قوعام بەلسەندىلەرىنىڭ پىكىرىنشە, بۇل قورشاعان ورتاعا ورنى تولماس زيان كەلتىرۋى مۇمكىن. پوليتسيا وقيعاعا بايلانىستى قىلمىستىق ءىس قوزعادى.
الماتىنىڭ "اقبۇلاق" شاعىن اۋدانىندا 40-قا جۋىق توعىز قاباتتى ءۇي, مەكتەپ جانە جاقىن ماڭداعى تۇرعىن ءۇي كەشەندەرىنە اۆتوتۇراق سالۋ ءۇشىن 17 گەكتار اۋماقتا جاسىل الاڭ تۇگەلدەي شابىلعان. قۇرىلىس كومپانياسى اعاشتاردى كەسۋدى 9 جەلتوقساندا باستاپتى, بىرنەشە اپتا ىشىندە 2800-گە جۋىق اعاش كەسىلگەن.
قۇرىلىس كومپانياسىنىڭ مالىمەتىنشە, ولاردىڭ قاجەتتى رۇقساتتارى بار, بۇعان دەيىن تۇرعىندارمەن كەزدەسۋ دە وتكىزگەن.
- رۇقسات العان بويدا اعاشتاردى كەسۋگە كىرىستىك. ءبىز مۇندا تۇرعىن ءۇي كەشەنىن, وعان قوسا 1200 ورىندىق مەكتەپ پەن اۆتوتۇراق سالۋدى جوسپارلاپ وتىرمىز. ءبىز الدىن الا دايىندالدىق, مۇنىڭ ءبارىن تۇرعىندارمەن 3-4 اي بويى تالقىلادىق. 3-4 رەت كەزدەسۋلەر بولدى. تەك جينالىس ەمەس, بارلىعىن رەسمي تۇردە كۋالاندىردىق, – دەپ جازدى كتك ارناسى "Qazaq Stroy" جشس ديرەكتورىنىڭ ورىنباسارى دارحان مارقۇموۆتىڭ ءسوزىن.
بىراق بەلسەندىلەر قۇرىلىس كومپانياسىنىڭ ارەكەتىمەن كەلىسپەيدى.
- سالماۋ كەرەك. جالپى العاندا, مۇنداي قۇرىلىستاردى توقتاتۋ كەرەك. پرەزيدەنت بىرنەشە رەت تاپسىرما بەردى. الايدا الماتىدا بۇل بۇيرىق ورىندالماي جاتىر. ماسەلە بۇل زاڭسىزدىقتىڭ زاڭداستىرىلعانىندا. قۇرىلىسشىنىڭ بۇزۋعا جانە اعاش كەسۋگە رۇقساتى بار ەكەن, – دەيدى قوعام بەلسەندىسى سانجار بوقاەۆ.
قۇرىلىس كومپانياسىنىڭ اعاشتاردى كەسۋگە رۇقساتى بار ەكەنى بەلگىلى بولدى. الايدا اكىمدىك ولاردىڭ رۇقسات ەتىلگەننەن كوپ اعاش كەسكەنىن ايتادى.
- "Qazaq Stroy" جشس مەردىگەر ۇيىمى 176-عا جۋىق اعاش پەن 40 ءتۇپ جابايى بۇتالاردى, بارلىعى 216 بىرلىك جاسىل القاپتى زاڭسىز كەسكەنى انىقتالدى. ياعني, بۇل وسىمدىكتەر رۇقسات بەرۋ قۇجاتتارىندا كورسەتىلمەگەن, – دەدى الماتى قالاسى ەكولوگيا جانە قورشاعان ورتانى قورعاۋ باسقارماسىنىڭ باس مامانى نۇركەن اقمىرزا.
پوليتسيا زاڭسىز اعاش كەسۋ فاكتىسى بويىنشا قىلمىستىق ءىس قوزعادى. زاڭدى تۇردە جويىلعان اعاشتارعا كەلەر بولساق, كومپانيا ولاردىڭ ورنىنا 28 مىڭعا جۋىق جاڭا اعاش وتىرعىزۋعا ۋادە بەردى.
