سۋرەتتى تۇسىرگەن – ەرلان ومار, «EQ»
بيىلعى ماۋسىمدا الماتىلىقتار ءۇشىن العاش ەسىگىن اشقان الىپ سىرعاناۋ ايدىنى اباي الاڭىندا ورىن تەپكەن. سونىمەن قاتار 28 پانفيلوۆشىلار ساياباعىندا, تۇڭعىش پرەزيدەنت پاركىندە, ورتالىق ستاديون مەن م.اۋەزوۆ تەاترىنىڭ الدىندا, گۇلدەر ساياباعى مەن وقۋشىلار ءۇيىنىڭ ماڭىندا سىرعاناۋ ورىندارى ءتۇن جارىمىنا دەيىن ۇزدىكسىز جۇمىس ىستەپ تۇر. قالا تۇرعىندارى مەن مەگاپوليس قوناقتارى مۇندا قالاعان ۋاقىتىندا سىرعاناق تەۋىپ, سەرگي الادى. ءتىپتى مۇنداعى ارناۋلى نۇسقاۋشىلار كەلۋشىلەرگە تەگىن كەڭەس بەرىپ, قىزمەت كورسەتەدى. الداعى كۇندەرى دە قالانىڭ بىرنەشە نۇكتەسىنەن وسىنداي سىرعاناقتار اشىلماق.
دەمالۋشىلار وزىمەن بىرگە كونكيلەرىن الا كەلۋگە ءتيىس. سونداي-اق سىرعاناق الاڭدارىنىڭ ماڭىندا تاماقتانۋعا ارنالعان ارناۋلى ورىندار مەن كونكيلەردى جالعا بەرۋ ورتالىقتارى جۇمىس ىستەيدى. ۇيىمداستىرۋشىلار جالعا بەرۋ باعاسى قولجەتىمدى بولۋى ءاردايىم قاداعالانىپ وتىراتىنىن ايتادى.
مۇزايدىندارى الماتىنىڭ مىڭ قۇبىلعان اۋا رايىنا ورايلاستىرىلعان. كۇن رايى 10 گرادۋسقا دەيىن جىلىسا دا, سىرعاناق ەرىمەيدى. ياعني الاڭداردىڭ ارناۋلى توڭازىتقىش قۇرالى مۇزدى ەرىتپەۋگە قولايلى تەمپەراتۋرانى قامتاماسىز ەتە الادى. قالا جۇرتشىلىعىنا قۋانىش سىيلاعان الەۋمەتتىك جوبانى جۇزەگە اسىرۋعا جەرگىلىكتى اكىمدىك مۇرىندىق بولعان.
«ويىن-ساۋىق ورتالىقتارىنداعى مۇزايدىندارىنا بارعاندا ءبىراز شىعىندالاتىنبىز. بىلتىردان بەرى وسى تەگىن سىرعاناق الاڭدارىنا كەلەتىن بولدىم. بۇل دا قاراپايىم تۇرعىندار مەن ستۋدەنت جاستارعا جاسالعان ۇلكەن كومەك دەپ ەسەپتەيمىن», دەيدى قالا تۇرعىنى ماقسات دۇيسەن.
سىرعاناق الاڭدارىنىڭ ەسىگى كوكتەمنىڭ العاشقى ايىنا دەيىن اشىق.
الماتى
