اقتوعاي اۋدانىنا اپارار جولدىڭ بۇعان دەيىن سىنى ءبىرشاما كەتكەن بولاتىن. وسى جولى اۋدان ورتالىعىنا دەيىنگى شامامەن جارتى جولدى اسفالتتاپ قويىپتى. العاشقىدا تاعايىندالعان رۋسلان ايتكەن ۇلى قىزمەتىنە كىرىسە سالا, توزىعى جەتكەن تاسجولدىڭ جوندەۋ جۇمىستارىنا كۇش سالىپتى. جاڭا اكىمنىڭ سايلاۋالدى باعدارلاماسىندا دا العاشقى ماسەلەلەردىڭ تىزىمىندە كوش باستاپ تۇر ەكەن. كەلەر جىلى بۇل جۇمىستى اقسۋ-ايۋلى اۋلىنا دەيىن جەتكىزەمىز دەپ وتىر.
اقتوعايداعى شالعاي اۋىلداردا اۋىز سۋ ماسەلەسى ءالى دە وزەكتى. 2025 جىلعا دەيىن بارلىق ەلدى مەكەندى ورتالىقتاندىرىلعان اۋىز سۋ جۇيەسىمەن قامتۋدى جوسپارلاپ وتىر. بۇگىنگى كۇنى شاعىن اۋىلدارعا سۋ تارتىلۋ جۇمىستارى جۇرۋدە.
«بيىل قۋانىش (409 ملن) جانە ءۇشارال اۋىلدارىنا (312 ملن) سۋ تارتىلدى. ال 364 ملن تەڭگە قارجى قاراستىرىلعان جالاڭاش اۋلىنا سۋ تارتۋ جۇمىستارى كەلەسى جىلى اياقتالماق. بۇل جۇمىستارعا وبلىستان دا, رەسپۋبليكادان دا قارجى بولىنگەن. كەلەر جىلى 343,6 ملن تەڭگە ءبولىنىپ وتىر. اقتوعاي 4 كەزەك, قاراسۋ, اقجايداق ەلدى مەكەندەرىنە سۋ تارتامىز. جوبانى ىسكە اسىرۋعا قۇجاتتار تولىعىمەن ازىرلەنگەن», دەيدى رۋسلان ايتكەن ۇلى.
بيىل شاشۋباي كەنتىندەگى 100 پاتەرلىك ءۇيدى قالپىنا كەلتىرۋ جۇمىستارى اياقتالىپ قالىپتى. اقتوعاي اۋلىندا جەكە ينۆەستيتسيالار ەسەبىنەن سالىنعان 10 پاتەر قۇنى 150 ملن-عا ساتىپ الىندى. پاتەر كەزەگىن تومەندەتۋ ءۇشىن وسى باعىتتاعى جۇمىستار جالعاساتىنىن ايتتى جاڭا اكىم.
«اۋدان بويىنشا تۇراقتى ەلەكتر جارىعىمەن قامتاماسىز ەتۋ دە – ماڭىزدى ماسەلە. نىسانداردى «جەزرەك» اق يەلىگىنە وتكىزۋ ءۇشىن كەلىسسوزدەر جۇرگىزىلىپ, ارنايى جول كارتاسى ازىرلەندى. جول كارتاسىنا سايكەس «جەزرەك» اق-عا قۇجاتتار تاپسىرىلدى. بۇگىنگى كۇنى نىسانداردى كۇتىپ ۇستاۋ, تۇرعىنداردى ۇزدىكسىز ەلەكتر قۋاتىمەن قامتاماسىز ەتۋ ماقساتىندا ارنايى جۇمىس توبى قۇرىلىپ, «جەزرەك» اق ماماندارىمەن بىرلەسە وتىرىپ ەلەكتر جەلىلەرىن تۇگەندەۋ جانە قۇجاتتارىن سايكەستەندىرۋ جۇمىستارى جۇرگىزىلىپ جاتىر. قۇجاتتاردى رەتتەۋ, وزگەرىس ەنگىزۋ بويىنشا ءتيىستى ءىس-شارالار اتقارىلىپ كەلەدى», دەيدى اكىم. دەمەك جەل ءۇپ ەتسە, جالپ ەتىپ سونەتىن جارىقتىڭ ساپاسى ارتاتىنىنا ءۇمىت بار.
سونىمەن قاتار اۋدان باسشىسى بيىل قىزىلاراي اۋلىندا فەلدشەرلىك-امبۋلاتوريا قۇرىلىسى باستالسا, كەلەسى جىلى وسىنداي فاپ ايىرتاس, قۋساق, اقجايداق, ورتادەرەسىن, قۋانىش, اقتاس, ءۇشارال, كەجەك, نۇركەن اۋىلدارىنان سالىناتىنىن جەتكىزدى.
