التىن كەنىشىندە جەر استىنا اۆتوبۋسپەن بىرگە ءتۇسىپ كەتكەن ەكى ادامدى ىزدەۋ جۇمىستارى كۇنى-ءتۇنى جالعاسىپ جاتىر. ويىق شەتىندەگى توپىراقتىڭ تومەنگە قايتا-قايتا سىرعۋى قۇتقارۋ جۇمىستارىندا جۇرگەن ازاماتتارعا قاۋىپ تۋدىرىپ تۇر. كەشە تۇستە جەدەل شتاب حابارلاعانداي, قۇتقارۋ ءىس-شارالارىندا جەر استىن بارلايتىن ارنايى گەولوگيالىق سكانەر قۇرىلعىسى پايدالانىلىپ, قۇتقارۋشىلاردىڭ جۇمىسى جەڭىلدەي تۇسكەن.
جەكسەنبى كۇنى ويىقتىڭ ەرنەۋىنە «بوگاتىر كومىر» كاسىپورنىنىڭ ۇلكەن كرانى ورناتىلدى. «اك التىنالماس» اق مەن پاۆلودار وبلىستىق توتەنشە جاعداي دەپارتامەنتىنىڭ ماماندارى الگى كراننىڭ كومەگىمەن شۇڭقىر تابانىنا مامانداردى ءتۇسىرىپ, بالقاش قالاسىنان جەتكىزىلگەن گەولوگيالىق راداردىڭ كومەگىمەن توپىراق قاباتىن سكانەرلەدى. ناتيجەسىندە, اۆتوبۋستىڭ جاتقان ورنى شامالاندى.
– «مايقايىڭالتىن» اق تاۋ-كەن اۋدانىنداعى وپىرىلعان جەردە ىزدەستىرۋ جۇمىستارىن جالعاستىرۋدامىز. گەولوگيالىق سكانەردىڭ ناتيجەلەرى وڭدەلىپ, شامامەن اۆتوبۋستىڭ ورنالاسقان جەرى انىقتالدى. كولىك جاتقان جەرگە دەيىنگى ىقتيمال تەرەڭدىك 5-7 مەتردى قۇرايدى. شاعىن ەكسكاۆاتوردى شۇڭقىرعا ءتۇسىرۋ جوسپارلانىپ وتىر. ونى ويىق تابانىنا جەتكىزۋ ءۇشىن ترانشەيا دايىنداۋ جۇمىستارى پىسىقتالىپ, قۇتقارۋشىلاردىڭ ءارى قارايعى ءىس-قيمىلدارىن كۇشەيتۋ تۋرالى شەشىم قابىلداندى. قازا تاپقان جانە جوعالعان قۇتقارۋشىلاردىڭ وتباسىلارىنا «مايقايىڭالتىن» اق جانە كااقق روش تاراپىنان 4,5 ملن تەڭگەدەن استام مولشەردە ماتەريالدىق كومەك كورسەتىلەدى. مەملەكەت تاراپىنان مارقۇمداردىڭ وتباسىلارىنا اسىراۋشىسىنان ايىرىلۋ بويىنشا الەۋمەتتىك تولەمدەر تاعايىندالادى. قازا بولعان ەكى قۇتقارۋشىنىڭ وتباسىلارىنا قايعىرىپ كوڭىل ايتامىن, – دەدى وبلىس باسشىسى اسايىن بايحانوۆ.
