ايدىڭ-كۇننىڭ امانىندا 298 پاتەر يەسى انە-مىنە دالادا قالايىن دەپ تۇر. تۇرعىن ۇيلەرى وبلىستىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن رۇقسات ەتىلمەگەن قۇرىلىس رەتىندە تانىلدى. ەندى قالانىڭ وڭتۇستىك-شىعىس بولىگىندەگى «حان» جانە «Al-Farabi» تۇرعىن ءۇي كەشەندەرىن قۇرىلىس سالۋشى سوت شەشىمى زاڭدى كۇشىنە ەنگەن كۇننەن باستاپ, 30 جۇمىس كۇنىندە ءوز قاراجاتى ەسەبىنەن سۇرۋگە ءتيىس.
بۇل كۇنى كەشە باستالعان اڭگىمە ەمەس ەدى. بۇعان دەيىن دە بۇزىلۋى مۇمكىن ەكەندىگى ايتىلىپ, ەسكەرتىلگەن-ءدى. مۇنداعى نەگىزگى ماسەلە – ساراپتاما قورىتىندىسىنىڭ جوقتىعى بولىپ وتىر.
جارناما ارقىلى ۇلەسكەر تارتقان كومپانيا يەلەرىنە اكىمشىلىك سيپاتتاعى جازا دا قولدانعان. سول كەزدىڭ وزىندە قۇرىلىستى توقتاتۋ تۋرالى سوت شەشىمى شىقسا دا, «مۇرنىن شۇيىرگەن». جۇمىستارىن ارمەن قاراي جالعاي بەرگەن. كومپانيالاردىڭ تىعىرىعىنان تۇرعىنداردىڭ نە ءۇيى, نە كۇيى جوق...
«Al-Farabi» تۇرعىن ءۇي كەشەنىنىڭ تۇرعىنى ساۋلە ءابىلوۆا ءۇيىن كەڭەيتپەك بولىپ, ەسكى پاتەرىن ساتىپ, جاڭا ۇيىنە 14 ملن تەڭگە سالعان. بۇل سومما – پاتەر قۇنىنىڭ جارتى باعاسى. مۇنىمەن قوسا, ءۇيىنىڭ جوندەۋ جۇمىستارىنا باسقا بانكتەن نەسيە العان.
«سوت شەشىمى نەگىزسىز ءارى ادىلەتسىز. بارلىق ينستانتسياعا جۇگىنۋگە نيەتتىمىز. سوت ءۇيدى بۇزىپ, قونىستانعان ادامداردى قىستىڭ كوزى قىراۋدا دالاعا شىعارىپ تاستاۋ تۋرالى شەشىم قابىلدادى», دەيدى باسى داۋعا قالعان دايىن ءۇيدىڭ تۇرعىندارى.
سونىمەن سوتتىڭ شەشىمى وبلىستىڭ مەملەكەتتىك ساۋلەت-قۇرىلىس باقىلاۋ باسقارماسى جۇرگىزگەن تەكسەرىس ناتيجەسىنە بايلانىستى بولىپ تۇر.
– تەكسەرۋ بارىسىندا «ساۋلەت, قالا قۇرىلىسى جانە قۇرىلىس قىزمەتىن مەملەكەتتىك رەتتەۋ» تۋرالى زاڭعا سايكەس, تۇرعىن ءۇي كەشەندەرى بەكىتىلگەن جوبالاۋ قۇجاتتاماسىنسىز, ولاردى جۇزەگە اسىرۋعا مەملەكەتتىك ساۋلەت-قۇرىلىس باقىلاۋ ورگاندارىنا قۇرىلىستى باستاۋ تۋرالى حابارلاماسىنسىز, جوبانى ساراپتاۋسىز, تەحنيكالىق جانە ساۋلەتتىك قاداعالاۋسىز قۇرىلىس-مونتاجداۋ جۇمىستارى جۇرگىزىلىپ جاتقانى انىقتالدى. سونداي-اق پاتەرلەردى ساتىپ الۋ-ساتۋ بويىنشا الدىن الا جاسالعان كەلىسىمدەر بويىنشا 250 ۇلەسكەردەن قاراجات تارتقان, بىراق ولار جەرگىلىكتى اتقارۋشى ورگاننان قاراجات تارتۋعا رۇقسات الماعانى انىقتالدى, – دەيدى وبلىستىڭ مامانداندىرىلعان اۋدانارالىق ەكونوميكالىق سوتىنىڭ ءباسپاسوز قىزمەتى.
