«ۆاكتسينا الماعان ادامدار اراسىندا تۇماۋدىڭ (ا3) زەرتحانالىق راستالعان 28 جاعدايى تىركەلدى. ونىڭ 11-ءى – 14 جاسقا تولماعان بالالار. سونىمەن قاتار ايماقتا تۇماۋ ەمەس ۆيرۋستار بار. ولاردىڭ ۇلەسى زەرتتەلگەن 624 سىنامانىڭ 34%-ىن قۇرايدى. رينوۆيرۋس –50%, رەسپيراتورلىق-سەنتسيتيالدى ۆيرۋس – 14% جانە پاراگريپپ – 9%», دەدى وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى يۋري زالىگين.
تۇماۋ – اۋا ارقىلى تارالاتىن جەدەل ۆيرۋس. كەيدە ەپيدەميا نەمەسە پاندەميا سيپاتىن يەلەنۋى مۇمكىن دەگەندى ايتادى مەديتسينا ماماندارى. بۇل تۇماۋ پنەۆمونيا, برونحيت, جۇرەك, بۇيرەك, ميدىڭ جانە باسقا اعزالاردىڭ زاقىمدانۋىنا جانە سوزىلمالى اۋرۋمەن اۋىراتىن ادامداردىڭ ولىمىنە اكەلىپ سوعۋى دا ابدەن مۇمكىن.
مامانداردىڭ ايتۋىنشا, تۇماۋدىڭ العاشقى بەلگىلەرى اعزاعا تۇسكەن ۆيرۋس بولشەكتەرىنىڭ سانىنا, ونىڭ تۇرىنە, ادامنىڭ يممۋندىق جۇيەسىنە بايلانىستى. اۋرۋ بىرنەشە ساعاتتان 2-4 كۇنگە دەيىن سوزىلاتىن ينكۋباتسيالىق كەزەڭنەن باستالادى. دەنە قىزۋى 3-5 كۇن بويى تۇسپەسە, اۋىرسىنۋدى باساتىن دارىلەردى قابىلداعاننان كەيىن دە باسىلمايتىن قاتتى باس اۋرۋى, سونداي-اق ەنتىگۋ, سانانىڭ بۇزىلۋى, گەمورراگيالىق بورتپەلەر شىقسا, جەدەل مەديتسينالىق كومەككە جۇگىنۋى ءجون ەكەن.
دەپارتامەنت باسشىسى يۋ.زالىگيننىڭ ايتۋىنشا, بالالار, جۇكتى ايەلدەر, سوزىلمالى اۋرۋلارى بار ادامدار, مەديتسينا قىزمەتكەرلەرى, جابىق مەكەمەلەردىڭ كونتينگەنتى (بالالار ءۇيى, قارتتار ءۇيى جانە باسقا) – اۋىرۋ ىقتيمالدىعى جوعارى ورتا. سوندىقتان ءبىرىنشى كەزەكتە تۇماۋعا قارسى ۆاكتسينا سالۋ قولعا الىنادى.
«قازىرگى ۋاقىتتا تاۋەكەل توبىنداعى ادامداردى تۇماۋعا قارسى ۆاكتسينالاۋ اياقتالدى. وبلىس تۇرعىندارىنىڭ 14,5%-ى قامتىلدى. تۇماۋعا قارسى بارلىعى 176 310 ادام, ونىڭ ىشىندە اقىلى نەگىزدە جانە جۇمىس بەرۋشىلەردىڭ قاراجاتى ەسەبىنەن 3 310 ادام ەكپە الدى», دەيدى يۋ.لەونيدوۆيچ.
ول ادام كوپ جينالاتىن جەرلەردە, اسىرەسە جابىق ءۇي-جايلاردا ۇزاق بولماۋعا, ونداي جەرلەردە بەتپەردە تاعۋعا كەڭەس بەرەدى.
«اۋىرىپ تۇرعان اداممەن بايلانىستى شەكتەۋ, جوتەل ەتيكەتىن ساقتاۋ, قولدى سابىنمەن ءجيى جانە مۇقيات جۋ, بولمەدە ىلعالدى تازالاۋ جۇمىستارىن جۇرگىزۋ, جەلدەتۋ, قۇرامىندا س دارۋمەنى بار تاعامداردى مۇمكىندىگىنشە كوپ تۇتىنۋ قاجەت. ءوزىن ءوزى ەمدەۋدەن اۋلاق بولىپ, ۋاقتىلى مەديتسينالىق كومەككە جۇگىنۋ كەرەك», دەيدى ۆەدومستۆو باسشىسى.
قاراعاندى وبلىسى
