تاۋەلسىزدىكتىڭ ەلەڭ-الاڭىندا ەلدىڭ جاۋاپتى ازاماتتارىمەن بىرگە مەملەكەت ىرگەتاسىن قالاسقان زامانبەك قالاباي ۇلى الماتى قالاسى مەن وبلىسىنىڭ باسشىسى, توتەنشە جاعدايلار ءمينيسترى سەكىلدى ماڭىزدى مىندەتتەردى اتقارا ءجۇرىپ, كوپتەگەن تۇيتكىلدى ماسەلەنىڭ ءتۇيىنىن تارقاتۋعا سەبەپشى بولدى. ونىڭ باستاماسىمەن جۇزەگە اسقان اۋقىمدى جۇمىستاردى ايماق تۇرعىندارى ءالى كۇنگە دەيىن ايتادى. بۇل جونىندە مەملەكەت باسشىسى قاسىم-جومارت توقاەۆتىڭ ارنايى جولداعان حاتىندا دا ايتىلدى. ەل باسشىسىنىڭ جۇرەكجاردى پىكىرىن پرەزيدەنتتىڭ كەڭەسشىسى – ءباسپاسوز حاتشىسى بەرىك ءۋالي وقىپ بەردى.
«بيىل بەلگىلى مەملەكەت جانە قوعام قايراتكەرى زامانبەك نۇرقادىلوۆتىڭ تۋعانىنا 80 جىل تولدى. تاۋەلسىز قازاقستان تاريحىندا ەل مۇددەسى ءۇشىن ايانباي ەڭبەك ەتكەن ازاماتتار از ەمەس. زامانبەك قالاباي ۇلى – وسىنداي تۇعىرلى تۇلعالاردىڭ ءبىرى. ول ەگەمەندىكتىڭ العاشقى كەزەڭىندە كوپتەگەن جاۋاپتى قىزمەتتى ابىرويمەن اتقاردى. مەملەكەتىمىزدى نىعايتۋعا ايرىقشا اتسالىسىپ, وڭىرلەردى وركەندەتۋگە زور ۇلەس قوسقانى داۋسىز.
ۇلت پەرزەنتىنىڭ ەسىمىن ەل جادىندا جاڭعىرتىپ, ەڭبەگىنە لايىقتى باعا بەرۋ – ۇرپاق پارىزى. وسى ورايدا زاكەڭنىڭ تۋعان جەرى – الماتى وبلىسىنىڭ كەگەن اۋدانىندا وعان ەسكەرتكىش ورناتۋ جانە الماتىداعى تۇرعان ۇيىنە ەسكەرتكىش-تاقتا اشۋ قاجەت دەپ سانايمىن. «تاريح – تارازى» دەپ بەكەر ايتىلماعان. حالقىمىزدىڭ كەسەك تۇلعالى ازاماتىنىڭ ەلگە سىڭگەن ەڭبەگى ەشقاشان ۇمىتىلمايدى», دەلىنگەن پرەزيدەنتتىڭ حاتىندا.
سونداي-اق پارلامەنت سەناتىنىڭ توراعاسى ماۋلەن اشىمباەۆ پەن ءماجىلىس توراعاسى ەرلان قوشانوۆتىڭ بارشا دەپۋتاتتار اتىنان جولداعان رەسمي حاتتارى جينالعان قاۋىمنىڭ الدىندا وقىلدى.
قازاقتىڭ تۇڭعىش عارىشكەرى توقتار اۋباكىروۆ باستاعان قوعام قايراتكەرلەرى مەن زيالى قاۋىم ەرەن تۇلعانىڭ ەسىمىن ۇرپاق جادىندا جاڭعىرتۋ – جاۋاپتى مىندەت, بۇل باعىتتاعى جۇمىستار ۇزدىكسىز جالعاسا بەرۋى قاجەت دەپ ەسەپتەيدى.
ەڭبەك ەرى ءاسانالى ءاشىموۆ: «زامانبەك حالىقتىڭ سۇيىسپەنشىلىگىنە بولەنگەن, ادال, باتىر تۇلعالى ازامات ەدى. ونى حالىق شىن مانىندە جاقسى كوردى. جاقسىنىڭ اتى ەش ۋاقىتتا ۇمىتىلمايدى, ەلىمەن بىرگە جاساي بەرەدى», دەپ ەسكە الدى. ال قوعام قايراتكەرى مۇرات اۋەزوۆ: «زامانبەك – ساياسي قايراتكەر عانا ەمەس, رۋحانيات جاناشىرى. ونىڭ كوڭىلدىڭ كەيبىر ساتتەرىندە ولەڭ جازاتىنى, اۋدارمامەن اينالىساتىنى بار ەدى. بۇل دا تازالىقتىڭ بەلگىسى بولسا كەرەك. قالاي دەگەندە دە, ول تاريحتان, ەل جۇرەگىنەن ويىپ ورىن الدى», دەپ ازاماتتىڭ اسىل قاسيەتىن اتاپ ءوتتى.
بەدەرلى جىلدار بەلەسىندە ەل دامۋىنا ەلەۋلى ۇلەس قوسقان تۇلعانىڭ كاسىبي بىلىگى, جان دۇنيەسىنىڭ تازالىعى, كىسىلىك كەلبەتى جايلى دا ەستەلىكتەردە ايتىلدى.
«زامانبەك – ۇلتىن رياسىز سۇيگەن ادام. باسشىلىق قىزمەتتە جۇرگەن كەزەڭدەرىندە تالاي جۇرتقا شاراپاتى ءتيدى. كەزى كەلگەندە باتىل شەشىمدەرگە بارىپ, تارشىلىق كورگەن ازاماتتاردىڭ باسپانامەن قامتىلۋىنا, جەر تەلىمدەرىنە يە بولۋىنا كوپ ىقپال ەتتى. قانداي باتىل بولسا, سونداي كىشىپەيىل ەدى. الدىنا كەلگەن قاراپايىم ادامنىڭ ءوزىن قابىلداپ, ونىڭ ماسەلەسىن شەشۋگە جان-تانىمەن كىرىسەتىن. كەڭەس زامانىنىڭ سوڭعى كەزى مەن ەگەمەندىكتىڭ العاشقى جىلدارى الماتىنى باسقارۋ وڭاي ەمەس ەدى. بىراق زاكەڭ وسىناۋ جاۋاپتى مىندەتتى ابىرويمەن اتقاردى», دەدى قوعام قايراتكەرى امانگەلدى ەرمەگياەۆ.
ءوز كەزەگىندە نۇرلان ورازالين, بەكسۇلتان نۇرجەكە ۇلى, امانگەلدى شابدارباەۆ, اماندىق باتالوۆ, سەرىك ۇمبەتوۆ, زەينەپ احمەتوۆا, رىسبەك سارسەنباي ۇلى, بولات ءابىلوۆ قايراتكەر جايلى جارقىن ەستەلىكتەرىمەن ءبولىستى.
الماتى
