فوتو: liter.kz
ا.راۋ مەن ە.سمىشلياەۆا رۋدنىي قالاسىنداعى «سوكولوۆسكايا» كەنىشىندە بولدى. كەنشىلەرمەن اڭگىمەلەسۋ بارىسىندا ماجىلىسمەندەر قاۋىپتى ەڭبەك جاعدايىندا جۇمىس ىستەيتىن ادامداردى الەۋمەتتىك قورعاۋ ماسەلەلەرىن قاراستىراتىن جاڭا زاڭعا توقتالدى.
ءماجىلىستىڭ ۆيتسە-سپيكەرى ا.راۋدىڭ ايتۋىنشا, ەندى زياندى وندىرىستە جۇمىس ىستەيتىن قىزمەتكەر 55 جاسقا تولعاندا ەڭبەك شارتىن بۇزۋعا جانە 63 جاستا زەينەتكە شىققانعا دەيىن ارنايى تولەمدەر الۋعا قۇقىلى. بارلىعى 4 تولەم بار, ولار ءارتۇرلى كوزدەن قارجىلاندىرىلادى. تولەمدەرگە تابىس سالىعى سالىنبايدى.
«وتكەن جىلى سايلاۋ بارىسىندا «Amanat» پارتياسىنىڭ كانديداتتارى سىزدەرمەن كەزدەسكەن ەدى, سوندا وسى سۇراق قوزعالعان بولاتىن. ونەركاسىپتىك ءوندىرىس قىزمەتكەرلەرىنىڭ زەينەتكەرلىك جاسى تومەندەي مە؟ بۇگىن ءبىز سىزدەرگە جاقسى جاڭالىقپەن كەلىپ وتىرمىز. 2024 جىلدىڭ 1 قاڭتارىنان باستاپ زياندى وندىرىستەگى جۇمىسشىلاردىڭ زەينەتكەرلىك جاسىن, ەگەر ولار بۇدان بىلاي بۇل وندىرىستە جۇمىس ىستەمەسە, 55 جاسقا دەيىن قىسقارتۋ تۋرالى زاڭ كۇشىنە ەندى. ياعني ولار جۇمىستان شىعۋى نەمەسە جەڭىلىرەك جۇمىسقا اۋىسۋى كەرەك. سونداي-اق 55 جاستان زەينەتكە شىققاندارعا ارنايى الەۋمەتتىك تولەمدەر تولەنەدى. تولەمدەر ءتورت كوزدەن: رەسپۋبليكالىق بيۋدجەتتەن, جۇمىس بەرۋشىنىڭ قاراجاتىنان, ءومىردى ساقتاندىرۋ كومپانياسىنىڭ قاراجاتىنان جانە مىندەتتى جارنالار ەسەبىنەن تولەنەدى», دەدى ا.راۋ.
زەينەتكە شىعۋ جانە قاجەتتى تولەمدەردى الۋ ءۇشىن قىزمەتكەر جۇمىس بەرۋشىگە 55 جاسقا تولۋىنا بايلانىستى ەڭبەك شارتىن بۇزاتىندىعى تۋرالى ءوتىنىش بەرۋى كەرەك. بۇل رەتتە كەمىندە 7 جىل مىندەتتى كاسىپتىك زەينەتاقى جارنالارى بولۋى قاجەت.
جەتى كۇن ىشىندە جۇمىس بەرۋشى مەن ساقتاندىرۋ كومپانياسى مەملەكەتتىك كورپوراتسيانىڭ ەسەپ ايىرىسۋ شوتىنا ەڭ تومەنگى كۇنكورىس دەڭگەيىن اۋدارۋعا ءتيىس. سول شوتقا جيناقتاۋشى زەينەتاقى قورى مەن رەسپۋبليكالىق بيۋدجەت تولەمدەرى تۇسەدى. ياعني بارلىق سوما ءبىر كۇندە اۋدارىلادى. بارلىعى تىكەلەي «مەملەكەتتىك كورپوراتسيا» كەاق ارقىلى تولەنەتىن بولادى.
قىزمەتكەر 63 جاسقا تولعاننان كەيىن زەينەتاقى قورىنان تولەنەتىن تولەمدەرگە بازالىق جانە ىنتىماقتى زەينەتاقى قوسىلادى, ال رەسپۋبليكالىق بيۋدجەتتەن, جۇمىس بەرۋشىلەر مەن ساقتاندىرۋ كومپانيالارىنان تولەمدەر توقتاتىلادى. ەگەر قىزمەتكەر ءوزىن جاقسى سەزىنسە, ول وندىرىستە جۇمىسىن جالعاستىرا الادى, ونى جۇمىستان شىعارۋعا ەشكىمنىڭ قۇقىعى جوق.
«قىزمەتكەر لايىقتى دەمالىسىنا نەمەسە كاسىبىن وزگەرتۋگە – جەڭىل جۇمىسقا اۋىسۋعا مۇمكىندىك الادى. وسى جاسقا ارنالعان بىرنەشە الەۋمەتتىك باعدارلاما كومەكتەسە الادى. مىسالى, «ۇرپاقتار كەلىسىمى» باعدارلاماسى, ەگەر ونىڭ ورنىن اۋىستىراتىن بولاشاق قىزمەتكەردى وقىتۋ مۇمكىن بولسا جانە «كۇمىس عاسىر» – باسقا ماماندىققا قايتا دايارلاۋ بويىنشا مەملەكەت جۇمىس ورنىن سۋبسيديالاۋعا كومەكتەسەدى, ال الەۋەتتى قىزمەتكەر بارلىق تولەمنەن باسقا اقشا تابا الادى», دەپ اتاپ ءوتتى ەكاتەرينا سمىشلياەۆا.
ءماجىلىس دەپۋتاتتارى جۇمىس ساپارى بارىسىندا «كاچار رۋدا» اق قىزمەتكەرلەرىمەن جانە كاسىپوداق بەلسەندىلەرىمەن دە كەزدەستى.
قوستاناي وبلىسى
