«قازىرگى كەزدە ەلىمىزدىڭ 8,5 ملن تۇرعىنى بانكتەر مەن ميكرونەسيە ۇيىمدارىنىڭ الدىندا 18 ترلن تەڭگەگە قارىز بولسا, ونىڭ 13 ترلن تەڭگەسى – تۇتىنۋشىلىق نەسيەلەر. وكىنىشكە قاراي, قارىز الۋشىدان كەپىلدىك سۇرالمايتىن تۇتىنۋشىلىق نەسيە سوماسى كەيىنگى جىلدا ەكى ەسە ءوسىپ كەتكەن. ماسەلەن, 2021 جىلدىڭ 1 قاڭتارىندا ازاماتتارىمىزدىڭ بانكتەر الدىنداعى بەرەشەگى 5,6 ترلن تەڭگە بولسا, 2023 جىلدىڭ قاراشا ايىندا تۇتىنۋشىلىق نەسيە كولەمى 13 ترلن تەڭگەگە ۇلعايعان. مۇنىمەن قوسا ەلدە ۋاقىتىندا تولەنبەي جاتقان قارىز كولەمى دە كوبەيىپ بارادى. قازىرگى ۋاقىتتا ەلىمىزدە 1 ترلن 600 ملرد تەڭگە قارىزدىڭ تولەۋ مەرزىمى 90 كۇننەن ارتىق كەشىكتىرىلگەن. وسى قوردالانعان ماسەلەنى شەشۋگە ەكى ايدان سوڭ پارلامەنت قاراۋىنا ۇسىنىلاتىن جاڭا زاڭ جوباسى مۇمكىندىك بەرەدى دەگەن ويدامىز. زاڭ جوباسىندا قارىز الۋشىلاردىڭ قۇقىعىن قورعاۋ, نەسيە جۇكتەمەسىن رەتتەۋدى باستى نازارعا الدىق», دەدى د.ەسپاەۆا.
جاڭا زاڭ جوباسىندا تولەۋ مەرزىمى 90 كۇننەن كەشىكتىرىلگەن قارىزدار ءۇشىن بانكتەر مەن ميكروقارجى ۇيىمدارى ايىپپۇلدار مەن سىياقى ۇستەمەسىن قوسا المايتىنى انىق كورسەتىلگەن. ءۇش اي نەسيەسىن تولەمەگەن ازامات قارىزىن جابۋ ءۇشىن قايتا نەسيە راسىمدەي المايدى, كەرىسىنشە, بانكپەن ارادا قارىزىن قايتارۋ جولىن رەتتەيدى. وسى كەزگە دەيىن بانكتەر 90 كۇننەن ارتىق تولەنبەگەن نەسيەلەردى قايتارۋدى كوللەكتورلىق ۇيىمدارعا ىسىرىپ سالاتىن بولسا, ەندىگى جەردە وعان تىيىم سالىنباقشى. بانكتەر نەسيە الۋشىنىڭ قارىز قايتارۋ مەرزىمىن ۇزارتادى نەمەسە پايىزدىق مولشەرلەمەسىن ازايتىپ, باسى ارتىق ايىپپۇلدار قوسپايدى. جاڭا زاڭ جوباسىندا كامەلەت جاسىنا جەتپەگەن بالالارى بار وتباسىلاردى قىس كەزىندە جالعىز باسپاناسىنان شىعارۋعا تىيىم سالىنعان. تاعى ءبىر وزگەرىس – بانك ومبۋدسمەنىنىڭ قۇزىرەتى كەڭەيەدى. بۇگىندە بانك ومبۋدسمەنى تولەنبەي جاتقان يپوتەكالىق نەسيەلەردىڭ يەلەرىمەن جۇمىس جۇرگىزىپ, سوتتا ولاردىڭ قۇقىعىن قورعاسا, الداعى كۇندەرى تۇتىنۋشىلىق نەسيەسىن تولەي الماي جاتقانداردىڭ وتىنىشتەرىن دە قابىلدايدى.
قارىز الۋشىلاردىڭ قۇقىعىن قورعايتىن زاڭ جوباسىندا كوللەكتورلىق اگەنتتىكتەردىڭ جۇمىسىن رەتتەۋ قاراستىرىلعان. كوللەكتورلار قارىزىن قايتارا الماي جۇرگەندەردىڭ مازاسىن بەيبەرەكەت الا بەرمەيدى. تاعى ءبىر وزگەرىس – نەسيە 21 جاستان اسقاندارعا عانا بەرىلەدى. تابىسى جوق ادامدارعا نەسيە بەرىلمەيدى, سونىڭ ىشىندە تەك شاكىرتاقىمەن كۇن كورەتىن كوللەدج, جوو ستۋدەنتتەرى تۇتىنۋشىلىق نەسيە الا المايدى.
كەزدەسۋدە ەكىنشى دەڭگەيلى بانك فيليالدارىنىڭ باسشىلارى بىرنەشە جىل بويى تولەنبەي جاتقان تۇتىنۋشىلىق نەسيەلەردى قايتارۋعا قاتىستى قابىلداناتىن شارالار تۋرالى سۇرادى.
اقتوبە وبلىسى
