كەشە ماجىلىسمەندەر ا.قالىقوۆ, ءۇ.شاپاق, ب.سماعۇلوۆ, ت.ادامبەكوۆ جانە ن.شاتالوۆ №2 ءوندىرىس «قۇرىلىسمەت» جشس (نومم زاۋىتى) ۇجىمىمەن كەزدەستى. كاسىپورىن شاحتا جابدىقتارىن, ەلەكتر دانەكەرلەنگەن بولات قۇبىرلاردى شىعارادى. كاسىپورىن قىزمەتكەرلەرىنىڭ سانى 500 ادامنان اسادى.
كەزدەسۋدىڭ نەگىزگى ماقساتى – مەملەكەت باسشىسىنىڭ رەفورمالارىن ورىنداۋ بويىنشا اقپاراتتىق جۇمىس, سونداي-اق «Amanat» پارتياسىنىڭ سايلاۋالدى باعدارلاماسىنىڭ جول كارتاسىنىڭ پۋنكتتەرىن ورىندالۋىن ىسكە اسىرۋ.
كەزدەسۋدە تازارتۋ قۇرىلىستارىن جاڭارتۋ, ءوندىرىستى جاڭعىرتۋ, كاسىپورىنداعى ەسكىرگەن جابدىقتاردى جاڭارتۋ, جۇمىسشى ماماندىقتارىنىڭ مارتەبەسىن ارتتىرۋ جانە الەۋمەتتىك ماسەلەلەر كوتەرىلدى.
ماسەلەن, كەزدەسۋ بارىسىندا شاحتينسك قالالىق ءماسليحاتىنىڭ دەپۋتاتى ماقسات توقانوۆ قالاداعى تازارتۋ قۇرىلىستارى بويىنشا بىرقاتار ماسەلە بار ەكەنىن ايتىپ: «قازىرگى كەزدەگى قۇرىلىمدار ەسكىرگەن جانە ەندى پايدالانۋعا جارامسىز. سىزدەن رەسپۋبليكالىق قولداۋ سۇرايمىز», دەدى.
«بۇل ماسەلە تەك ءسىزدىڭ ايماعىڭىزدا ەمەس, اقتوعاي اۋدانى مەن بالقاش قالاسىنداعى سارىشاعان قالاسىندا دا بار. بۇگىنگى تاڭدا جاۋاپتى ورىنداۋشى جاڭعىرتۋ جوسپارىنا سايكەس الدىن الا تقك جۇرگىزدى, جسق ازىرلەندى, 1,2 ملرد تەڭگە كولەمىندە بيۋدجەت ءبولىندى. سۇراعىڭىزدى باقىلاۋعا الىپ, ماسەلەنىڭ شەشىمىن تابۋىن سوڭىنا دەيىن قاداعالايمىز», دەپ سەندىردى دەپۋتات باۋىرجان سماعۇلوۆ.
ماجىلىسمەندەر بەتپە-بەت اڭگىمە بارىسىندا قويىلعان بارلىق سۇراققا جاۋاپ بەرۋگە تىرىستى. ءوز كەزەگىندە كاسىپورىن قىزمەتكەرلەرى كەرى بايلانىس ءۇشىن العىستارىن ءبىلدىرىپ, الدىڭعى كەزدەسۋلەردە كوتەرىلگەن ماسەلەلەر مەن وزەكتى سۇراقتاردى ەسىنە الدى. وڭ شەشىلگەن سۇراقتار دا بار, مىسالى, سول كەزدە كوتەرىلگەن اۆتوپاركتى جاڭارتۋ جانە مارشرۋتتاردى ۇلعايتۋ ماسەلەسى تولىق قولعا الىنعان.
قاراعاندى وبلىسى
