اقسۋ قالاسىنداعى ەلەكتر ستانساسى ءوزىنىڭ 55 جىلدىعىن اتاپ ءوتتى. مەرەيتويعا وراي شاھار تۇرعىندارىنا ەرەكشە سىي تارتۋ ەتۋدى ويعا العان كاسىپورىن ەڭ اۋەلى ءوز قىزمەتكەرلەرىنىڭ مارتەبەسىن ەسكەرسە كەرەك. مەرەيلى ماماندىق يەلەرىنىڭ بەينەسىن ۇلكەن كوشەلەردىڭ بىرىندەگى كوپقاباتتى ءۇيدىڭ قابىرعاسىنا ءتۇسىرۋدى ويعا العان. مۇرالدى سالۋ يدەياسىن جەرگىلىكتى ساۋلەت جانە قالا قۇرىلىسى ءبولىمىنىڭ ماماندارى بىردەن قولداپ, قولايلى ورىن ۇسىنعان. «اۋەزوۆ كوشەسى, 55 مەكەنجايى قالاعا كىرە بەرىس اينالما جول بويىندا ورنالاسقان. ورتالىق كوشە بولعاندىقتان وتە ادەمى كورىنەدى», دەيدى مەملەكەتتىك مەكەمە باسشىسى كيريلل ەفرەموۆ. مۇرالداعى بەينەنىڭ ءوزى جاساندى ينتەللەكتىنىڭ كومەگىمەن جاسالىپتى.
اقسۋداعى ەڭبەك ادامىنا دەگەن قۇرمەتتى بىلدىرەتىن العاشقى مۇرال كوپشىلىكتىڭ كوڭىلىنەن شىقتى. تۇرعىندار ۇيلەرىنە جارىق پەن جىلۋ بەرىپ وتىرعان ماماندىق يەلەرىنىڭ بەينەسى قالاعا ءسان قوسىپ تۇرعانىن ايتادى.
– ەنەرگەتيكتەردىڭ جۇمىسى كوزگە كورىنبەيدى. ۇيىمىزگە كەلىپ تۇرعان ەلەكتر جارىعى مەن جىلۋدىڭ ارتىندا قانشاما ادامنىڭ ەرەن ەڭبەگى تۇر. ءبىز وسى مۇرال ارقىلى ەنەرگەتيك ماماندىعىنىڭ ماڭىزىن قوعامعا كورسەتكىمىز كەلدى. ەلىمىزدەگى ەنەرگەتيكا سالاسىنىڭ دامۋى دا وسى جانداردىڭ قولىندا, – دەيدى «ەەك» اق اقسۋ ەلەكتر ستانساسىنىڭ وپەراتسيالىق ديرەكتورى-باس ينجەنەرى دانيار شابانباەۆ.
پاۆلودار وبلىسى,
اقسۋ قالاسى
