وتانداستارىمىز ويلاپ تاپقان قىزمەت كاسىپورىندارعا تەز ارادا بىلىكتى قىزمەتكەر تابۋعا كومەكتەسەدى. وسىلايشا, جۇمىسشىلار تاپشىلىعى ماسەلەسىن شەشەدى. ال قىزمەتكەرلەر يكەمدى كەستە جانە اپتا سايىنعى جالاقى تولەمدەرى بار تولىق ەمەس جۇمىس كۇنىنە يە بولادى. ەكى جىل ىشىندە «ەasyTap» بيزنەس-مودەلى ءوزىنىڭ تيىمدىلىگىن دالەلدەدى. قازاقستاننىڭ 15 قالاسىندا كۇن سايىن قوسىمشانى 150 مىڭنان استام ادام پايدالانادى. پلاتفورماعا 70-تەن استام جاھاندىق جانە وتاندىق كومپانيا قوسىلعان. ولاردىڭ ىشىندە «Small», «Flip.kz», «Magnum Go», «Arbuz», «KFC», «Hardees», «Food Solutions», «Inditex», «Waikiki», «Kari», «Adidas», «Reebok», «Qazaq Republic» دۇكەندەرى جانە تاعى باسقالارى بار.
– الداعى ەكى جىلعا ارنالعان ستارتاپ ستراتەگياسىندا ورتالىق ازياعا شىعۋ بار. قازاقستاندا, قىرعىزستاندا سەرۆيستى دامىتىپ, وزبەك جانە تاجىك نارىعىندا جاقسى جەتىستىككە جەتكىمىز كەلەدى. وسى نارىقتاردىڭ بارلىعىنا ءبىز ءىزاشار بولامىز. نارىقتى ساعاتتىق قىزمەتكەرلەردى جالداۋدىڭ جاڭا تاسىلىنە ۇيرەتكىمىز كەلەدى. بىزدە كوپتەگەن سەرىكتەس بار. قوسىمشادا جۇمىس ىزدەگەن ادام ءۇشىن تاڭداۋ كوپ. كوبىنە ادامدار ەرەكشەلىككە ەمەس, تۇراقتىلىققا نازار اۋدارىپ, سەنىمدى جۇمىس بەرۋشىگە بارعاندى قالايدى, – دەدى سەرۆيستىڭ نەگىزىن قالاۋشى ماعزۇم تولەش.
«Financial Times» زەرتتەۋىنە سايكەس 2050 جىلعا قاراي ەڭبەككە قابىلەتتى حالىقتىڭ 83 پايىزى گيگ-ەكونوميكا سالاسىندا جۇمىس ىستەيتىن بولادى. ياعني شتاتتا ەمەس, بەلگىلەنگەن مەرزىمدە قويىلعان مىندەتتەردى شەشۋ قاجەت ناقتى جوبالاردا جۇمىس ىستەيدى. وسى بولجامدى ەسكەرە وتىرىپ, «EasyTap» قازىر مودەلدى بولشەك ساۋدا مەن قوناقۇي جانە تاماقتانۋ سەكتورىندا ىلگەرىلەتۋگە ۇمتىلىپ جاتىر. قىرعىزستان نارىعىنا شىعۋ وتاندىق ستارتاپتىڭ بيزنەستى جاھاندىق ماسشتابتاۋ جونىندەگى ستراتەگيانى ىسكە اسىرۋداعى العاشقى قادامى بولدى.
ولار نارىقتى زەرتتەپ, كوپتەگەن ماسەلەنىڭ بەتىن اشقان. دۇكەندەر مەن كافە, مەيرامحانالار كۇندەلىكتى جۇمىسشى ىزدەپ, سۇراۋ سالادى. ول ادام قايدان كەلسە دە, ولارعا ءبارىبىر. باستىسى كۇندەلىكتى جۇمىسىن ءتيىستى اتقارسا بولدى. ال بۇل پلاتفورمادا «Digital ID» قوسىلعان. ول – جەكە قۇجاتتى انىقتاۋعا ارنالعان جۇيە. جۇمىس ىزدەگەن ادام جەكە ماعلۇماتتارىن پايدالانۋعا رۇقسات بەرىپ, جاۋاپكەرشىلىك جونىندە كەلىسىمشارتقا قول قويادى.
قوسىمشانىڭ بەرەرى مول. اپتاسىنا 3 رەت جۇمىسقا شىعىپ, 7-8 ساعات جۇمىس ىستەسە, ورتا ەسەپپەن ايىنا 90 مىڭ تەڭگەدەن استام قارجى تابۋعا بولادى. اراسىندا تولىققاندى جۇمىس ىستەيتىندەر دە بار. ولار اپتاسىنا 200 مىڭ تەڭگەگە دەيىن تابادى. اقشا مەن ۋاقىتتان قىسىلىپ جۇرگەن جاندارعا بۇل – تاپتىرماس مۇمكىندىك.
– ءبىز بارلىعىن ساپالى جاساپ, تارتىپپەن جۇرگەندى قۇپ كورەمىز. ءبىزدىڭ ۇستانىمىمىز – تالاپ. ادەتتە تالاپتى جۇمىس بەرۋشى قويادى. سوعان ساي ءبىز ادامدى تاڭداۋعا كومەكتەسەمىز. بىزدە ءتۇرلى بازامەن كەلىسىم جاسالعان. سونىڭ ناتيجەسىندە ادامنىڭ قانداي قارىزى بولعانىن, نەسيە قارىزى بار-جوعىن انىقتاي الامىز. وعان قوسا كومپانيالار جاڭا كەلگەن قىزمەتكەردىڭ قابىلەتىن ەكى ساعات بويى تەكسەرىپ كورە الادى. سوسىن ۇنەمى ەكى جاقتان كەرى بايلانىس الىپ وتىرامىز. ستارتاپ بولعان سوڭ وزگەرىستەر مەن تولىقتىرۋلاردى ءجيى جاسايمىز, – دەيدى ماعزۇم.
