بەرتىنگە دەيىن ۇكىمەتتىڭ كومەگىنە جۇگىنبەي, تازا ماڭداي تەرىمەن قوڭىرتاۋدىڭ ءورىسىن ءتورت ت ۇلىككە تولتىرعان. مەملەكەتتىڭ مالعا بەرەتىن سۋبسيدياسىن كەيىننەن عانا العان فەرمەر ەندى شارۋاشىلىعىنا جاڭا تەحنيكا الۋدى جوسپارلاپ وتىر.
«سۋبسيديانى كەيىننەن عانا الىپ ءجۇرمىن. ديزەل وتىنىمىزدى, جەم-ءشوبىمىزدى اقتاپ تۇر. ەندى «كاماز», تراكتور السام دەگەن ويىم بار. تەحنيكا دەگەن شارۋاشىلىقتىڭ كۇشى عوي. وسى ۋاقىتقا دەيىن ەسكى تەحنيكانىڭ ارقاسىندا امان-ەسەن ءشوبىمىزدى ءتۇسىرىپ وتىردىق قوي. جاڭالاپ الساق, جاقسى بولار ەدى», دەيدى فەرمەر.
شارۋاشىلىق يەسى جاقىندا تاعى ءبىر قىستاق الىپ, مالىنىڭ دەنىن سوندا ۇستاپ وتىر. قازىرگى قونىسىنان 4 شاقىرىم جەردە. ويتكەنى ءوز قىستاعىنان 4-5 جەردەن قۇدىق قازعان ەكەن, سۋ شىقپاپتى. تەرەڭ جەرىنەن شىققانىمەن كوپكە بارماي كوزى تاۋسىلادى. ال مال سۋعا سەمىرەدى.
ازاماتتىڭ نەگىزگى كومەكشىسى – قاناعات باۋىرى. اعايىندى ەكەۋى ەكەۋلەپ, ەڭبەك ەتىپ ءجۇر. ونىمەن قوسا بەعازى اۋىلىنداعى 4 ادامدى جۇمىسپەن قامتىپ وتىر. سيىرىن وتباسىلى جاندارعا سەنىپ تاپسىرعان. ولار – جاڭا قىستاعىندا. ءشوپ ناۋقانى كەزىندە تاعى ءبىر جۇمىسكەردىڭ كۇشىنە جۇگىنەدى. ءشوپ دەمەكشى, كەيىنگى ەكى-ءۇش جىلدا ءوز جەرىن شابۋدى قويعان.
«قۇرعاقشىلىق ءبىزدىڭ دە جەردى اينالىپ وتپەدى. ءوزى شابىندىعىمىز شامالى ەدى. مۇلدەم ءشوپ شىقپاي قالدى دەسەك تە بولادى. ايتەۋىر اۋپىرىمدەپ ءجۇرىپ, قىزىلارايدىڭ ورمان شارۋاشىلىعىنا تيەسىلى جەردى شاۋىپ الىپ وتىرمىز. كەلىسىمشارت جاساسىپ, قاراجاتىن تولەپ. بۇل دا بولسا ۇلكەن كومەك», دەيدى شارۋا يەسى.
مايوزەك, سىنتاس اتتى جايىلىمدىق جەرى شۇرايلى. مالى ناۋرىزدا دالاعا شىققاننان باستاپ قار تۇسكەنشە وسى ورىسىندە. بۇل جاقتىڭ قىسى قولايلى. مالى قاڭتاردىڭ ورتاسىنا دەيىن دالادا جايىلادى. قار قالىڭ تۇسە قويمايدى. مۇنىسى دا قۇرعاقشىلىق بۇيىردەن قىسقان ۋاقىتتا كومەك بولىپ وتىر.
بۇل شارۋاشىلىقتا مال بورداقىلاۋ جۇمىسى دا جولعا قويىلعان. ءىرى قارا مالىن جەمگە قويىپ, سەمىرتىپ, بالقاش پەن قاراعاندىعا ساۋدالاپ وتىر.
– اكەم نەگىزى مەحانيزاتور بولعان. كەيىننەن مال باعىپ, بىزگە ءوسىرىپ بەردى. ول كىسىنىڭ ەڭبەگى ەرەن. ءبىزدى دە ەڭبەككە ەرتە ۇيرەتتى. ءبىز دە اكەنىڭ ونەگەسىن بويعا ءسىڭىرىپ, قال-قۋاتىمىز جەتكەنشە, ەڭبەكتەنىپ جاتىرمىز. مالىمىزدىڭ اماندىعى – جانىمىزدىڭ اماندىعى. وسىدان ەكى-ءۇش جىل بۇرىن 10-15 باس جىلقىمىز جوعالاتىن ەدى. قازىر ۇرىلار ايىلىن جيدى. وعان دا تاۋبە, – دەيدى ا.عازيز ۇلى.
ازاماتتىڭ ەسىمىن ارقا جۇرتى جاقسى بىلەدى. ازاماتتىعىمەن, مارتتىگىمەن ءھام ۇلتتىق سپورتتىڭ ۇپايىن تۇگەندەپ جۇرگەن جاناشىر رەتىندە. بەرتىنگە دەيىن ات ۇستىندە ءجۇرىپ, سەركە تارتىستى. بايگە جاراتىپ, دوداعا قوستى. تازى جۇگىرتىپ, اڭ قۋادى.
بارىن باسىپ ەمەس, شاشىپ جەيتىن ازامات رەتىندە ەل اسا قۇرمەتتەيدى.
جومارت فەرمەر جولىنان جىعىلمايدى. قايىرىمدىلىق جاساۋعا ۇنەمى نيەتتى. ۇلتتىق سپورت ويىندارىنا تۇراقتى دەمەۋشى. بەرگەنى ىرىسىن ازايتپايدى, بەرەكەسىن ارتتىرادى.
قاراعاندى وبلىسى,
اقتوعاي اۋدانى
