سۋرەتتى تۇسىرگەن – جانگەلدى ابدىعالىم
«KZ Transit» 3D سكانەرلەۋ كاسىپورنىنا قىرعىزستاننان دا تاپسىرىس تۇسكەن. قىتايدىڭ «Ender» پرينتەرىنەن جاڭا عانا قۇيىلىپ شىققان قىرىقاياقتى قولىمىزعا الدىق. ماتەريالى قاتتى پلاستيكتەن. سالماعى جەڭىل دەمەسەڭىز, كۇشتەپ كورىپ ەدىك, بەرىكتىگى ەداۋىر. بۇل قىرعىز ەلىندەگى ەتيكەتكا شىعاراتىن زاۋىتتىڭ ستانوگىنە قاجەت بولشەك ەكەن. ستانوك شەتەلدىكى بولعان سوڭ الگىنى شارق ۇرىپ ىزدەپ تاپپاپتى. Instagram جەلىسىندەگى جارناما ارقىلى «KZ Transit» كاسىپورنىن كەزىكتىرىپ, سىنعان تۇپنۇسقاسىن جولداعان. ءبىز ءداپ وسى تاپسىرىس دايىن بولعاندا توپ ەتە قالىپپىز.
بۇل كاسىپورىنعا سىرت ەلدەن تۇسكەن العاشقى تاپسىرىس ەمەس. بۇعان دەيىن وزبەكستان ەلىنە كولىك جىلدامدىعىن ولشەيتىن قۇرىلعىنىڭ سىرتقى كورپۋسىن سكانەرلەپ, ونى قۇيىپ, سالىپ جىبەرگەن. وزبەك اعايىندار الگى بولشەكتىڭ دالمە-ءدال نۇسقاسىن تاپپاعان. ال مۇنداي مۇمكىندىك تەك قاراعاندىداعى «KZ Transit-تە» بارىن وزبەكتەر دە جارناما ارقىلى بىلگەن.
قاراعاندىداعى مەيرامحانالاردىڭ ءبىرىنىڭ قوجايىنى كوفەماشيناسىنىڭ سىنعان بولشەگىن قولىنا ۇستاپ, وسىندا الىپ كەلگەن. ماشيناسى يتاليالىق فيرمادان ەكەن. الگى زاتتى تاپسىرىسپەن الدىرتايىن دەسە, جەكە ساتىلىمدا جوق كورىنەدى. ءسويتىپ, مۇندا كەلىپ, ماسەلەسى وڭاي شەشىلەدى.
كاسىپورىن كەلەر جىلى رەسپۋبليكالىق پروتەزدىك-ورتوپەديالىق ورتالىقپەن بىرگە كەلىسىمشارتقا وتىرماق. قولىنىڭ كەمىستىگى بارلار وسىندا كەلىپ, جاساندى پلاستيكا جاساتىپ الا الادى. ازىرشە ەكى-ءۇش پاتسيەنت جۇگىنگەن. ءارى ول قولدى ارنايى باتىرمانى بۇراۋ ارقىلى اشىپ, جۇما الادى. ءتىپتى اياققا, شىنتاققا كيىلەتىن پروتەزدى دە ازىرلەي الادى. تازا پلاستيكتەن. سونىڭ بارلىق نۇسقاسىن جوعارىداعى ورتالىققا جولداعان. ال ولاردىڭ قىزىعۋشىلىعى ارتقان. بۇل – 3D سكانەرلەۋ ورتالىعىنىڭ مەديتسينا باعىتىنداعى جەتىستىگى.
3D سكانەرلەۋ ورتالىعى 100-گە جۋىق كومپانيامەن تىعىز جۇمىس ىستەپ جاتىر. ونىڭ ىشىندە ەلىمىزدەگى بانكتەر دە بار.
– بانكوماتتار مەن تەرمينالدار كوپتەگەن بولشەكتەن تۇرادى. ۇنەمى قولدانىستا بولعان سوڭ بۇزىلماي تۇرمايدى. ولاردىڭ قوسالقى بولشەگىن ەۋروپا, اقش, جاپونيا جانە كورەيا نارىققا شىعارادى. بىراق ول جاقتان الدىرتۋ اسا قىمباتقا شىعادى. ونىمەن قوسا, كوپ كۇتۋگە تۋرا كەلەدى. ال ءبىز الگى بولشەكتىڭ دالمە-ءدال نۇسقاسىن ساپالى ماتەريالدان ازىرلەپ بەرەمىز. ءارى ونى ءوزىمىزدىڭ تسيفرلىق قورىمىزدا ساقتايمىز. كەلەسى جولى تاپسىرىس بەرسە, سكانەرلەمەي-اق قوردا ساقتالعان ۇلگىسىن شىعارىپ, جەتكىزىپ بەرەمىز. بىرنەشە بانكپەن جۇمىس ىستەپ جاتىرمىز, – دەدى «Kz Transit» ديرەكتورى دانيل راششۋپكين.
