«Egemen Qazaqstan» گازەتىندە بۇعان دەيىن جازىلعانداي, پاۆلودار وبلىسىنىڭ مايقايىڭ كەنتىندەگى «شانحاي» شاعىن اۋدانىنىڭ تۇرعىندارى ءار كۇنىن ۇرەيمەن وتكىزىپ كەلەدى. التىن كەنىشى حالىق تۇرىپ جاتقان باسپانالاردان 300-400 مەتردەي جەردە ورنالاسقان. جۇرتتىڭ «كەنىشتە جەر جارۋ جۇمىستارى جۇرگىزىلگەندە, ءۇيىمىز جەراستىنا وپىرىلىپ ءتۇسىپ كەتىپ, بالا-شاعامىزبەن وپات بولامىز با» دەگەن قورقىنىشىن جەتكىزگەن ەدىك.
ءماجىلىستىڭ كەشەگى پلەنارلىق وتىرىسىندا دەپۋتات جارقىنبەك امانتاي ۇلى ماسەلەنى اشىق جەتكىزىپ: «جىل باسىندا پاۆلودار وبلىسىنىڭ باياناۋىل اۋدانىنداعى «مايقايىڭالتىن» اكتسيونەرلىك قوعامى اۋماعىندا بولعان اپات قابىرعامىزدى قايىستىردى. ەڭ وكىنىشتىسى, قۇلاعان جەردىڭ استىندا بۇرىندارى شاحتا بولعانىن ەشكىم ەسكەرتپەگەن. ءتىپتى ۇستىنەن جول سالعان جانە سول جولدى قىزمەتكەرلەر وسى كۇنگە دەيىن پايدالانىپ كەلگەن», دەپ اپاتقا سەبەپ بولۋى مۇمكىن نەگىزگى پروبلەمالاردى اتاپ ءوتتى.
كەنتتەگى «شانحاي» اتانىپ كەتكەن شاعىن اۋدان تۇرعىندارىنىڭ الاڭداۋشىلىعى ۇدەپ كەلەدى دەدى دەپۋتات. «شاعىن اۋداننىڭ استى دا شاحتاعا اينالىپ كەتكەن دەيدى. كەن قازۋ بارىسىنداعى جارىلىستاردان ءۇي ىرگەسى سولقىلداپ كەتەتىنىن ايتىپ وتىر. 100-گە جۋىق شاڭىراق ورنالاسقان اۋماق, قازىرگى وپىرىلىپ قۇلاعان جەردەن نەبارى 500 مەتر قاشىقتىقتا ورنالاسقان. بۇگىندە 10 مىڭعا جۋىق حالىق تۇراتىن ەلدى مەكەننىڭ نەگىزگى تىرشىلىك كوزى دە وسى كەن ورىندارى. تەك «مايقايىڭالتىندا» مىڭنان استام جەرگىلىكتى تۇرعىن ەڭبەك ەتەدى. كاسىپورىننىڭ رەسمي سايتىنداعى مالىمەتتەرگە سۇيەنسەك, كاسىپورىن قۇرىلعان ۋاقىتتان بەرى مۇندا 16,7 ملن توننا كەن وندىرىلگەن. بۇل دەگەنىمىز – 80 توننا التىن, 1240 توننا كۇمىس, 204 مىڭ توننا مىس, 300 مىڭ توننا مىرىش. 13 ملن توننادان استام كەن كاسىپورىنعا قاراستى كەن بايىتۋ فابريكاسىندا قايتا وڭدەلگەن. سويتە تۇرا, اكتسيونەرلىك قوعام ءوز قارجىسىنا كەنتتە ەشقاشان تۇرعىن ءۇي سالماعان, بالالار الاڭى, سپورتتىق نەمەسە الەۋمەتتىك نىساندار تۇرعىزباعان. تەك جىلىنا جەرگىلىكتى بيۋدجەتكە باردى-جوقتى الىم-سالىق تولەپ كەلگەن. ال ەندى وسى اكتسيونەرلىك قوعامنىڭ 100 پايىز اكتسياسى كيپر رەسپۋبليكاسىندا ورنالاسقان «Rence Enterprises LTD» كومپانياسىنا تيەسىلى. ول كومپانيا ميلان پوپوۆيچ دەگەن بيزنەسمەنگە تيەسىلى. ەلىمىزدىڭ بايلىعىنا كەنەلگەن بۇل باي-پاتشالاردىڭ ءىسىن كىم قاداعالاۋعا الادى؟» دەپ قىنجىلا ساۋال تاستادى جارقىنبەك امانتاي ۇلى.
ءسوز سوڭىندا دەپۋتات ۇكىمەتكە بەس تارماقتان تۇراتىن دەپۋتاتتىق ساۋال جولدادى. بىرىنشىدەن, ارنايى قۇرىلعان كوميسسيانىڭ جۇمىسىن اشىق ءارى جۇرتشىلىقپەن, جەرگىلىكتى تۇرعىندارمەن بىرلەسە وتىرىپ ۇيلەستىرۋ كەرەك. ەكىنشىدەن, اتالعان جەردەگى بارلىق شاحتالىق جۇمىس جۇرگىزىلگەن اۋماقتاردى انىقتاپ, ولاردى قاۋىپسىزدىك ەرەجەلەرىنە ساي وقشاۋلاۋ كەرەك. ۇشىنشىدەن, شاعىن اۋداننىڭ تۇرعىندارىنا بارلىق قاۋىپسىزدىك جاعدايىن قاراستىرۋ شارت. قاجەت بولسا كوشىرۋدى قاراستىرۋ كەرەك. تورتىنشىدەن, ەلىمىزدىڭ بايلىعىن پايدالانىپ, بىراق الەۋمەتتىك كومەكتى دەر كەزىندە كورسەتپەي وتىرعان بارلىق شەتەلدىك كومپانيالارعا زاڭ جۇزىندە قاتاڭ شارالار قولدانىلۋى قاجەت. بەسىنشىدەن, ورىن العان اپاتقا جانە تەحنيكالىق قاۋىپسىزدىكتىڭ ساقتالماۋىنا تۇرتكى بولعان جاعدايعا پروكۋراتۋرا ادىلەتتى باعاسىن بەرۋى قاجەت.
پاۆلودار وبلىسى,
باياناۋىل اۋدانى,
مايقايىڭ كەنتى