«Al-Farabi» تۇرعىن ءۇي كەشەنىن سالۋشى كومپانيا «Building سك» جشس ۇلەسكەرلەر الدىنداعى مىندەتتەمەلەردى ورىنداۋ ءۇشىن تۇرعىن ءۇي كەشەنىنىڭ قۇرىلىسىن جالعاستىرعانىن ايتادى.
– رۇقسات قۇجاتتارىن الىپ ۇلگەرەمىز دەپ ويلادىق. قۇرىلىستىڭ ساپاسىنا سەنىمدىمىن. تەحنيكالىق ساراپتامالاردى اككرەديتتەلگەن كومپانيالار جۇرگىزدى. ءۇي ساپالى سالىنعان. سوت شەشىمى كۇتپەگەن جاعداي بولدى. جاۋاپكەرشىلىكتەن قاشپايمىز, مىندەتتەمەلەردى ورىندايمىز. الداعى ۋاقىتتا ءبىز سوت شەشىمىنە شاعىمدانامىز, قالا باسشىلىعى جاردەمدەسۋگە دايىن, – دەيدى كومپانيا وكىلى ابىلايحان امىربەكوۆ.
قالا اكىمى مەيرام قوجۋحوۆ ۇلەسكەرلەرمەن كەزدەسۋىندە سوتتان ءۇيدى ءسۇرۋدى كەيىنگە قالدىرۋدى سۇرايمىز دەپتى.
– زاڭ بويىنشا ءبىرىنشى ينستانتسياداعى سوت شەشىمى ءالى كۇشىنە ەنگەن جوق. قازىر اپەللياتسياعا بەرۋ ءۇشىن تالاپ-ارىزىن دايىنداۋ كەرەك. وسى ۋاقىت ارالىعىندا قۇرىلىس سالۋشىلارمەن كەزدەسىپ, قۇجاتتاردى دايىنداۋ قانداي ساتىدا ەكەنىن بىلەمىز. سەبەبى ءۇي سالىنىپ قويدى. مەملەكەتتىك قۇرىلىس ساراپتاماسىن تاعايىنداۋدى تالاپ ەتەمىز. ءۇي سۇرىلمەيدى دەپ سەنەيىك. ءبارى ساراپتاما دايىن بولعاننان كەيىن بەلگىلى بولادى. سوتتا ۇلەسكەرلەردىڭ اتىنان ءۇيدى ءسۇرۋدى كەيىنگە قالدىرۋدى سۇرايتىن بولامىز, – دەيدى قالا باسشىسى.
بار ءۇمىت – اپەللياتسيالىق شاعىمدا. سوت مەملەكەتتىك ساراپتاما تاعايىنداۋعا كەلىسسە, ءۇي سۇرىلمەيدى.
جوعارىداعى تۇرعىن ءۇي كەشەندەرى عانا ەمەس, رۇقسات قۇجاتتارىنىڭ تولىق پاكەتىنسىز سالىنىپ جاتقان وبلىس ورتالىعىنداعى 70 تۇرعىن ءۇي كەشەنىنىڭ 11-ءى – ءتۇرلى زاڭ تالابىن بۇزۋمەن تۇرعىزىلعان.
– قۇرىلىسى ءجۇرىپ جاتقان تۇرعىن ءۇي كەشەندەرىنىڭ قۇجاتتارى تولىق ەمەس. جوعارىدا اتالعان ءۇش تۇرعىن ءۇي كەشەنى بويىنشا بۇل تۇپكىلىكتى شەشىم ەمەس, اپەللياتسيا مۇمكىندىگى بار ەكەنىن اتاپ وتكىم كەلەدى. مەنىڭ ويىمشا, قۇرىلىس سالۋشىلار ونى پايدالانادى. ال «تۇرعىن ءۇي قۇرىلىسىنا قاتىسۋ ۇلەسى تۋرالى» زاڭنىڭ ماقساتى – سىزدەردىڭ سالىمدارىڭىزدى قورعاۋ, ساقتاندىرۋ. ءار ادام قۇرىلىس سالۋشى تۋرالى اقپاراتتى تەكسەرۋى كەرەك. قۇرىلىس كومپانياسىندا كوپ نارسەگە سەندىرۋى مۇمكىن. سوندىقتان اقپاراتتى مەيلىنشە تەكسەرۋ كەرەك, – دەيدى وبلىستىڭ مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى سەرجان ايماقوۆ.
ءسوزىنىڭ دالەلى رەتىندە قۇرىلىسى رۇقساتسىز ءجۇرىپ جاتقان «قارقارالى» تۇرعىن ءۇي كەشەنىنىڭ كۇنى كەشە تۇسىرىلگەن سۋرەتتەرىن دە ۇسىندى.
