«9 قاڭتار كۇنى ساعات 9:58-دە استانا قالاسى تجد ءورت ءسوندىرۋ بولىمشەلەرى قابانباي باتىر داڭعىلى, 59 مەكەنجايىنداعى پاتەردەگى ءورت تۋرالى حابارلاماعا اتتاندى. وندا «بۋداپەشت» تۇرعىن ءۇي كەشەنىنىڭ 10 قاباتىنداعى پاتەردىڭ اس ءۇي بولمەسىندە جيھاز بەن ءۇي زاتتارى جانعانى انىقتالدى», دەپ باياندادى استانالىق تجد ءباسپاسوز قىزمەتى.
وقيعاعا استانا قالاسى تجد جەكە قۇرامىنىڭ 28 ادامى مەن 7 دانا تەحنيكاسى جۇمىلدىرىلدى. ولار كورشى پاتەردەن 7 ادامدى, ونىڭ ىشىندە 3 بالانى قۇتقاردى. وسىلايشا, ءورت ساعات 10.32-دە وقشاۋلانىپ, ساعات 10.35-تە تولىق ءسوندىرىلدى.
«قۇتقارۋشىلار ءورت ءسوندىرۋ تەحنيكاسى ءۇشىن جولدىڭ جابىلۋى, جەكە اۆتوكولىكتەردىڭ كوپتەپ تۇراققا قويىلۋى ماسەلەلەرىنە تاپ بولدى. وسىعان بايلانىستى تجد اۆتوكولىكتەردى كىرمە جولداردا قالدىرماۋدى, تۇراق نەمەسە تۇراق ءۇشىن ورىن تاڭداۋدى, ارنايى تەحنيكانىڭ ءوتۋى ءۇشىن بوس ورىن قالدىرۋدى ەسكەرتەدى. ويتكەنى ءار سەكۋند پەن مينۋت بىرەۋدىڭ ءومىرى مەن مۇلكىن ساقتاۋعا مۇمكىندىك بەرەدى», دەيدى توتەنشە جاعدايلار دەپارتامەنتىنىڭ وكىلدەرى.
