قازاقتىڭ سەكىرتپە كۇيىن شەبەر ورىنداعان جاس ورەندەردىڭ ونەرىن شەتەلدىك قازىلار ەرەكشە ىقىلاسپەن باعالاعان.
«وقۋشىلارىم ونەر كورسەتىپ بولعاننان كەيىن شەتەلدىك قازىلار جانىمىزعا كەلىپ, تاڭدانىستارىن جەتكىزدى. ۇلتتىق اسپاپتى قولدارىنا ۇستاپ, شەرتىپ كوردى. دومبىرانىڭ ۇنىنە تامسانىپ, ءبىراز تۇردى. ونەرىمىزگە جوعارى باعا بەردى. كەۋدەمىزدى ماقتانىش كەرنەدى. ەندى ەۋروپادا وتەتىن حالىقارالىق بايقاۋعا قاتىسۋدى كوزدەپ وتىرمىز», دەيدى دومبىرا ۇيىرمەسىنىڭ مۇعالىمى جانىبەك قازىبەك ۇلى.
حالىقارالىق بايقاۋعا تۇركيا مەن قىرعىزستاننىڭ دا ونەرپازدارى قاتىسىپتى. قاراعاندىلىق جاس كۇيشىلەر ۇلكەن ساحنادا ونەر كورسەتىپ, باق تالاستىرۋ وڭايعا تۇسپەگەنىن ايتادى. ونەرپازداردىڭ ىشىندەگى توكەن بايجىگىتتىڭ دومبىرا ۇيىرمەسىنە قاتىسقانىنا ءبىر جىل عانا بولعان. تالپىنىسى تاڭداي قاقتىرعان. مىنە, دۋبايداعى ۇلكەن دودادا باق سىناپ وتىر.
– مەن دۋبايدا وتكەن بايقاۋدا قاتتى قوبالجىدىم. باس جۇلدە العاندا قاتتى قۋاندىم. ارينە, ءبىراز ەڭبەكتەندىك. ەڭبەگىمىز اقتالدى. وسىنداي حالىقارالىق دەڭگەيدە ونەر كورسەتۋ وڭاي ەمەس. ءارى قاراي دا شەبەرلىگىمدى شىڭدايمىن. مۇعالىمدەردەن ءبارىن ۇيرەنىپ, ساحنا تورىندە جارقىراعىم كەلەدى, – دەدى جاس كۇيشى.
ولجالى ورالعان جاس كۇيشىلەر ءانسامبلى الداعى ۋاقىتتا بولاتىن باسقا دا حالىقارالىق بايقاۋلارعا دايىندىقتارىن جالعاستىرماق. رەپەرتۋارلارىن جاڭعىرتىپ, جاڭا كومپوزيتسيالار قوسپاق.
قاراعاندى وبلىسى
