«تورتكۇل دۇنيە كوز تىككەن ۇلكەن ءىس-شاراعا وتكەن جىلدان بەرى ۇلتتىق سپورت تۇرلەرى قاۋىمداستىعى جان-جاقتى دايىندىقتى باستاپ, فەدەراتسيالار جەر-جەردە بىرنەشە كەزەڭنەن تۇراتىن ىرىكتەۋ جارىستارىن ۇيىمداستىرىپ كەلەدى. سونداي ءىس-شارانىڭ ءبىرى, ۇلتتىق سپورت ءتۇرى «قۇسبەگىلىك» بويىنشا تالعار اۋدانىنداعى پانفيلوۆ اۋلىنىڭ اتشابارىندا ىرىكتەۋ جارىسى ءوتتى. بۇل باسەكەگە وبلىستىق ۇلتتىق سپورت مەكتەپتەرىنىڭ ءار اۋدانداعى «قۇسبەگى» ءبولىمىنىڭ وقۋشىلارى, ورىمدەي جاس وركەندەردىڭ كوپتەپ كەلۋى كوڭىلىمىزدى كوككە كوتەردى. جاس ەرەكشەلىكتەرىنە قاراي قىران قۇس سالۋدىڭ ءۇش ءتۇرى بويىنشا ونەرلەرىن ورتاعا سالعانداردىڭ بارلىعى ەرتەڭگى بولاتىن الەمدىك دوداعا ەل اتىنان وزىندىك ۇلەستەرىن قوسا الاتىن نامىستى ءارى شەبەر سپورتشىلار ەكەنىن بايقاتتى. جەلكىلدەي ءوسىپ كەلە جاتقان جاسوسپىرىمدەردىڭ ۇلتتىق ءداستۇردى ۇلىقتاپ, بويىنا سىڭىرۋدەگى تالپىنىستارى مەن ىنتا-جىگەرلەرىنە ريزاشىلىعىمىز شەكسىز», دەيدى رەسپۋبليكالىق «قۇسبەگىلىك» فەدەراتسياسىنىڭ ۆيتسە-پرەزيدەنتى باعدات مۇپتەكەقىزى.
ەرەسەكتەر, جاستار مەن جاسوسپىرىمدەر اراسىنداعى بۇل ىرىكتەۋ چەمپيوناتىنا اۋا رايىنىڭ قولايسىزدىعىنا قاراماستان, شالعايداعى رايىمبەك, كەگەن اۋداندارىمەن قاتار, ىرگەدەگى ەڭبەكشىقازاق, تالعار, ىلە, جامبىل, قاراساي اۋداندارىنان 50-گە جۋىق قۇسبەگى قاتىسىپ, ءوز مۇمكىندىكتەرىن سىنعا سالدى.
جاسوسپىرىمدەر اراسىندا ۇلتتىق سپورت مەكتەبىنىڭ وقۋشىلارى, اتاپ ايتساق, يتەلگى سالۋدان حانشەرەي قايرات ۇلى, قارشىعا سالۋدان جامبىل دوسىمجان, بۇركىتتەن ليمان اسقاربەك, ال جاستار اراسىندا بايەتباي ءومىرحان, مەدەت ءشالىپوۆ, دانيار مۇپتەكەەۆ سىندى ۇزدىكتەر انىقتالدى.
قولىنا قىران قۇستى قوندىرعان جاس بۋىننىڭ بابالار اماناتىنا ادالدىعى مەن ونى باپتاپ-باۋلۋداعى تالپىنىسى بولاشاعىنان زور ءۇمىت كۇتتىرەدى.
الماتى وبلىسى
