سۋرەتتەردى تۇسىرگەن – جۇماباي مۇسابەكوۆ
ء«وتىپ بارا جاتقان جىل ەلىمىز ءۇشىن مەملەكەت باسشىسى باستاعان اۋقىمدى وزگەرىستەردىڭ تاعى ءبىر جاڭا بەلەسىن باعىندىرعان تاريحي ۋاقىت بولدى. سونىڭ ىشىندە, مادەنيەت پەن يدەولوگيا سالاسىندا اۋقىمدى باستامالار قولعا الىنىپ, «ادىلەتتى قازاقستان» تۇجىرىمداماسىنىڭ ءىس جۇزىندەگى تۇعىرى ايقىندالا باستادى. پرەزيدەنت باستامالارى سالامىزعا دا تىڭ سەرپىلىس بەردى. قالىپتاسقان رۋحاني, اقپاراتتىق جاعدايعا تىكەلەي اسەر ەتەتىن بىرقاتار ماڭىزدى ءارى قاجەتتى زاڭ مەن نورماتيۆتىك اكتى قابىلداندى. قوعامنىڭ ينتەللەكتۋالدىق, شىعارماشىلىق, زايىرلى ورتاسىن كوتەرمەلەۋ ماقساتىندا پرەزيدەنت تاراپىنان ناقتى قادامدار جاسالىپ, زور موتيۆاتسيالىق قولداۋ كورسەتىلدى», دەگەن ايدا عالىمقىزى بۇدان ءارى مينيسترلىكتىڭ وسى جىل ىشىندە اتقارعان جۇمىستارىن تارقاتىپ ايتتى.
«مينيسترلىكتىڭ اقپاراتتىق جۇمىسى مەدياسالانى دامىتۋ بويىنشا جاعداي جاساۋ, ەل حالقىن مەملەكەتتىك ساياساتتى ىسكە اسىرۋ تۋرالى حاباردار ەتۋ جانە اقپاراتتىق قاۋىپسىزدىكتى قامتاماسىز ەتۋ سياقتى ءۇش نەگىزگى قۇرامداس بولىكتەن تۇرادى. وسى جىلدىڭ ناۋرىز ايىندا مەملەكەت باسشىسىنىڭ جارلىعىمەن ءسوز بوستاندىعىن ودان ءارى قامتاماسىز ەتۋگە, وتاندىق مەدياسالانىڭ باسەكەگە قابىلەتتىلىگىن ارتتىرۋعا, اقپاراتتىق ەگەمەندىكتى نىعايتۋعا باعىتتالعان «اقپاراتتىق دوكترينا» بەكىتىلدى. ال تامىز ايىندا ۇكىمەتتىڭ قاۋلىسىمەن ونى ىسكە اسىرۋعا باعىتتالعان ءىس جوسپارى قابىلداندى. دوكترينادان تۋىندايتىن اسا ماڭىزدى زاڭ جوبالارىنىڭ ءبىرى – مينيسترلىكتىڭ باستاماسىمەن جۇزەگە اسقان «ماسس-مەديا تۋرالى» زاڭ جوباسى», دەدى ا.بالاەۆا.
بۇدان ءارى مينيستر «ونلاين پلاتفورما جانە ونلاين جارناما تۋرالى» زاڭعا, مەمەلەكەتتىك اقپاراتتىق ساياساتتى جۇزەگە اسىرۋ اياسىندا اتقارىلعان جۇمىستارعا توقتالدى.
مينيسترلىك جۇمىسىنىڭ كەلەسى ءبىر باعىتى – مادەنيەت سالاسىنا كەڭىنەن توقتالعان سالا باسشىسى ءوز سوزىندە الماتى وبلىسىنىڭ كوز تۇندىرار تاۋ-تاسى مەن وزەن-كولى كينويندۋسترياسىن دامىتۋعا تاپتىرماس قولايلى ءوڭىر ەكەنىن ەرەكشە اتاپ ءوتتى.
«پرەزيدەنت 1 قىركۇيەكتە ەلىمىزدىڭ الەۋمەتتىك-ەكونوميكالىق دامۋىنا, ناتيجەسىندە وتانداستارىمىزدىڭ ءومىر ءسۇرۋ دەڭگەيىن ارتتىرۋعا ارنالعان رەفورمالاردىڭ جاڭا پاكەتىن ۇسىندى. وڭ وزگەرىستەردىڭ ماڭىزدى شارتى – ازاماتتىق قوعامنىڭ بەلسەندى قاتىسۋى. الماتى وبلىسىنىڭ ازاماتتىق قوعام وكىلدەرى ۇنەمى بەلسەندىلىك تانىتىپ, قوعامدىق-ساياسي ۇدەرىستەرگە بەيجاي قارامايتىنى قۋانتادى», دەپ اتاپ ءوتتى ايدا بالاەۆا.
