قورعانىس مينيسترلىگى جىگىت مەنينگيتتەن كوز جۇمدى دەسە, تۋىستارى ونىڭ اۋىرىپ قايتىس بولعانىنا سەنبەي وتىر.
استانا تەلەارناسىنىڭ جازۋىنشا, 2023 جىلدىڭ كۇزىندە ءامىر بايتۇرعانوۆ اسكەرگە شاقىرىلعان. مارقۇمنىڭ اكەسى ونىڭ ءوز بولاشاعىن وتانعا قىزمەت ەتۋگە جانە قورعاۋعا ارناعانىن, اسكەرگە شىن ىقىلاسىمەن بارعانىن اتاپ ءوتتى. سونىمەن قاتار بالاسىنىڭ سپورتپەن شۇعىلدانىپ, شىمىر بولعانىن ايتادى. الايدا مارقۇمنىڭ وتباسى 21 جەلتوقساندا قارالى حاباردى ەستيدى.
- تۇنگى ساعات 03:00-دە اسكەري بولىمنەن قوڭىراۋ شالدى. ولار ۇلىمنىڭ ەسىن جيا الماي, ەس-ءتۇسسىز جاتقانىن حابارلاپ, مەنىڭ بولىمگە دەرەۋ كەلۋىمدى سۇرادى. سول كۇنى تاڭعى ساعات 06:20-دا ۇلىم ەسىن بىلمەي كوز جۇمدى, – دەيدى مارقۇمنىڭ اكەسى مۇرات بايتۇرعانوۆ.
اتىس دايىندىعى ساباقتارىنان كەيىن ءامىردىڭ جاعدايى ناشارلاي باستاعان. سول كۇنى ول جوعارى دەنە قىزۋىمەن اۋرۋحاناعا تۇسەدى. ءبىر ۋاقىتتا اسكەري بولىمدەگىلەر ونىڭ قىزۋىن باسقانداي بولعانىمەن, ساربازدىڭ اۋرۋى قايتا اسقىنعان.
- كەشكە قاراي ناۋقاستىڭ جاعدايى ناشارلادى. دەنە قىزۋى ەكسترەمالدى جاعدايعا دەيىن كوتەرىلدى. وسىدان كەيىن ناۋقاس ورتالىق اۋداندىق اۋرۋحاناعا جەتكىزىلدى. سوت-مەديتسينالىق ساراپتامانىڭ دەرەكتەرى بويىنشا ءولىمنىڭ الدىن الا سەبەبى جەدەل ينفەكتسيالىق اۋرۋ مەنينگيت دەپ انىقتاما بەرىلدى, – دەدى باس اسكەري-مەديتسينالىق باسقارما باسشىسىنىڭ ورىنباسارى بەرىك ءىلياسوۆ.
الايدا مارقۇمنىڭ تۋىستارى بالالارىنىڭ مەنينگيتتەن مەرت بولعانىنا سەنبەي وتىر. جاقىندارىنىڭ ايتۋىنشا, ول ۇزاق ۋاقىت بويى بۇيرەگىنىڭ اۋىرىپ جۇرگەنىنە شاعىمدانعان. بىراق ۋاقىتىلى ەم-دومىن الا الماعان.
- بۇعان دەيىن بۇيرەگى اۋىرعانىن مەديتسينالىق بولىمدەگىلەرگە ايتىپ, بىرنەشە رەت جۇگىنگەن. 28 قاراشادا ول ۋلترادىبىستىق زەرتتەۋ جۇرگىزۋ ءۇشىن ءبولىمنىڭ مەديتسينالىق قىزمەت باسشىسىنا بارادى. تەك 6 جەلتوقساندا ولار قالاعا بارىپ, ۋلترادىبىستىق زەرتتەۋ جۇرگىزىپ, ەكى جاقتى پيەلونەفريت دياگنوزىن قويدى. ونى سول كۇنى-اق بىردەن اسكەري گوسپيتالعا جاتقىزعانىمەن, 3 كۇننەن كەيىن شىعارىپ جىبەرەدى, – دەدى مارقۇمنىڭ اكەسى.
اكەسى ۇلىمەن ءجيى حابارلاسىپ تۇرعانىن ايتادى. ۇلىنىڭ ايتۋىنشا, كازارماعا لاۋازىمدى تۇلعالار تەكسەرىسپەن كەلگەن. باسشىلارى قالاي تەكسەرىس بىتەدى, دەرەۋ ەمحاناعا جاتقىزىلادى دەپ ايتقان. دەگەنمەن جاعداي مۇلدە باسقاشا بولعان.
تۋىستارى بالالارىنىڭ سوزىلمالى پيەلونەفريتتەن كوز جۇمدى دەگەن پايىمدا. دەسە دە, قورعانىس مينيسترلىگى ساربازدىڭ بۇيرەك اۋىرۋىنان قايتىس بولعانىن جوققا شىعاردى.
- 5 جەلتوقساندا جاسالعان سوت-مەديتسينالىق دەرەكتەرگە سايكەس جانە اۋرۋدىڭ تاريحىن زەرتتەي كەلە, ءولىم سەبەبى اراسىندا ەش بايلانىس جوقتىعىن كورسەتەدى, – دەدى بەرىك ءىلياسوۆ.
مارقۇمنىڭ اكەسى باس پروكۋراتۋراعا تەرگەۋ بارىسىن ەرەكشە باقىلاۋعا الۋدى سۇراپ وتىر.
