فوتو: parlam.kz
مەملەكەت باسشىسىنىڭ پارلامەنتكە ۇندەۋىن قورعانىس ءمينيسترى رۋسلان جاقسىلىقوۆ وقىپ بەردى. 430 ادامعا دەيىنگى بىتىمگەرشىلىك كونتينگەنتىن جىبەرۋ جوسپارلانعان. بۇۇ-نىڭ ميسسيالارىنا قاتىسۋ قازاقستان قارۋلى كۇشتەرىنە اسكەرلەردىڭ جاۋىنگەرلىك ماشىقتارىن جەتىلدىرۋ ءۇشىن پايدالانىلاتىن بىتىمگەرشىلىك وپەراتسيالارعا ءتان قاجەتتى جاۋىنگەرلىك داعدىلارعا قول جەتكىزۋگە مۇمكىندىك بەرەدى.
ماجىلىستەگى حالىقارالىق ىستەر, قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان قازاقستان ءوزىن بۇۇ-نىڭ جاھاندىق بەيبىتشىلىك پەن قاۋىپسىزدىكتى قامتاماسىز ەتۋ جونىندەگى ميسسيالارىنىڭ جاۋاپتى قاتىسۋشىسى رەتىندە تانىتا بىلگەنىن, از ۋاقىتتا حالىقارالىق بىتىمگەرشىلىك پروتسەستەردە وزىق پوزيتسيالارعا يە بولعانىن اتاپ ءوتتى.
«بۇگىنگى ەل پرەزيدەنتىنىڭ ۇسىنىسى مەملەكەتتىڭ تاۋەلسىزدىك العان العاشقى كۇندەرىنەن باستاپ جۇرگىزىپ كەلە جاتقان بەيبىتشىلىك پەن حالىقارالىق قاۋىپسىزدىكتى نىعايتۋ جونىندەگى ەل ساياساتىنىڭ ءسوزسىز جالعاسى ەكەنى انىق», دەدى ا.قۇسپان.
تالقىلاۋ قورىتىندىسى بويىنشا پارلامەنت دەپۋتاتتارى مەملەكەت باسشىسىنىڭ بۇۇ ميسسيالارىنا قاتىسۋ ءۇشىن قازاقستان رەسپۋبليكاسى قارۋلى كۇشتەرىنىڭ بىتىمگەرشىلىك كونتينگەنتىن جىبەرۋ تۋرالى ۇسىنىسىن قولداۋ تۋرالى شەشىم قابىلدادى.
