فوتو: inbusiness.kz
ساۋد ارابياسىنىڭ باقىلاۋشى مارتەبەسىن الۋ تۋرالى ءوتىنىشى 2023 جىلعى 12 جەلتوقساندا وتكەن اوسشك لاۋازىمدى تۇلعالار كوميتەتىنىڭ وتىرىسىندا الدىن الا ماقۇلداندى. اتالعان ەلگە باقىلاۋشى مارتەبەسىن بەرۋ تۋرالى شەشىمدى 26 جەلتوقساندا اوسشك مينيسترلەر كەڭەسى قابىلدادى.
ساۋد ارابياسى – پارسى شىعاناعى ەلدەرىنىڭ ءبىرى. قازىرگى تاڭدا اوسشك-گە وڭىردەگى باحرەين, قاتار, كۋۆەيت جانە ءباا سەكىلدى بىرقاتار مەملەكەت مۇشەلىككە وتكەن. ساۋد ارابياسى كورولدىگىنىڭ باقىلاۋشى مارتەبەسى اوسشك-دەگى قوسالقى ايماقتىڭ وكىلدىگىن ودان ءارى ۇلعايتادى. وسىلايشا, ازياداعى ىنتىماقتاستىقتى كەڭەيتەدى.
اتالعان مەملەكەت ازيادا جانە بۇكىل الەمدە كوپجاقتىلىقتى ىلگەرىلەتۋگە بەلسەندى تۇردە ۇلەس قوسىپ كەلەدى. بۇگىندە ساۋد ارابياسى ءارتۇرلى حالىقارالىق ۇيىمدارعا, سونىڭ ىشىندە اوسشك باقىلاۋشى ۇيىمى سانالاتىن اراب مەملەكەتتەرى ليگاسىنا (LAS), سونداي-اق يسلام ىنتىماقتاستىق ۇيىمىنا (يكۇ) جانە مۇناي ەكسپورتتاۋشى ەلدەر ۇيىمىنا (وپەك) قوسىلعان.
ساۋد ارابياسىنىڭ اوسشك باقىلاۋشى-مەملەكەتى بولۋعا ۇمتىلىسى جاھاندىق جانە ايماقتىق سىن-قاتەرلەردى شەشۋدەگى ۇجىمدىق كۇش-جىگەردىڭ ماڭىزىن كورسەتەدى. ايماقتىڭ حالىقارالىق ۇيىمشىلدىقتى بىرىكتىرۋگە دەگەن ورتاق ۇمتىلىسىن ايعاقتايدى.
كەيىنگى ءۇش جىلدا اوسشك گەوگرافرياسى ايتارلىقتاي ءوستى: كۋۆەيت 2022 جىلى مۇشەلىككە ءوتتى. تۇرىكمەنستان 2021 جىلى باقىلاۋشى اتاندى. ەۋرازيالىق ەكونوميكالىق وداق 2022 جىلى سەرىكتەس ۇيىم بولدى. ۇيىمنىڭ كەڭەيۋى وتە جاعىمدى وقيعا جانە ونىڭ جالپىازيالىق ۇيىم رەتىندە ودان ءارى دامۋىندا ماڭىزدى.
