فوتو: oqu_agartu
«جاڭا وزگەرىستەردىڭ 1000 كوشباسشىسى» جوباسى شەڭبەرىندە رەسپۋبليكالىق كادر رەزەرۆىنە قابىلدانعان كانديداتتاردىڭ ءتىزىمى بەكىتىلدى. وعان ءبىلىم بەرۋ ۇيىمدارىنىڭ باسشىلارى لاۋازىمىنان ۇمىتكەر 208 ادام كىردى. بۇل تۋرالى وقۋ-اعارتۋ مينيسترلىگىنىڭ ءباسپاسوز قىزمەتى حابارلادى. مەملەكەت باسشىسىنىڭ تاپسىرماسى بويىنشا وقۋ-اعارتۋ مينيسترلىگى 2023 جىلدان باستاپ پرەزيدەنتتىك جاستار كادرلىق رەزەرۆىنىڭ ۇلگىسى بويىنشا ءبىلىم بەرۋدەگى وزگەرىستەر كوشباسشىلارىن ىرىكتەۋ جانە دايارلاۋ تەتىگىن ازىرلەۋ جانە بەكىتۋ جونىندەگى جوبانى ىسكە اسىرىپ كەلەدى. باستاپقى كەزەڭدە بارلىعى 8068 ءوتىنىم ءتۇستى. ۇمىتكەرلەر قۇزىرەتتىلىكتەرىن باعالاۋ ءۇشىن تەستىلەۋدەن ءوتتى. ەكىنشى كەزەڭدە – ءۇش دەڭگەيلى وقىتۋ, ءۇشىنشى كەزەڭدە – ەلدىڭ جەتەكشى مەكتەپتەرىندە تاعىلىمدامادان ءوتۋ, ءتورتىنشى كەزەڭدە – قورىتىندى باعالاۋ جانە قورىتىندى كەزەڭدە – مينيسترلىك جانىنداعى كوميسسيامەن اڭگىمەلەسۋ بولدى. بارلىق بەس كەزەڭنىڭ قورىتىندىسى بويىنشا رەسپۋبليكالىق كادر رەزەرۆىنە 208 كانديدات ءوتتى. ىرىكتەۋدىڭ بارلىق كەزەڭدەرىنەن وتكەندەرگە سەرتيفيكات بەرىلەدى. ونىڭ نەگىزىندە ۇمىتكەرلەر كونكۋرستىق راسىمدەردەن وتپەي-اق ءبىرىنشى باسشىنىڭ بوس ورنىنا تاعايىندالادى. سونداي-اق بارلىق كەزەڭنەن ءساتتى وتكەن جانە سەرتيفيكات العاندارعا «جەتەكشى-كوشباسشى» بىلىكتىلىك ساناتى بەرىلەدى», دەلىنگەن اقپاراتتا.
ىرىكتەۋدەن وتكەن مەنەدجەرلەر «جايلى مەكتەپ» ۇلتتىق جوباسىمەن سالىنىپ جاتقان مەكتەپتەردە كادر تاپشىلىعىن شەشۋگە سەپتىگىن تيگىزبەك. بۇل جوبا بيىل دا جالعاسىن تاۋىپ, كەز كەلگەن پەداگوگ قاتىسۋىنا بولادى.
