سۋرەتتەردى تۇسىرگەن – ەرلان ومار, «EQ»
بەكسۇلتان نۇرجەكە ۇلى,
قازاقستاننىڭ حالىق جازۋشىسى:
– قازاقتا «ەسكى جىلىم – ەسىركە, جاڭا جىلىم جارىلقا» دەگەن تىلەك بار. ءوتىپ بارا جاتقان ەسكى جىل ءوز باسىمدى ەسىركەدى دەپ ويلايمىن. ەل-جۇرتىما, وتباسىما, دەنساۋلىعىما ايتار وكپەم جوق. مەملەكەتىمىز ەڭبەگىمدى باعالاپ, «قازاقستاننىڭ حالىق جازۋشىسى» دەگەن اتاق بەردى. بۇل اتاقتىڭ اتى جاقسى. «حالىق جازۋشىسى» دەگەن – «حالىقتىڭ ادامى, ازاماتى» دەگەن قادىرلى ءسوز. ودان كەيىن جاڭادان قۇرىلعان جەتىسۋ وبلىسىنىڭ «قۇرمەتتى ازاماتى» اتاندىم. وسىنىڭ ءبارى – ەلدىڭ قۇرمەتى دەپ بىلەمىن.
جاقىندا تاۋەلسىزدىك كۇنى مەرەكەسىندە پرەزيدەنت قاسىم-جومارت توقاەۆتىڭ بايانداماسىن تىڭدادىم. سوندا مەملەكەت باسشىسى جىل بويى اتقارىلعان جۇمىستارعا توقتالىپ, قورىتىندى جاسادى. وسى يگىلىكتى شارانى قولداۋ رەتىندە داستۇرگە اينالدىرساق, تاۋەلسىزدىك مەرەكەسى الدىندا جىل بويى نە ىستەگەنىمىزدى جۇرتشىلىقتىڭ الدىندا جارقىراتىپ ايتىپ, ەل ەڭسەسىن كوتەرۋگە جاقسى ءبىر باستاما بولار ەدى.
جاس ۇرپاقتى وتانسۇيگىشتىككە, تۋعان ەلدى, جەردى سۇيۋگە باۋلۋ تۋرالى ءجيى ايتامىز. مىسالى, وتكەن جىلى ەكى ۇلكەن وقيعا ەسكەرىلمەي قالدى. حالقىمىز «بۇدان كەيىن ەل بولىپ قالا ما, قالماي ما؟» دەگەن اۋىر كۇن تۋعان «اقتابان شۇبىرىندى, القاكول سۇلاما» اتتى قاسىرەتكە 300 جىل بولدى. وسىعان بايلانىستى ەلىمىزدە كونفەرەنتسيا ءوتىپ, مەرزىمدى باسپاسوزدە عىلىمي, تاريحي ماقالالار جاريالانۋى كەرەك ەدى. بۇعان ەشكىم كوڭىل بولمەدى. بۇل – ءبىزدىڭ كەمشىلىگىمىز. ەكىنشى – ايگىلى وربۇلاق شايقاسىنداعى جەڭىسىمىزگە 380 جىل تولدى. وسى داتا پانفيلوۆ اۋدانى دەڭگەيىندە اتالىپ ءوتىلدى. بۇل ءبىر اۋداننىڭ ەمەس, رەسپۋبليكانىڭ مارتەبەسىن كوتەرەتىن ءىس-شارا ەدى. ءبىز مۇنداي ايتۋلى وقيعالاردى ۇمىتپاۋىمىز قاجەت. ويتكەنى وسىنداي قۇرباندىقپەن جەتكەن تاۋەلسىزدىكتىڭ باعاسىن, قادىرىن, قاسيەتىن كەيىنگى ۇرپاق بىلەر ەدى. الداعى جاڭا جىلدان ۇلكەن ءۇمىت كۇتەمىن. ەلىمىز دامۋدىڭ داڭعىل جولىنا تۇسسە ەكەن دەپ ارماندايمىن!
