تاعىلىمى مول كەشكە ىبىراي اشقان تورعاي مەكتەبىنىڭ تۇلەگى, بەلگىلى عالىم, جاھاندىق سۋ ارىپتەستىگىنىڭ قازاقستانداعى توراعاسى ناريمان قىپشاقباي ۇلى دا ارنايى كەلىپ, تۇڭعىش مەكتەپتىڭ تاريحى جايىندا قىزىقتى ەستەلىكتەر ايتتى. عالىم ىبىراي التىنسارين مۋزەيىنە جەكە زاتتارى مەن زەرتتەۋ ەڭبەكتەرىن تابىس ەتتى.
ءىس-شارا بارىسىندا ى.التىنسارين اتىنداعى مامانداندىرىلعان مەكتەپ-گيمنازيا ينتەرناتى وقۋشىلارىنان قۇرالعان حور «ىبىراي شاكىرتتەرىنىڭ مارشى» ءانىن ورىندادى. مەكتەپ تاريحى جايىندا دەرەكتى فيلمدەردەن ءۇزىندى كورسەتىلىپ, ىبىراي مەكتەبىنەن تۇلەپ ۇشقان بەلگىلى قايراتكەر تۇلعالار تۋرالى ايتىلدى.
اتالعان كەشتە تورعايدا اشىلعان تۇڭعىش مەكتەپتەن تۇلەپ ۇشقان ءار سالانىڭ مايتالمان ماماندارى, وڭىرگە بەلگىلى عالىمدار مەن ۇستازدار دا ءسوز الدى. كوپ جىل بويى تورعاي مەكتەبىندە باسشىلىق قىزمەت اتقارعان ارداگەر ۇستاز, قازاقستان حالىق اعارتۋ ءىسىنىڭ ۇزدىگى سۇلتانعالي الماعامبەت ۇلى مۋزەي ۇجىمىنا ىبىراي مەكتەبى تۋرالى ەستەلىك كىتابى مەن تۇڭعىش ءبىلىم ورداسىنىڭ تاريحىنا قاتىستى قۇندى قۇجاتتاردى تارتۋ ەتتى.
قوستاناي وبلىسى
