جانات كوشەنوۆ كوشىن باستاعان بۇل توپ وزدەرى ويلاپ تاپقان دارىلىك زاتتاردى زەرتتەپ, جەتىلدىرۋ ۇستىندە ءجۇر. ەل عىلىمىنا ەرەكشە سەرپىن بەرگەن جاس عالىمدار شەتەلدەن ءبىلىم الىپ كەلگەن. شەتەلدىك عىلىمي جانە وندىرىستىك ورتالىقتاردا زەرتتەۋ-وڭدەۋ جۇمىستارىن مەڭگەرگەن.
– بۇل جاقتا جاڭادان تابىلعان وسىمدىك پرەپاراتتارىن قازىر مي اۋرۋلارىنا, پاركينسون, التسگەيمەر اۋرۋلارىنا قارسى تەكسەرىپ جاتىرمىز. تابيعي تازا دارىلەر وندىرەمىز. جالپى, شەتەلدە العان ءبىلىمىمىزدى پايدالانىپ, وتاندىق فارماتسەۆتيكانى دامىتۋعا ۇلەس قوسساق دەيمىز, – دەيدى حالىقارالىق عىلىمي-وندىرىستىك كەشەننىڭ عىلىمي قىزمەتكەرى جانات كوشەنوۆ.
بۇل ەرەكشە پرەپاراتتارعا قاجەتتى بيولوگيالىق شيكىزات نەگىزىنەن وسىمدىكتەردەن الىنادى. PhD اسەل امانجان عىلىمي ورتالىقتا 8 جىلدان بەرى جۇمىس ىستەپ كەلەدى. ول ەلىمىزدە وسەتىن وسىمدىكتەر اراسىنان تابيعي شيكىزات كوزدەرىن زەرتتەپ, بيولوگيالىق بەلسەندى قوسىلىستاردى ءبولىپ الۋ جۇمىسىندا تىڭ جەتىستىكتەرگە جەتكەن بىلىكتى مامان. قازىر ول وندىرۋگە قاجەتتى سۋبستانسالاردىڭ جاڭا تۇرلەرىن سىناقتان وتكىزۋ ماقساتىندا شەتەلدىڭ عىلىمي زەرتتەۋ ينستيتۋتتارىمەن ۇنەمى بايلانىسقا شىعىپ وتىرادى.
– 2023 جىلى ماسكەۋ قالاسىندا سيدجەنوۆ اتىنداعى مەديتسينا ۋنيۆەرسيتەتىنىڭ ينستيتۋت فورماتسياسىندا پروفەسسور كراسنيۋكتىڭ قول استىندا تابيعي قوسىلىستاردان سۋدا ەرىگىشتىك كومپلەكستەر الىندى. بىزدە سۋبستانسا رەتىندە قولدانىلادى. وسىعان بايلانىستى وسى ايدا ءنوۆوسىبىر ينستيتۋتىنا ءىسساپار بولادى, – دەدى حالىقارالىق عىلىمي-وندىرىستىك كەشەننىڭ زەرتحانا مەڭگەرۋشىسى اسەل امانجان.
الەم شيپا تابا الماعان پاركينسون دەرتىنە داۋا بولار پرەپاراتتى ويلاپ تاپقان وتاندىق عالىمدار ۇلكەن زەرتتەۋدەن كەيىن, ونى وندىرىسكە ەنگىزەدى.