ەرلان باتىربەكوۆ,
عالىم, مەملەكەتتىك سىيلىقتىڭ لاۋرەاتى, ۇلتتىق يادرولىق ورتالىقتىڭ باس ديرەكتورى:
– 2023 جىل جەمىستى بولدى. عىلىم مەن تەحنيكا سالاسىنداعى اسا ۇزدىك جەتىستىكتەرى ءۇشىن ەكى جىلدا ءبىر رەت بەرىلەتىن ءال-فارابي اتىنداعى مەملەكەتتىك سىيلىقتىڭ لاۋرەاتى اتاندىق. مەنىڭ جەتەكشىلىگىممەن ۇلتتىق يادرولىق ورتالىقتىڭ اۆتورلار ۇجىمى «قازاقستان رەسپۋبليكاسىنىڭ اتوم-ەنەرگەتيكا سالاسىن قۇرۋعا جانە كومىرتەگى بەيتاراپتىعىنا قول جەتكىزۋ ستراتەگياسىن ىسكە اسىرۋعا ارنالعان الەمدىك دەڭگەيدەگى زەرتتەۋلەر مەن ازىرلەمەلەر» جۇمىسى ءۇشىن وسىنداي مارتەبەلى ماراپاتقا لايىق دەپ تانىلدى. بۇل سىيلىق ءبىزدىڭ ۇجىمعا ۇلكەن جاۋاپكەرشىلىك جۇكتەدى, ەرتەڭگى كۇنگە دەگەن سەنىمىمىزدى ارتتىردى. بۇعان قوسا جەكەلەگەن عالىمدارىمىز دا جوعارى دەڭگەيدەگى ءتۇرلى ماراپاتتارعا قول جەتكىزدى. مۇنىڭ بارلىعى ۇجىمدى ۇيىستىرىپ, الداعى اۋقىمدى ىستەردى اتقارۋعا ىنتالاندىرا تۇسكەنى انىق.
قازىر ەلىمىز اتوم-ەنەرگەتيكا سالاسىنا ەرەكشە ءمان بەرىپ وتىر. وسى باعىتتا ەڭبەك ەتىپ جۇرگەن عالىمدارعا ۇلكەن سەنىم ارتىلدى. الەمنىڭ جەتەكشى عىلىمي ۇيىمدارىمەن حالىقارالىق ىنتىماقتاستىق بەلسەندى دامىپ كەلەدى. پرەزيدەنتتىڭ عىلىم سالاسىنا ەرەكشە كوڭىل ءبولىپ وتىرعانىن دا ەرەكشە اتاپ وتكەن ءجون. بيىل سونىڭ ناقتى جەمىسىن كورگەندەي بولدىق. وسى باعىتتاعى جۇمىستار جالعاسا بەرسە ەكەن دەپ تىلەيمىز. جاڭا جىلدان كۇتەرىمىز كوپ. جوبا-جوسپارلارىمىز دا اۋقىمدى. سونىڭ جەمىسىن كورۋدى ءناسىپ ەتسىن! 2024 جىل جاقسىلىققا تولى جىل بولعاي!
دۋلىعا اقمولدا,
اكتەر, قازاقستاننىڭ حالىق ءارتىسى:
– 2023 جىل تەاتر سالاسى بولسىن, كينو سالاسى بولسىن وتە تابىستى بولدى. جاس اقىن-جازۋشىلاردىڭ كىتاپتارى جارىق كورىپ, بىرقاتار دەرەكتى فيلم ەكرانعا شىقتى. اسىرەسە تەاتر جانە كينو سالاسىنداعى جاس رەجيسسەرلەر مەن اكتەرلەردىڭ حالىقارالىق فەستيۆالدەردە توپ جارۋى مەنى قاتتى قۋانتادى. وسىنىڭ ءبارى مەملەكەتىمىزدىڭ مادەنيەتكە ەرەكشە كوڭىل ءبولىپ وتىرعانى دەپ سانايمىن.
وتىز جىلدان اسا م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ەڭبەك ەتىپ كەلەمىن. بيىل ءبىزدىڭ تەاتر ساحناسىندا 5-6 قويىلىمنىڭ پرەمەراسى ءوتتى. بۇل تۋىندىلاردى كورەرمەندەر وتە جىلى قابىلدادى. كەشە عانا «اسىلتاس» قوعامدىق قورىنىڭ قولداۋىمەن «اسىلتاس» تەاترى اشىلىپ, العاشقى پرەمەراسى بولدى. وندا مەن دە وينادىم.
جاڭا جىلدان كۇتەرىمىز كوپ. اسىرەسە ءداستۇرلى ونەرىمىز شەتقاقپاي بولىپ قالماسا ەكەن دەيمىن. ءداستۇرلى ونەر – ۇلتتىڭ رۋحى دەپ تۇسىنەمىن. سونداي-اق وبلىستىق تەاترلاردا قىزمەت ىستەيتىن اكتەرلەردىڭ ماتەريالدىق جاعدايى, جالاقىسى تومەن. سوندىقتان وندا كاسىبي اكتەرلەر كوپ تۇراقتامايدى. وسى ماسەلەگە نازار اۋدارىلسا ەكەن. جاڭا جىل ەلىمىزگە قۇت-بەرەكە اكەلسىن!
دايىنداعان –
ازامات ەسەنجول,
«Egemen Qazaqstan»
