بيىل قالا بويىنشا 6,3 شاقىرىم جىلۋ جەلىسى اۋىستىرىلدى. مۇحامەدجانوۆ كوشەسىندەگى – 580 مەتر, ءسابيتوۆا كوشەسىندەگى – 460 مەتر, قارامەندە بي كوشەسىندەگى 470 مەتر جىلۋ قۇبىرلارى جوندەۋدەن وتكەن. اسىرەسە, بالقاشتىڭ ابۋعاليەۆ كوشەسىندەگى ماگيسترالدىق جىلۋ جەلىسى ابدەن توزعاندىقتان, اپات ءجيى ورىن الاتىن. ەندى مۇنداي اپات بولمايدى. سەبەبى بۇل ۋچاسكەدەگى قۇبىر تولىقتاي اۋىستىرىلدى.
جىلۋ بالقاشتا 3 قازاننان باستاپ, ساياق كەنتىندە 13 قازاننان باستاپ بەرىلگەن. قالاداعى №6, 7, 8, 9 جىلىتۋ قازاندىقتارى قالىپتى جۇمىس ىستەپ تۇر. كومىر قورى دا جەتكىلىكتى ەكەن. قالاداعى 9 ءبىلىم بەرۋ نىسانى, 11 دەنساۋلىق ساقتاۋ سالاسىنداعى مەكەمە مەن 593 تۇرعىن ءۇي تولىعىمەن جىلۋمەن قامتىلىپ وتىر.
ساياق كەنتىنىڭ جىلۋمەن جابدىقتاۋ جۇيەسىن رەكونسترۋكتسيالاۋ ءۇشىن رەسپۋبليكالىق بيۋدجەتتەن 500 ملن تەڭگە بولىنگەن. قازاندىقتارعا 9 جىلۋ الماستىرعىش اپپاراتى الىنىپ, ورناتىلعان. توزىعى جەتكەن 300 مەتر جىلۋ جەلىلەرى جوندەلگەن. «كومىر-Krg» جشس-مەن 86 ملن 86 مىڭ تەڭگەگە 6 020 توننا كومىر جەتكىزۋگە كەلىسىمشارت جاساسقان.
جىلىتۋ ماۋسىمىنىڭ تۇراقتى ءوتۋى ءۇشىن بالقاش قالاسى مەن ساياق كەنتىندە 138 ملن 250 مىڭ تەڭگە ءبولىندى. جوندەۋگە قوسىمشا ماتەريالدار جانە اپاتتىق قورعا ماتەريالدار ساتىپ الىندى.
«الەۋمەتتىك جەلىلەردە جىلۋمەن جابدىقتاۋ ساپاسى بويىنشا كوپتەگەن سۇراق بار. بارلىق ساۋال – مەنىڭ جەكە باقىلاۋىمدا. تۇرعىن ءۇي قاتىناستارى ءبولىمى تاۋلىك بويى جۇمىس ىستەيتىنىن جانە كەلىپ تۇسكەن وتىنىمدەر مەن وتىنىشتەردى پىسىقتايتىنىن اتاپ وتكىم كەلەدى. جىلۋ كوزى – بالقاش جەو جۇمىسىندا 4 قازاندىق اگرەگاتى جانە 4 تۋربوگەنەراتور بار. وتىن قورى مول. «بالقاش جىلۋ» جشس تنس قالا بويىنشا شتاتتىق رەجىمدە جۇمىس ىستەيدى, قىسىم مەن تەمپەراتۋرا رەجىمى جوسپارلى كورسەتكىشتەرگە سايكەس كەلەدى. جىلىتۋ ماۋسىمىنىڭ تۇراقتى ءوتۋ ماسەلەسى كۇندەلىكتى باقىلاۋدا», دەيدى قالا اكىمى ساپار ساتاەۆ.
بىلتىر جازدا پرەمەر-ءمينيستردىڭ ءبىرىنشى ورىنباسارى رومان سكليار بالقاش قالاسىنا ارنايى جۇمىس ساپارىمەن كەلىپ, جىلۋ ەلەكتر ورتالىعىنىڭ جۇمىس ساپاسىمەن تانىسىپ كەتكەن ەدى. جاڭا بەسىنشى قازاندىقتىڭ قۇرىلىسىن كورىپ كەتكەن-ءتىن. قازىر جىلۋ ماگيسترالىندە №5 قازاندىقتىڭ جەكەلەگەن شاعىن توراپتارىن مونتاجداۋ اياقتالۋعا جاقىن, جابدىق گيدراۆليكالىق سىناقتان جانە گاز-اۋا جولىنىڭ تىعىزدىعىن تەكسەرۋدەن وتەدى. بولاشاقتا قازاندىقتى ورناتۋ «Kazakhmys Energy» جشس بجەو جۇمىسىن جاقسارتىپ قانا قويماي, لاستاۋشى زاتتاردىڭ شىعارىندىلارىن ازايتۋعا ءتيىس. بۇل ەندى الداعى ۋاقىتتىڭ ەنشىسىندە. باستىسى, قازىر قالاداعى جىلۋ قالىپتى بەرىلىپ وتىر.
قاراعاندى وبلىسى,
بالقاش قالاسى
