دەكرەتتىك تولەم مەن بالاعا بەرىلەتىن جاردەماقى كولەمى ارتتى

2023 جىلى 1 اەك - 3 450 تەڭگە بولسا, بيىل بۇل كورسەتكىش - 3 692 تەڭگە دەپ بەلگىلەندى. 

وسىعان بايلانىستى ەل ازاماتتارىنا بەرىلەتىن بىرقاتار جاردەماقى مەن تولەم كولەمى ارتتى. بۇل قاتاردا دەكرەتتىك تولەمدەر مەن بالا 1,5 جاسقا جەتكەنگە دەيىن تولەنەتىن مەملەكەتتىك-الەۋمەتتىك جاردەماقى دا بار.

جۇكتى انا بوسانعان سوڭ تاعايىندالاتىن جاردەماقىنىڭ ەكى ءتۇرى بەكىتىلگەن. العاشقىسى — ءسۇيىنشىپۇل. تولەمنىڭ اتالعان ءتۇرى ءبىر رەت قانا بەرىلەدى. 2024 جىلى 1 اەك 3 692 تەڭگەگە ءوستى. سوعان ساي, جاردەماقى جيىنى دا ارتتى. اتاپ ايتقاندا, العاشقى ءۇش بالاعا — 38 اەك (140 296 تەڭگە), ءتورت بالادان باستاپ — 63 اەك (232 596 تەڭگە) كورسەتكىش كولەمىندە تولەم جاسالادى.

ال ەكىنشى ءتۇرى — انانىڭ تابىسىنان ايىرىلۋىنا بايلانىستى 1,5 جىل بويى تولەنەتىن جاردەماقى. ونىڭ مولشەرى جۇمىس ىستەپ دەكرەتكە شىققان جانە بۇل ساناتقا جاتپايتىن ءار ايەلدە ءار ءتۇرلى ەسەپتەلەدى. جۇمىس ىستەمەيتىن ايەلدەرگە مەملەكەت تاراپىنان بەرىلەتىن جاردەماقى تۇراقتى بەكىتىلگەن. 

• ءبىرىنشى بالاعا — 5,76 اەك (2024 جىلى اي سايىن 21 265 تەڭگە);
• ەكىنشى بالاعا — 6,81 اەك (2024 جىلى اي سايىن 25 142 تەڭگە);
• ءۇشىنشى بالاعا — 7,85 اەك (2024 جىلى اي سايىن 28 982 تەڭگە);
• ءتورت بالادان ءارى قاراي — 8,90 اەك (2024 جىلى اي سايىن 32 858 تەڭگە)

جۇمىس ىستەپ, دەكرەتكە شىققان ايەلدەرگە تاعايىندالاتىن جاردەماقىنىڭ وسى ءتۇرى ونىڭ كەيىنگى ەكى جىلداعى تابىسىنا قاراي ەسەپتەلەدى.