«وسى رەتتە 100-دەن استام ءىرى ءسۇت-تاۋار فەرماسى سالىنىپ جاتقان سولتۇستىك قازاقستان وبلىسىنىڭ جەتىستىكتەرى كوپكە ۇلگى. شارۋالاردىڭ تاجىريبەسى مول, جەمشوپ قورى دا جەتكىلىكتى. وعان قوسا بايىپتى قولداۋ شارالارى قولعا الىنعان. وسىنىڭ ءبارى تۇتاسا كەلە ءتاپ-ءتاۋىر ناتيجە بەرىپ وتىر. قۇس فابريكالارىن, كوكونىس قويمالارىن, ەت ونىمدەرىن شىعاراتىن كاسىپورىندار سالعان كەزدە وسى تاجىريبەنى باسشىلىققا الۋ كەرەك», دەدى پرەزيدەنت.
مىنە, سول ءىرى ءسۇت فەرمالارىنىڭ ءبىرى نۇرا اۋدانىنا قاراستى كوبەتەي اۋىلىندا سالىنىپ جاتىر. جىلىنا 10 مىڭ توننا ءسۇت وندىرەدى. جاڭا كاسىپورىن ىسكە قوسىلىپ, جۇزدەگەن جۇمىس ورنى قۇرىلىپ, «ەكى قولعا – ءبىر كۇرەك» تابا الماي جۇرگەن اۋىلداعى اعايىن جۇمىسپەن قامتىلادى. جاڭا كەشەن مىڭ باس ساۋىن سيىرعا ارنالىپ تۇرعىزىلعان. كاسىپورىن اۋىل تۇرعىندارىن قوسىمشا جۇمىس ورنىمەن قامتاماسىز ەتىپ قانا قويماي, جەرگىلىكتى ءونىم ءوندىرىسىن دە ۇلعايتادى.
فەرما جاڭا اگروونەركاسىپتىك كەشەندەرگە جەڭىلدىكپەن نەسيە بەرۋدىڭ مەملەكەتتىك باعدارلاماسى بويىنشا سالىنىپ جاتىر. اتالعان نىساننىڭ قۇرىلۋىنا «چەرنيگوۆسكوە ي ك» جشس جانە «رامادان مف» جشس باستاماشىلىق ەتىپ وتىر.
سەرىكتەستىك بۇعان دەيىن تەك ءداندى داقىل وسىرۋمەن اينالىسقان. فەرما قۇرىلىسى بىلتىر باستالدى. قۇرىلىسشىلار قىسقا قاراماي جۇمىستارىن اتقارىپ جاتىر. قاجەتتى قۇرىلىس ماتەريالدارى تولىق جەتكىلىكتى.
– بۇل ارادا بەس فەرمادان تۇراتىن كەشەن, سونداي-اق جەمشوپ وندىرۋگە ارنالعان سۇرلەم الاڭى بولادى. كۇزگە دەيىن قۇرىلىس جۇمىستارىن اياقتاپ, نىساندى ىسكە قوسامىز دەگەن جوسپارىمىز بار, – دەيدى «چەرنيگوۆسكي ي ك» جشس-نىڭ باسقارۋشى مەنەدجەرى ارمان نۇرجانوۆ.
تاۋارلى-ءسۇت فەرماسىندا ارنايى استىق تازارتقىش قويماسى قاتار ورنالاسادى. بۇل جەرگە تامشىلاتىپ سۋارۋ جۇيەسى ورناتىلادى.
– ءسۇت-تاۋار فەرماسىن سالۋ يدەياسى قىزمەتىمىزدى ءارتاراپتاندىرۋ نيەتىنەن تۋىندادى. ءبىز – وسىمدىك وسىرۋشىلەرمىز. بىراق جىل سايىن مونو ءدان ەگۋمەن اينالىسۋ قيىنداپ بارادى. سوندىقتان «رامادان مف» جشس-مەن بىرىگىپ, قاراعاندى وبلىسى مەن استانا شاھارىنىڭ ءسۇت وڭدەۋ كاسىپورىندارىن شيكىزاتپەن قامتاماسىز ەتەتىن زاماناۋي تاۋارلى-ءسۇت فەرماسىن قۇرۋ تۋرالى شەشىم قابىلدادىق, – دەيدى «چەرنيگوۆسكوە ي ك» جشس ديرەكتورى ايدوس قاناپين.
