وسى جاستاعى قىزدارعا ەكپە سالۋعا سەبەپ - جاتىر موينى وبىرىنىڭ الدىن الۋ. ناقتىلاساق, پاپيللوما ۆيرۋسىنا قارسى ۆاكتسينا تەگىن سالىنادى.
دەنساۋلىق ساقتاۋ مينيسترلىگىنىڭ ەسەبىنشە ەلىمىزدە وسى ساناتقا ەنەتىن 170 مىڭ قىز بار.
«ەلىمىزدە جاتىر موينى وبىرىنىڭ الدىن الۋ ماقساتىندا بيىلدان باستاپ قىزداردى پاپيللوما ۆيرۋسىنا قارسى ۆاكتسينالاۋ ەنگىزىلەدى. 11 جاستاعى قىزداردىڭ اتا-انالارىنا ءوز بالالارىن قاتەرلى دەرتتەن قورعاۋ ءۇشىن ەكپە سالدىرۋ ۇسىنىلادى. ۆاكتسيناتسيا اتا-انالاردىڭ كەلىسىمىمەن عانا جۇرگىزىلەدى», دەدى اجار عينيات.
مينيستر ەكپە مەكتەپتىڭ ەگۋ كابينەتتەرىندە جاسالاتىنىن ايتتى.
مينيسترلىكتىڭ مالىمەتىنشە, قازاقستاندا جىل سايىن 1800 ايەلگە ونكولوگيالىق اۋرۋعا جاتاتىن جاتىر موينى ىسىگى دياگنوزى قويىلادى ەكەن. ونىڭ ىشىندە 600 قىز-كەلىنشەك وسى دەرتتىڭ قۇربانى بولادى.