ءداپ قازىر بانكوماتتىڭ كارتا قابىلدايتىن پلاستيكالىق بولىگىنىڭ بىرنەشە نۇسقاسىن ازىرلەنىپ جاتىر. تاپسىرىس بەرۋشىلەر الگىنىڭ تۇپنۇسقاسى كارتانى العاندا قولايسىز ەكەنىن ايتىپ, ءسال ىقشامداۋدى وتىنگەن. بۇل دا مۇنداعى ينجەنەرلەرگە اسا قيىندىق تۋدىرمايدى. 3D پرينتەر قالاعان پىشىندە قۇيىپ شىعارادى.
– «Shining» 3D سكانەرلەۋ اپپاراتى جوعارى دالدىكتەگى كوشىرمەنى ازىرلەيدى. اۋەلى وسىعان قاجەت ماكەتتى قويىپ, ونى سكانەرلەپ الامىز. سوسىن ماتەريال ءتۇرىن تاڭدايمىز دا, 3D پرينتەردى ىسكە قوسامىز. بەلگىلى ءبىر ۋاقىتتان سوڭ ءونىمىمىز دايىن بولادى. ءبىز دە قىتايدىڭ «Ender» فيرماسىنىڭ 10 پرينتەرى جانە رەسەيدىڭ «Picaso» اتتى ەكى پرينتەرى بار. ساپاسى دا مىقتى. تاپسىرىستى كەز كەلگەن ولشەمدە ازىرلەي الامىز. ەگەر پرينتەرگە سىيمايتىن كولەم بولسا, وندا ءونىمىمىزدى بولشەكتەپ الىپ, جەلىمدەپ, بىرىكتىرەمىز. بىزدەگى ماتەريالدار وتە بەرىك, – دەيدى كاسىپورىنداعى تەحنولوگيالىق ءوندىرىس تسەحىنىڭ باسشىسى ۆلاديسلاۆ شۋۆاەۆ.
تسەح باسشىسىنىڭ ءسوزىن مىنا تاپسىرىس ارقىلى قۋاتتاۋعا بولادى. «سۇڭقار» استىق كاسىپورنىنداعى روليكتى ستانوكتىڭ ۇلكەن قىرىقاياعى سىنىپ قالىپتى. بۇل بولشەك مۇلدەم وندىرىلمەيدى, نارىقتا دا جوق. «KZ Transit» ينجەنەر-تەحنولوگتەرى سىنعان قىرىقاياقتى جەلىمدەپ, سكانەرلەپ الىپ, نەيلون ماتەريالىنان ازىرلەگەن. 3D كوشىرمە تۇپ-تۋرا كەلە قالعان. ستانوك سارتىلداپ جۇمىس ىستەپ تۇر. مۇنى بىزگە كاسىپورىن باسشىسى وزىنە جولدانعان ۆيدەوەسەپتەن كورسەتتى.
تاعى ءبىر تاپسىرىس كومباين تەحنيكاسىنىڭ سۇزگى قورابىنا شاڭ وتكىزبەيتىن ماتەريالعا ءتۇسىپتى. ياعني دالا شاڭى قوراپتان ءوتىپ كەتىپ, سۇزگىنى بىتەي بەرەدى. مۇنداي كەدەرگىدەن سوڭ كومباين جۇمىسىن توقتاتۋعا ءماجبۇر بولادى. سويتسە, قوراپتىڭ شەتىندەگى رەزينالار توزعان. ول دا تاپتىرا قويمايدى. سول سەبەپتى رەزينانىڭ ءپىشىمىن سىزىپ, ارنايى قالىپقا سيليكون ماتەريالىن قۇيادى. بۇل رەزيناعا قاراعاندا الدەقايدا بەرىك ءارى شاڭ وتكىزبەيدى.