– «Buildary» جاۋاپكەرشىلىگى شەكتەۋلى سەرىكتەستىگى قولدارىندا قۇرىلىستى توقتاتۋ تۋرالى سوتتىڭ شەشىمى بولسا دا, جۇمىستارىن جالعاستىرۋدا. جارناماعا سەنبەڭىزدەر. ەگەر وسى ۇيگە ۇلەسكەر رەتىندە قاراجات سالىپ قويساڭىزدار, قايتارىپ الۋعا تىرىسىڭىزدار. سەبەبى بۇل ءۇي بۇزۋ جونىندە سوتقا باراتىنداردىڭ ىشىندە ءبىرىنشى تۇر, – دەيدى باسقارما باسشىسى س.ايماقوۆ. – قانشاما كومپانيالار تۇرعىن ۇيلەردى زاڭسىز سالىپ جاتىر. تالايىن ۇلەسكەرلەردىڭ قاراجاتىن زاڭسىز العانى ءۇشىن جاۋاپقا تارتتىق» دەگەن اقپارات قاشاندا بولسىن بەرىلىپ وتىردى. ودان بولەك, باسقارمانىڭ رەسمي سايتى دا بار. بىراق Instagram, Facebook-تەگى جازىلۋشىلارىمىز وتە از. سايتقا دا ادامدار سيرەك كىرەدى. بيىلدان اقپارات تاراتۋ جاعىنان جۇمىس ۇستانىمىمىزدى تۇبەگەيلى وزگەرتەمىز. كۇن سايىن ناقتى ۋاقىت رەجىمىندە, زاڭدى بەلدەن باسىپ, قۇرىلىس جۇمىستارىن جۇرگىزىپ جاتقان قۇرىلىس كومپانيالارى تۋرالى اقپاراتتى بەرىپ وتىرامىز.
مۇنىمەن قوسا, باسقارما باسشىسى «حان», «Al-Farabi» جانە «Nura» تۇرعىن ءۇي كەشەندەرىن سالىپ جاتقان كومپانيالارعا 2022 جىلعى مامىردا اكىمشىلىك شارالار قولدانعانىن ايتادى. ىرگەسىن ەندى عانا كوتەرگەننەن-اق, دابىل قاعىپ, پروكۋراتۋرانىڭ ۇسىنىسى بويىنشا ايىپپۇل سالعان. تاعى ءبىر ايدان سوڭ قۇرىلىس جۇمىستارىن توقتاتۋ تۋرالى شەشىم شىققان. جوعارىدا اتاپ وتكەنىمىزدەي, شەشىمدى كوزىنە ىلمەگەن كومپانيا جۇمىسىن توقتاتپاعان. باسقارما پوليتسيا دەپارتامەنتىنە سوت شەشىمىن ورىندامادى دەپ ارىزبەن دە جۇگىنگەن.
«پوليتسيا دەپارتامەنتى اكىمشىلىك ايىپپۇل سالدى. بىراق قۇرىلىس توقتاماعان سوڭ ادىلەت دەپارتامەنتىنە سوت ورىنداۋشىسى جۇمىسىن تيىسىنشە اتقارماعانى ءۇشىن شاعىمداندىق. ول جاقتان «قۇرىلىس جۇمىستارى توقتاتىلۋعا ءتيىس ۇيلەردى سالىپ جاتقان كومپانيادان جۇمىستىڭ توقتاتىلعانى تۋرالى حات الدىق», دەگەن جاۋاپ كەلدى. ءبىز قول قۋسىرىپ قاراپ وتىرمادىق. حات جىبەرىپ, قۇقىق قورعاۋ ورگاندارىنان كومەك سۇرادىق», دەيدى س.ايماقوۆ.
باسقارما وڭىرلىك كوممۋنيكاتسيالار قىزمەتىندە تىكەلەي بريفينگ وتكىزۋمەن قاتار, زاڭسىز قۇرىلىس ءجۇرىپ جاتقان جەردەن بەينەروليكتەر جاساپ, حالىققا تاراتۋدى كوزدەپ وتىر. باسقارمانىڭ ارەكەتى ازىرگە – وسى.
نە دەسەك تە, قاراعاندىداعى زاڭسىز قۇرىلىستىڭ زاردابىن «جاڭا باسپاناعا قول جەتكىزەمىز» دەگەن قاراپايىم تۇرعىندار كورىپ وتىر.
قاراعاندى وبلىسى