مايقايىڭ كەنتىندە بۇگىندە 9 مىڭنىڭ ۇستىندە حالىق تۇرادى. كەنىش اۋىلدىڭ ءدال ىرگەسىندە ورنالاسقاندىقتان, جەرگىلىكتى تۇرعىندار كوپ جىلدان بەرى ەكولوگيالىق احۋالعا الاڭداپ كەلەدى. ويىق پايدا بولعان كەڭىستىك ۇستىندە التىن كەنىشىنە اپاراتىن جول بولعان. «الگى اۋماقتا ۇنەمى سۋ جينالىپ, ويپاڭ بولىپ جاتاتىن. ال ونىڭ استىنداعى كەنىش كامەراسىنىڭ توبەسىنەن ۇنەمى سۋ سورعالاپ بولماعان سوڭ, ول جەردى شاحتا باسشىلىعى جاۋىپ تاستاعان. ءبىز بۇل اۋماقتاعى جول اسا قاۋىپتى ەكەنىن, كولىكتەردى باسقا اۋماقپەن جۇرگىزۋ قاجەتتىگىن كومپانيا باسشىلىعىنا تالاي مارتە ايتقانبىز. الايدا ءبىزدىڭ ۇسىنىس-پىكىرىمىزدى اكتسيونەرلىك قوعام باسشىلارى قۇلاعىنا دا ىلمەدى. كەنىشتىڭ شاحتاسىندا جۋىقتا رەسپۋبليكالىق ارنايى كوميسسيا بولىپ كەتكەنىن ەستىدىك. ولاردىڭ كوزىنە ەسكى شاحتا ىشىندەگى كەمشىلىكتەر قالاي تۇسپەگەنىنە تاڭبىز. بۇل ماسەلەلەردى ايتۋعا جۇرەكسىنەمىز. سەبەبى التىن كەنىشى مەن كەن بايىتۋ فابريكاسىنان ءوزىم, بالالارىم, ءتىپتى تۋىستارىم نان تاۋىپ جەپ وتىرمىز. اينالاداعى جۇرتتىڭ كوبى سولاي. كومپانيا باسشىلارى ءبىزدى قۋدالاۋى مۇمكىن», دەيدى اتى-ءجونىن جاسىرىپ قالعىسى كەلگەن مايقايىڭدىق ازامات.
مايقايىڭ كەنتى اكىمدىگىنەن الىنعان مالىمەتكە سۇيەنسەك, قازىر «مايقايىڭالتىن» اق-دا جالپى سانى 1 012 ادام ەڭبەك ەتەدى. اكتسيونەرلىك قوعامنىڭ قۇرامىندا بۇگىندە ەكى كەنىش توبى مەن كەن بايىتۋ فابريكاسى, كولىك تسەحى, كولىك جوندەۋ شەبەرحانالارى مەن حيميالىق زەرتحانا, وزگە دە قۇرىلىمدىق بولىمشەلەر بار. كاسىپورىن ءوز تاريحىندا 80 توننا التىن, 1 240 توننا كۇمىس, ال جالپى كولەمى 16,7 ملن توننا كەن وندىرگەن.
ايتىپ وتەيىك, اۆتوبۋستا بولعان تورتەۋدىڭ بارلىعى – كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ قىزمەتكەرلەرى. قۇتقارۋ قىزمەتىنىڭ رەسمي سايتىندا كورسەتىلگەندەي, پاۆلودارلىق فيليالدا شامامەن 209 ادام ەڭبەك ەتسە, ونىڭ 36-سى «مايقايىڭالتىن» اق-نىڭ وندىرىستىك بازالارىنا جاۋاپتى بولعان. بۇدان بولەك, كاسىبيلەندىرىلگەن مەكەمە ەكىباستۇزداعى جانە بوزشاكولدەگى كەن ورىندارىنا قىزمەت كورسەتەدى. قۇتقارۋشىلار التىنشى تاۋلىك ىزدەپ جاتقان اۆتوبۋس ىشىندە اتالعان قۇتقارۋ قىزمەتىنىڭ جەدەل الدىن الۋ جۇمىستارى جونىندەگى ۆزۆود كومانديرىنىڭ ورىنباسارى ايدوس شايمەردەن (36 جاستا) مەن جەدەل اۆتوكولىك جۇرگىزۋشىسى ايىپ تىلەۋبەرگەنوۆ (55 جاستا) بار. ا.شايمەردەن – 5 بالانىڭ اكەسى, جۇبايى ەكەۋى 4 ەر, 1 قىز بالانى تاربيەلەپ وسىرگەن. ال 12 قاڭتار كۇنى 56 جاسقا تولاتىن اۆتوبۋس جۇرگىزۋشىسى ا.تىلەۋبەرگەنوۆتىڭ وتباسىندا مۇگەدەك قىز بالا بار دەپ حابارلاندى. ەكى ازامات تا – مايقايىڭ كەنتىنىڭ تۇرعىندارى.
پاۆلودار وبلىسى,
باياناۋىل اۋدانى,
مايقايىڭ كەنتى
