسى, فوتو-بەينەتۇسىرىلىمدەردى مونتاجداۋ سەكىلدى سالالاردى جەتىك مەڭگەرۋگە جول اشادى. بۇل جاڭا ۇلگىدەگى زاماناۋي سارايدىڭ باسقا قوسىمشا ءبىلىم بەرۋ ورتالىقتارىنان ءبىر ەرەكشەلىگى وسى. بالالاردىڭ قىزىعۋشىلىعىن ۋاقىت ۇدەرىسىنە ساي تەحنيكالىق باعىتتارعا بۇرۋعا باسىمدىق بەرۋىمەن دارالانادى. سوندىقتان ەل اۋماعىنداعى كاسىبي بىلىكتى مامانداردى ارنايى شاقىرىپ, ولاردىڭ تاعىلىمدى تاجىريبەسىن جاستارعا ۇلگى-ونەگە رەتىندە كورسەتۋ قولعا الىنعان.
جاڭا تەحنولوگيالار الەمىندەگى بالالار مەن جاستار شىعارماشىلىعى ۇعىمىنىڭ وزگەرگەنىن ءتۇسىنۋ يننوۆاتسيالىق ادىستەمەلەردى بەلسەندى ەنگىزۋدى, زاماناۋي قۇرال-جابدىقتاردى كەڭىنەن قولدانۋدى قاجەت ەتەدى. وسى ماقساتتا تۇرلەنگەن جەتىسۋ تورىندەگى قوسىمشا ءبىلىم بەرۋدىڭ باستى ورداسى سانالاتىن شاڭىراق وڭىردەگى تالانتتاردىڭ شەبەرحاناسىنا اينالىپ وتىر.
– وقۋشىلار سارايى بالالاردىڭ مەكتەپتەن تىس بوس ۋاقىتىن ءتيىمدى پايدالانۋعا زور ىقپال ەتەتىن بىردەن-ءبىر مەكەمە دەر ەدىم. بۇل جەردە بالا ءوزىن ءتۇرلى باعىت بويىنشا سىناپ كورە الادى. اتالعان مەكەمەگە اياق باسقالى تىنىمسىز ەڭبەك پەن ىزدەنىستىڭ ناتيجەسىندە مەنىڭ دە جەتكەن جەتىستىگىم از ەمەس. بىرنەشە رەسپۋبليكالىق, حالىقارالىق بايقاۋدان «كوركەمسوز» جانرى بويىنشا جۇلدەلى ورىندارعا يە بولىپ, شەت مەملەكەتتەرگە جولداما الدىم, – دەيدى «جاس قالامگەر» ۇيىرمەسىنىڭ قاتىسۋشىسى اقبوتا قابدەن.
ۇلت ۇستازى احمەت بايتۇرسىن ۇلىنىڭ ء«بىز اۋەلى ەلدى تۇزەتۋدى بالا وقىتۋ ءىسىن تۇزەتۋدەن باستاۋىمىز كەرەك» دەگەن ءسوزى بار. بالالاردى ءبىلىم جولىنا سالىپ, ءتۇزۋ جولدان تايدىرماي, ساناعا ساۋلە شاشار وقۋ-ءبىلىمنىڭ تىزگىنىن ۇستاتۋ مەملەكەت پەن قوعامنىڭ مىندەتى سانالادى. قانداي مىقتى مەملەكەت بولسىن, جاستاردىڭ ءبىلىمى مەن وقۋ-اعارتۋ ىسىنە كوپ كوڭىل بولەدى. كەلەشەكتىڭ ىرگەتاسىن قالاۋ ءۇشىن, ەڭ الدىمەن, سول ەلدىڭ كىشكەنتاي ازاماتتارىنىڭ سانالى ۇرپاق بولىپ جەتىلۋىنە كۇش سالۋ كەرەك. ەلىمىزدىڭ بولاشاعى بالالاردىڭ جان-جاقتى, دارىندى, ءبىلىمدى, ونەرلى بولىپ ءوسىپ-جەتىلۋىنە جاعداي جاساپ وتىرعان وقۋشىلار سارايىنىڭ جەتىستىگى مۇنىمەن توقتاماي, بولاشاقتىڭ كوشىن باستار ازاماتتار تۇلەپ ۇشاتىنىنا سەنىم مول.
جەتىسۋ وبلىسى