وڭىردە جۇمىس ىستەيتىن 600-دەن اسا ۇەۇ جانە 36 ءىرى ۆولونتەرلىك ۇيىم الەۋمەتتىك ماڭىزدى جۇمىستارمەن, سونىڭ ىشىندە اۋىلدىق دەڭگەيدە دە بەلسەندى اينالىسادى.
«كرەاتيۆتى يندۋستريا سالاسىن دامىتۋ, ەڭ الدىمەن, جاستار ءۇشىن جاڭا, تابىسى جوعارى, قولجەتىمدى جۇمىس ورىندارىن اشۋعا مۇمكىندىك بەرەدى. سونداي-اق مۇمكىندىگى شەكتەۋلى جاندار مەن شالعاي ەلدى مەكەندە تۇراتىن ازاماتتاردىڭ ءوزىن-ءوزى قامتاماسىز ەتۋ ءۇشىن ءتيىمدى سالاعا اينالادى. ولار وتاندىق مادەنيەتتەگى وڭ وزگەرىستەردىڭ نەگىزىن قالاپ, مادەنيەت قىزمەتكەرلەرىنىڭ بەدەلىن نىعايتۋدى قامتاماسىز ەتەدى», دەدى سالا باسشىسى.
مينيستر وبلىس تۇرعىندارىنىڭ سۇراقتارىنا جاۋاپ بەرىپ, ۇسىنىستارىن تىڭدادى. كەزدەسۋگە قاتىسۋشىلار مينيسترگە كەيىنگى جىلدارى وتاندىق كينويندۋستريادا شىعارىلىپ جاتقان كونتەنت ساپاسىنا نازار اۋدارۋدى سۇرادى. سونىمەن قاتار, بلوگەرلەردىڭ, الەۋمەتتىك جەلىدەگى پابليك اكىمشىلەرىنىڭ جاۋاپكەرشىلىگىن كۇشەيتۋ, شىندىققا سايكەس كەلمەيتىن جانە حالىقتى اداستىراتىن اقپاراتتى ورنالاستىرۋعا قاتىستى ماسەلە قوزعالىپ, ۇسىنىستار ايتىلدى. بۇدان بولەك, حالىقتىڭ ءدىني ساۋاتىن ارتتىرۋ, بالالار ادەبيەتىن باسىپ شىعارۋعا قولداۋ كورسەتۋ ماسەلەسى كوتەرىلدى.
ازاماتتاردى جەكە قابىلداۋ بارىسىندا سالا باسشىسى جاس مامانداردىڭ جالاقىسىن كوتەرۋگە قاتىستى سۇراقتارعا جاۋاپ بەردى. وڭىردەگى ازاماتتىق سەكتور وكىلدەرى تاريحي جانە مادەني مۇرا سالاسىنداعى جوبالاردى ىسكە اسىرۋعا قولداۋ كورسەتۋگە شاقىردى.
مينيستر وڭىرگە جۇمىس ساپارى بارىسىندا وڭىرلىك جانە رەسپۋبليكالىق باق وكىلدەرىمەن كەزدەسىپ, وتاندىق مەدياسالانى دامىتۋعا قاتىستى وزەكتى سۇراقتارعا جاۋاپ بەردى.
ء«بىز سىزدەرگە بارىنشا جاعداي جاساۋ ءۇشىن جۇمىس ىستەۋدەمىز, باسپا باسىلىمدارى نەمەسە ەلەكتروندىق باق بولسىن, مۇمكىندىگى شەكتەۋلى جانداردىڭ اقپاراتقا قولجەتىمدىلىگىن قامتاماسىز ەتۋ, ساپالى كونتەنت جاساۋ ءۇشىن تەحنيكالىق شارتتاردى پىسىقتاۋدامىز. 2021 جىلدان باستاپ 6 مىڭنان استام جۋرناليست ۇزدىك جوعارى وقۋ ورىندارى بازاسىندا مەموراندۋم شەڭبەرىندە مەديتسينالىق, ەكولوگيالىق, ءدىني, قارجى-ەكونوميكالىق, اگرارلىق جانە IT-سالالاردا وقىتۋ كۋرستارىنان ءوتتى. بۇل باعىتتاعى جۇمىس الداعى جىلى دا جالعاسادى», دەدى مينيستر.
الماتى وبلىسى