ماشينا جاساۋ, سانتەحنيكا, وندىرىسكە قاجەتتى جابدىقتار, سايماننىڭ ءتۇر-ءتۇرى, پروتەز, تاعى باسقا دا قاجەت زاتتىڭ بالاماسىن وسى ءبىر كاسىپورىن كوشىرىپ باسادى. العاشقىدا ءتۇرلى رەزينا وندىرۋمەن اينالىسقان «KZ Transit» IT تەحنولوگياعا دەن قويعانىنا جىل ءوتتى. سۇرانىس جوعارى.
– قازىر نە ءوتىمدى؟ ەلگە نە كەرەك؟ وسى سۇراققا جاۋاپ ىزدەدىك. ويلانا كەلە وسىعان سۇرانىستىڭ بارىن بىلدىك. سكانەر, پرينتەردىڭ دە ءتۇر-ءتۇرىن ابدەن زەرتتەپ بارىپ الدىق. ساپالىسىن تاڭدادىق. سوسىن كاسىپتىڭ كانىگى ماماندارىن ىزدەدىك. شىنىمەن قات. قىزىعۋشىلىعى بار, كرەاتيۆتى ويلايتىن جاستاردى تاۋىپ, ولاردى وقىتتىق. قازىر ۇجىمىمىزدا بەس IT ينجەنەر مامان بار. زاماناۋي قۇرىلعىلاردى تولىق يگەرىپ الدى. جالپى, 12 ادام ەڭبەك ەتەمىز. تاپسىرىس كولەمى ۇلعايىپ كەلە جاتىر. جارنامانى OLX.kz پلاتفورماسىنا, Instagram جەلىسىنە بەردىك. كليەنتتەر سول ارقىلى كوپ كەلەدى. ەندى وندىرىستىك اۋماعىمىزدى كەڭەيتپەكپىز. كۇن وتكەن سايىن تەحنولوگيا جاڭعىرىپ جاتىر. 5D سكانەرىن الساق دەپ وتىرمىز. ءۇي سالاتىن ءتۇرلى قۇرىلعىلار دا شىعىپتى. ۋاقىت وزدىرىپ الماي, سولاردى ويلاستىرىپ, جوباسىن ازىرلەپ ءجۇرمىز, – دەيدى د.راششۋپكين.
كاسىپورىن باسشىلىعى ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتى, قاراعاندى مەديتسينا ۋنيۆەرسيتەتى جانە قاراعاندى جوعارى پوليتەحنيكالىق كوللەدجىمەن كەلىسىم جاساسىپتى. ستۋدەنتتەر ەندى وسى جەردەن ءىس-تاجىريبەدەن وتەدى. ۇتقىر ويلىلارىن وسىندا جۇمىسقا الىپ قالۋعا نيەتتى.
راس, كاسىپورىننىڭ 3D تەحنولوگياسىن جولعا قويعاندارىنا جىل وتە قويعان جوق, ادىمدارى ادام تاڭعالدىرادى. قازىردىڭ وزىندە 100-دەن اسا ىرگەلى كومپانيامەن تىعىز جۇمىس ىستەپ وتىر. وندىرىستىك اۋقىمىن كەڭەيتۋ ارقىلى وركەنىن جايماقشى.
رەتى كەلگەندە ايتا كەتەلىك, قاراعاندى ايماعى تسيفرلىق باستامالاردى ەنگىزۋ بويىنشا ۇزدىك ۇشتىك قاتارىنان كورىنگەن. بۇل – 2022 جىلدىڭ قورىتىندىسى. ياعني IT سالادا الەۋەتىمىز اجەپتاۋىر. مۇنىڭ نەگىزگى ءبىر جەمىسى مىنادا دەپ توپشىلاۋعا تولىق بولادى: «تەرريكون القابىنىڭ» IT حاب جوباسى ءساتتى جۇزەگە اسىرىلعان. تسيفرلىق تەحنولوگيانىڭ ءتىلىن مەڭگەرگەن IT مەحانيكتەر, تالانتتار جينالىپ, يگىلىككە جارايتىن جاپ-جاقسى جوبالاردى جارىققا اكەلەدى. «Kz Transit» – cونىڭ ايقىن كورىنىسى. ەلىمىز بويىنشا 3D كوشىرمە جاسايتىن بۇل كاسىپورىن كوش باستاپ تۇر.
قاراعاندى وبلىسى
