وسىعان وراي كەشە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە قورعانىس مينيسترلىگى تاربيە جانە يدەولوگيالىق جۇمىس دەپارتامەنتىنىڭ باسشىسى, ادىلەت پولكوۆنيگى تىلەۋحان باسقوجاەۆ ءسوز سويلەپ, كەڭەس وداعىنىڭ باتىرى, ارميا گەنەرالى ساعادات نۇرماعامبەتوۆ پەن قازاقستاننىڭ حالىق قاھارمانى راحىمجان قوشقارباەۆتىڭ 100 جىلدىعىنا ارنالعان ءىس-شارالار تۋرالى ايتىپ بەردى.
25 مامىردا حالىق قاھارمانى, تاۋەلسىز قازاقستاننىڭ ءبىرىنشى قورعانىس ءمينيسترى, ارميا گەنەرالى ساعادات نۇرماعامبەتوۆتىڭ تۋعانىنا 100 جىل تولادى. قورعانىس مينيسترلىگى وكىلىنىڭ ايتۋىنشا, وسى كۇنگە وراي باتىردىڭ تۋعان جەرى اقكول قالاسىندا ساعادات نۇرماعامبەتوۆ اتىنداعى الاڭعا ەسكەرتكىش ورناتىلماق. اقمولا وبلىسىنىڭ اكىمدىگى الاڭدى اباتتاندىرادى. ەلىمىزدىڭ باس قالاسىندا ساعادات نۇرماعامبەتوۆ اتىنداعى كوشەگە ەسكەرتكىش دايىنداۋ جانە ونى ورناتۋ جۇمىستارىن ەلوردا اكىمدىگى ۇيىمداستىرادى.
– قۇرلىق اسكەرلەرىنىڭ اسكەري ينستيتۋتىندا كۋرسانتتاردىڭ ومىرىنەن سىر شەرتەتىن «اسكەري انت» تەلەحيكاياسىنىڭ ءتۇسىرىلىمى اياقتالدى. وندا وتان الدىنداعى بورىش, ار-نامىس, جاۋاپكەرشىلىك جانە سۇيىسپەنشىلىك تاقىرىبى پاش ەتىلەدى. تۋىندىنىڭ تۇساۋكەسەرى وتاندىق تەلەارنادا 2024 جىلدىڭ 7 مامىرىندا وتپەك, – دەدى دەپارتامەنت باسشىسى.
بۇعان قوسا, مادەنيەت جانە اقپارات مينيسترلىگىمەن بىرلەسىپ ارميا گەنەرالىنىڭ ءومىرى مەن قىزمەتى تۋرالى دەرەكتى ومىرباياندىق ءفيلمدى رەسپۋبليكالىق تەلەارنالاردان كورسەتۋ جوسپارلانىپ وتىر. قارۋلى كۇشتەر ارداگەرلەرىنىڭ باسپا باسىلىمدارىنا سۇحباتتارى, وچەركتەرى مەن ەستەلىكتەرى جاريالانىپ, تەلەسيۋجەتتەر مەن دەرەكتى فيلمدەر تەلەديداردان كورسەتىلەدى جانە الەۋمەتتىك جەلىلەرگە شىعارۋ ءۇشىن بەينەجازبالار دايىندالىپ جاتىر.
قورعانىس مينيسترلىگى تاقىرىپتىق باننەرلەر, بيلبوردتار جاساۋ ءۇشىن لوگوتيپ دايىنداپ, جەرگىلىكتى اتقارۋشى ورگاندارعا جىبەردى. سونىمەن قاتار مادەنيەت جانە اقپارات مينيسترلىگى ازىرلەگەن پوشتا ماركاسى دا شىعارىلادى.
ت.باسقوجاەۆتىڭ ايتۋىنشا, بيىل ماۋسىم ايىندا الماتىدا قۇرلىق اسكەرلەرى اسكەري ينستيتۋتىنىڭ ء«الي» وقۋ-جاتتىعۋ ورتالىعىندا ارميا گەنەرالى ساعادات نۇرماعامبەتوۆتى ەسكە الۋعا ارنالعان «ايبىن» حالىقارالىق اسكەري-پاتريوتتىق جاستار جيىنى وتەدى. جيىنعا قاتىسۋعا ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ, سونداي-اق ازەربايجان مەن وزبەكستاننىڭ كوماندالارى شاقىرىلدى.
قارۋلى كۇشتەردىڭ مەملەكەتتىك اسكەري-تاريحي مۋزەيى ەلىمىزدىڭ ون قالاسىندا «حالىق جۇرەگىندەگى قاھارمان» اتتى كوشپەلى كورمەلەر وتكىزبەك. ءىس-شارالار 17 قاڭتاردان الماتىداعى ورتالىق مەملەكەتتىك مۋزەيدەن باستاۋ الادى.
– 1924 جىلى 19 قازاندا تۋعان حالىق قاھارمانى راحىمجان قوشقارباەۆتىڭ ءجۇز جىلدىعىن مەرەكەلەۋ بويىنشا بىرقاتار اۋقىمدى ءىس-شارا جوسپارلانعان. بارلىق گارنيزوندا اسكەري قىزمەتشىلەردىڭ, قارۋلى كۇشتەر ارداگەرلەرىنىڭ, اسكەري-پاتريوتتىق ۇيىمدار وكىلدەرىنىڭ قاتىسۋىمەن كەزدەسۋلەر, دوڭگەلەك ۇستەلدەر, اكتسيالار, چەللەندجدەر وتەدى, – دەدى ت.باسقوجاەۆ.
