جۋىردا ورتالىق كوممۋنيكاتسيالار قىزمەتىندە وتكەن بريفينگتە قورعانىس ءمينيسترىنىڭ ورىنباسارى, گەنەرال-لەيتەنانت سۇلتان كامالەتدينوۆ قارۋلى كۇشتەردىڭ وتكەن جىلعى قىزمەتىن قورىتىندىلادى. ونىڭ ايتۋىنشا, وتكەن جىلدىڭ ماڭىزدى وقيعاسى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ توراعالىعىمەن وتكەن بۇكىلارميالىق كەڭەس.
«پرەزيدەنتتىڭ باسشىلىعىمەن وتكەن «باتىل تويتارىس» ستراتەگيالىق كوماندالىق-شتابتىق وقۋ-جاتتىعۋى اسكەرلەردىڭ جاۋىنگەرلىك دايىندىعىنىڭ شەشۋشى كەزەڭى بولدى. قارۋلى كۇشتەر تاريحىندا تۇڭعىش رەت جوعارعى باس قولباسشىلىقتىڭ, سوعىس ۋاقىتىنداعى ۇكىمەت پەن وبلىستاردىڭ قورعانىس كەڭەستەرىنىڭ ەكونوميكالىق قىزمەتتى جانە حالىقتىڭ ومىرلىك قاجەتتىلىكتەرىن قامتاماسىز ەتۋ جونىندەگى ستاۆكاسىن ورىستەتۋ ماسەلەلەرى پىسىقتالدى», دەپ اتاپ ءوتتى ءمينيستردىڭ ورىنباسارى. ونىڭ ايتۋىنشا, ەلىمىزدىڭ قارۋلى كۇشتەرى بولىمشەلەرى جەكە قۇرامىنىڭ دالالىق ءبىلىمىن ارتتىرۋ جانە جاۋىنگەرلىك ۇيلەستىرۋ ماقساتىندا مىڭعا جۋىق وقۋ-جاتتىعۋ, جاۋىنگەرلىك ماشينالاردى جۇرگىزۋ بويىنشا 16 مىڭنان استام ساباق, 40 مىڭنان استام جاۋىنگەرلىك اتىس وتكەن. بۇنىمەن قوسا ول ەلىمىزدە 6 حالىقارالىق وقۋ-جاتتىعۋ وتكىزىلگەنىن جانە ءبىزدىڭ اسكەري قىزمەتشىلەرىمىز باسقا ەلدەردىڭ اۋماعىندا وتكەن 24 وقۋ-جاتتىعۋ مەن جارىسقا قاتىسقانىن ايتتى.
مەملەكەت باسشىسىنىڭ تاپسىرماسىن ورىنداۋ ماقساتىمەن بىتىمگەرلىك قىزمەتتىڭ گەوگرافياسى كەڭەيتىلدى. قازاقستان كونتينگەنتىنىڭ ليۆانداعى بۇۇ ميسسياسىندا, باتىس ساحاراداعى, ورتالىق افريكا رەسپۋبليكاسىنداعى جانە كونگوداعى شتاب وفيتسەرلەرىنىڭ روتاتسيالارى جۇرگىزىلدى. ۇلتتىق كونتينگەنتتى كەلەسى جىلى گولان بيىكتىگىندە «بۇۇ-نىڭ ءبولىنۋدى باقىلاۋ كۇشتەرى» ميسسياسىنا جىبەرۋ بويىنشا جۇمىستار اتقارىلىپ جاتىر.
پرەزيدەنتتىڭ جارلىعىمەن قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ قىزمەتشىلەرى ءۇشىن بىرىڭعاي دالالىق كيىم نىسانى ەنگىزىلدى. جاڭا ۇلگىدەگى دالالىق كيىم-كەشەككە 2024 جىلدىڭ ءتورتىنشى توقسانىندا, قالعان نىساندى كيىمدەرگە ءۇش جىل ىشىندە كوشۋ جوسپارلانعان.
اسكەري مىندەتتىلەر مەن اسكەرگە شاقىرىلۋشىلاردىڭ ەسەبى تسيفرلىق فورماتقا اۋىستىرىلدى. اسكەري مىندەتتىلىكتىڭ مارتەبەسى جانە اسكەري ەسەپكە الۋ تۋرالى دەرەكتەر eGov پايدالانۋشىسىنىڭ جەكە كابينەتىندە كورسەتىلەدى.
«مەرزىمدى اسكەري قىزمەتتىڭ بەدەلىن ارتتىرۋ ماقساتىندا زاپاسقا شىعارىلعان ساربازدارعا جوعارى وقۋ ورىندارىنان ءۇش مىڭ تەگىن ورىن ءبولىندى. ەكىنشى دەڭگەيدەگى بانكتەرمەن ساربازدارعا «نەسيەلىك كانيكۋل» بەرۋ تۋرالى ماسەلە پىسىقتالدى. بۇگىنگى تاڭدا مەرزىمدى قىزمەتتەگى 5 مىڭنان استام اسكەري قىزمەتشىنىڭ نەسيە بويىنشا 1 ملرد 875 ملن تەڭگە بەرەشەگى كەيىنگە قالدىرىلدى. قىزمەت وتكەرگەن ازاماتتار ءۇشىن ءبىلىم بەرۋ جەڭىلدىكتەرى دە قولدانىلادى», دەدى سپيكەر.
ۇكىمەت قاۋلىسىمەن جاستاردى 2030 جىلعا دەيىن اسكەري-پاتريوتتىق تاربيەلەۋ تۇجىرىمداماسى بەكىتىلدى. بۇگىنگى تاڭدا ەلىمىزدە سەگىز مىڭنان استام اسكەري-پاتريوتتىق كلۋب, «جاس سارباز» سىنىپتارى جانە «Smart sarbaz» ۇيىرمەلەرى جۇمىس ىستەيدى. وعان 280 مىڭنان استام بالا مەن ءجاسوسپىرىم تارتىلعان.
ءمينيستردىڭ ورىنباسارى بيىل قورعانىس ۆەدومستۆوسىنىڭ كۇش-جىگەرى ارنايى وپەراتسيالار كۇشتەرى مەن اۋماقتىق اسكەرلەردى دامىتۋعا, اسكەري-وقىتىلعان رەزەرۆتىڭ ۇلەسىن ۇلعايتۋعا, ارميانىڭ ۇتقىر مۇمكىندىكتەرىن كەڭەيتۋگە, ۆەدومستۆوارالىق ۇيلەستىرۋدى جاقسارتۋعا, ارميانى جوسپارلى قايتا جاراقتاندىرۋعا جانە وتاندىق قورعانىس-ونەركاسىپ كەشەنىن دامىتۋعا باعىتتالاتىنىن اتاپ ءوتتى.