فەرماعا جۇمىستىڭ بارلىق تسيكلىن اۆتوماتتاندىرۋعا مۇمكىندىك بەرەتىن زاماناۋي باعدارلاما ەنگىزىلمەك. كاسىپكەرلەر گولشتەين اتتى اسىل تۇقىمدى سيىر ءوسىرۋدى قولعا الماق نيەتتە.
– بۇل سيىرلار – ەڭ ءسۇتتى تۇقىمداردىڭ ءبىرى رەتىندە بەلگىلى. فەرمانىڭ جوبالىق قۋاتى – 1 100 باس. كۇنىنە 10 مىڭ ليترگە دەيىن ءسۇت ءوندىرۋدى جوسپارلاپ وتىرمىز. باسەكەگە قابىلەتتى ەڭبەكاقى تولەنەتىن 60 جاڭا جۇمىس ورنىن قۇرامىز. ءبىرىنشى كەزەكتە اۋىل تۇرعىندارىن جۇمىسقا الامىز. قازىر ولاردىڭ كوپشىلىگى امالسىزدىقتان ەلوردادا جۇمىس ىستەپ ءجۇر. ءبىزدىڭ فەرما جاستارعا قالادان جۇمىس ىزدەمەي, تۋعان اۋىلىندا تۇرۋعا جانە جۇمىس ىستەۋگە, ەلدىڭ ءوسىپ-وركەندەۋىنە ۇلەس قوسۋعا, سونىمەن بىرگە جاقسى تابىس تابۋعا مۇمكىندىك بەرەدى, – دەيدى ديرەكتور ايدوس كاناپين.
تاۋارلى-ءسۇت فەرماسى قاجەتتى ازىقپەن ءوزىن-ءوزى قامتاماسىز ەتەدى. ول ءۇشىن سۋ تارتۋ قۇرىلىسىن جانە سۋ قۇبىرى جەلىلەرىن سالۋ جوباسى ازىرلەنگەن. جوبا سۇرلەمگە جانە باسقا دا ءداندى داقىلدارعا ارالاستىراتىن جاسىل جۇگەرى وتىرعىزۋ جوسپارلانعان 700 گەكتار القاپتى سۋارۋدى كوزدەيدى. جوبا «بيزنەستىڭ جول كارتاسى» مەملەكەتتىك باعدارلاماسى بويىنشا قولداۋ تاۋىپتى. كاسىپكەرلەر ونى جۇزەگە اسىرۋدى كۇتىپ وتىر جانە اۋستريالىق «Bauer» فيرماسىنىڭ التى شاشىراتقىش ماشيناسىن ساتىپ العان.
– بۇل – «سارىارقا» الەۋمەتتىك كاسىپكەرلىك كورپوراتسياسى قولداعان اۋدانداعى, ءتىپتى وبلىستاعى ءىرى تاۋارلى-ءسۇت فەرماسىن قۇرۋ بويىنشا ينۆەستيتسيالىق جوبالاردىڭ ءبىرى. ءبىزدىڭ اۋداندا قازىر 30 باسقا ارنالعان ءبىر عانا تاۋارلى-ءسۇت فەرماسى بار. جاڭا فەرما اگروونەركاسىپتىك سەكتور مەن مال شارۋاشىلىعىن دامىتۋعا سەرپىن بەرەدى, – دەيدى نۇرا اۋدانىنىڭ اۋىل شارۋاشىلىعى ءبولىمىنىڭ باسشىسى ەربول مامبەتوۆ.
قاراعاندى وبلىسى,
نۇرا اۋدانى
