فوتو: Instagram muratsaveliev
جانىبەكتىڭ ءتول مەرەكەسىنە وراي «بارمىسىڭ, باۋىرىم» حابارىنىڭ رەداكتسياسى قۇتتىقتاپ, تىلەك ءبىلدىردى.
«جانىبەك! تۋعان كۇنىڭمەن, باۋىرىم! باقىتتى بول! ارمان ماقساتىڭ ورىندالسىن, مۇراتىڭا جەت! ءبىز سەنى جاقسى كورەمىز», دەپ قۇتتىقتادى «بارمىسىڭ, باۋىرىم» حابارىنىڭ رەداكتورى اسەل اسقارقىزى.
ەسكە سالايىق, جانىبەك جەلتوقسان ايىندا تۋعان اناسىن ىزدەپ قازاقستانعا كەلگەن ەدى. بۇل تۋرالى قر ءسىم جانىنداعى «وتانداستار قورىنىڭ» ۆيتسە-پرەزيدەنتى قىزمەتىن اتقارعان ولجاس بەركىنباەۆ جەلىدەگى پاراقشاسىندا جاريالاپ, ەل حالقىنان جانىبەكتىڭ اتا-اناسىن تاۋىپ بەرۋگە قولعابىس جاساۋدى سۇراعان بولاتىن.
ونىڭ وقيعاسىنا «بارمىسىڭ, باۋىرىم» حابارى رەداكتسياسى بىلەك تۇرە اتسالىسىپ جاتىر. جانىبەك ارقالىققا دا ارنايى بارىپ, اتا-اناسىن ىزدەدى. قازىرگى تاڭدا جانىبەكتىڭ اكەسى, اناسى بولۋى مۇمكىن ازاماتتار دنق ساراپتاماسىن تاپسىرىپ جاتىر.
ال حابار رەداكتسياسى جاقىندا عانا بۇل جايتقا قاتىستى قىلمىستىق ءىس قوزعالعانىن مالىمدەدى.
