جاڭا تۇرعىن ۇيلەر «اتىراۋ» شاعىن اۋدانىندا بوي كوتەرگەن. الايدا وبلىس اكىمى سەرىك شاپكەنوۆتىڭ ايتۋىنشا, ونىڭ قۇرىلىسى بىرازعا سوزىلعان.
«بۇل تۇرعىن ءۇي كەشەنى قۇرىلىسىنىڭ ساپاسى مەن مەرزىمىنە قاتىستى ماسەلە كوپ بولۋىنا بايلانىستى جاعدايمەن جەكە تانىسۋدى ءجون كوردىم. جىلىوي اۋدانىنا كەلگەن ساپارىمنىڭ بىرىندە تۇرعىندار قۇرىلىستىڭ ۇزاققا سوزىلعانىنا رەنىشىن بىلدىرگەن ەدى. سودان كەيىن قۇرىلىستى تەزىرەك اياقتاۋ ءۇشىن ءتيىستى ءىس-شارالار قولعا الىندى. قازىر ويىن الاڭدارى, جاياۋ جۇرگىنشىلەر جانە كولىك, تۇراق سەكىلدى ينفراقۇرىلىم جەلىسى تولىعىمەن دايىندالدى», دەدى سەرىك شاپكەنوۆ.
اكىمنىڭ پىكىرىنشە, ەندى پاتەر يەلەرى كووپەراتيۆىن قۇرۋ, تۇرعىندارعا قۇقىقتىق كومەك كورسەتۋ قاجەت. بەينەباقىلاۋ كامەرالارىنىڭ سانى كوبەيتىلەدى.
تۇرعىن ۇيدەن پاتەر العاندار قاتارىندا كوپبالالى انا قۇرالاي قورازوۆا دا بار. ول ءۇش بولمەلى پاتەردىڭ كىلتىن الۋدى بەس جىل كۇتكەن.
«ون جىلدان بەرى ءۇي جالدايمىن. بەس جىل بۇرىن كەزەككە تۇرعان ەدىم. ەندى مىنە, جاڭا پاتەرگە يە بولدىم. مۇندا بارلىق قاجەتتى جاعدايدىڭ جاسالعانىنا قۋانىپ تۇرمىن», دەيدى قۇرالاي قورازوۆا.
جىلىوي اۋدانىنىڭ اكىمى جۇمابەك قاراجانوۆتىڭ مالىمەتىنە سۇيەنسەك, تۇرعىن ءۇي كەشەنىنىڭ جالپى اۋماعى – شامامەن 6,5 مىڭ شارشى مەتر. ءار ۇيدە – 100, ونىڭ ىشىندە ءبىر بولمەلى – 25, ەكى بولمەلى – 50 پاتەر جانە ءۇش بولمەلى 25 پاتەر بار.
«ەكى, ءۇش بولمەلى پاتەرلەر 225 كوپبالالى وتباسىنا, ءبىر بولمەلى پاتەرلەر اتا-اناسىنىڭ قامقورلىعىنسىز قالعان 15 بالاعا بەرىلدى. جاڭا ۇيلەردەن ءبىرىنشى جانە ەكىنشى توپتاعى مۇگەدەكتەر, مۇمكىندىگى شەكتەۋلى بالالاردى تاربيەلەپ وتىرعان وتباسىلار, زەينەتكەرلەر, سوزىلمالى اۋرۋلارى بار تۇرعىندار, تولىق ەمەس وتباسى ساناتىنىڭ ارقايسىسىنا 13 پاتەردەن ءبولىندى. ال جاۋىنگەرلىك ۇرىس ءىس-قيمىلىنا قاتىسقان ءۇش ارداگەر دە جاڭا باسپاناعا يە بولدى», دەدى جۇمابەك قاراجانوۆ.
اتىراۋ وبلىسى