سارىشاعان كەنتىندەگى مەكتەپ-ينتەرناتقا جانە «ايگولەك» بالاباقشاسىنا, شاشۋباي كەنتىندەگى مەكتەپ-بالاباقشا كەشەنىنە, ق.نۇرجانوۆ اتىنداعى مەكتەپكە, ءا.ەرمەكوۆ اتىنداعى مەكتەپكە كۇردەلى جوندەۋ جۇمىستارى جوسپارلانىپ وتىر. كەلەر جىلى «قازاقستان حالقىنا» قورى ارقىلى شاشۋباي كەنتىندە شامامەن 250 ملن تەڭگەنى قۇرايتىن دەنەشىنىقتىرۋ-ساۋىقتىرۋ كەشەنى سالىنباقشى.
«اۋدانعا ينۆەستيتسيا تارتۋ, تاۋ-كەن ءوندىرىسىن دامىتۋ باعىتىندا اۋقىمدى شارالار اتقارىلعالى تۇر. بىلتىر باستاۋ العان «يركاز مەتالل كورپوراتسياسى» جشس «بورلى» كەن ورنىندا كاتودتى مىس وندىرەتىن گيدرومەتاللۋرگيالىق زاۋىتتىڭ قۇرىلىسى 9,0 ملرد تەڭگەگە ىسكە قوسىلىپ, 125 ادام جۇمىسپەن قامتىلدى. بيىل «Balqash Resources» جشس «قاراتاس 2» كەن ورنىندا 4,3 ملرد تەڭگەنىڭ تەمىر جانە ءتۇستى مەتالل وڭدەۋ وندىرىستىك كەن-بايىتۋ كەشەنى قۇرىلىس جۇمىستارىن باستادى, جوبا تولىق كۇشىنە 2025 جىلى ەنەدى. 303 جاڭا جۇمىس ورنى اشىلىپ قالار دەپ كۇتىپ وتىرمىز. «SAQ-NS» وندىرىستىك كووپەراتيۆىندە زاماناۋي نەمىس تەحنولوگياسى بويىنشا قىمىز ءوندىرۋ تسەحى سالىندى. ونىمدىلىگى تاۋلىگىنە 1200 ليتر. جوبا قۇنى 82 ملن تەڭگەنى قۇرايدى. «SAQ-NS» وندىرىستىك كووپەراتيۆى تاۋلىگىنە 5 توننا ەت وندىرەتىن ءمودۋلدى مال سويۋ تسەحىن اشپاقشى. جارتىلاي فابريكاتتى ەت ونىمدەرىن شىعارادى. «Qazaq steppe sheep» جشس 9 مىڭ مال وسىرەتىن مەگا-فەرما قۇرىپ, جىلىنا 420 تونناعا دەيىن ۇساق مالدىڭ ەتىن وڭدەۋگە ارنالعان ەت كومبيناتىن سالۋ جوسپاردا بار. ال «Global Beef Products» جشس 2 مىڭ اسىل تۇقىمدى انگۋس ءىرى قارا مالىن ءوسىرىپ جاتىر. وسىنداي, ءىرى جوبالار اۋدانىمىزدىڭ ەكونوميكالىق ءوسىمىن ارتتىرادى», دەيدى اكىم.
يگەرىلمەي جاتقان جايىلىمدىق جانە شابىندىق جەرلەردى مەملەكەت مەنشىگىنە قايتارۋ ماسەلەسى دە بەلسەندى جۇرگىزىلىپ جاتىر. اۋدان بويىنشا بيىل 192,9 مىڭ گەكتار اۋىل شارۋاشىلىعى جەرلەرى قايتارىلدى. جەرلەرىن پايدالانباي وتىرعان 18 شارۋا قوجالىعى, ياعني 73212 گەكتار جەر تەلىمىنە مونيتورينگ جۇرگىزىلىپ, وبلىستىق جەر رەسۋرستارىن باسقارۋ دەپارتامەنتىنە تەكسەرىس جۇرگىزۋ ءۇشىن جولداندى. سايلانعان اكىمنىڭ سايلاۋالدى باعدارلاماسىنداعى نەگىزگى ماسەلەلەر رەتى وسىنداي.
«مەملەكەت باسشىسىنىڭ تاپسىرماسىمەن العاش رەت قاناتقاقتى رەجىمدە وتكەن اۋدان مەن قالا اكىمدەرىنىڭ سايلاۋىندا العاشقىلاردىڭ ءبىرى بولىپ اقتوعاي اۋدانىنىڭ تىزگىنىن ۇستادىم. اۋدان تۇرعىندارى ماعان زور سەنىم ءبىلدىردى. شىن مانىندە, ەل سەنىمىن ەش نارسەمەن ولشەۋ مۇمكىن ەمەس. حالىقتىڭ سەنىمى – ەڭ قۇندى پارىز. جەرلەستەرىمنىڭ قولداۋىمەن ەل تىزگىنىن ۇستاۋ – ەڭ بيىك مارتەبە», دەپ اڭگىمەسىن تۇيىندەدى ر.كەنجەبەكوۆ.
قاراعاندى وبلىسى,
اقتوعاي اۋدانى
