ۇلتتىق كىتاپحانا قابىرعاسىنا زيالى قاۋىمدى جيناعان تاعىلىمدى ەڭبەكتىڭ تانىستىرىلىمىنا زۇلقيا مۇقانقىزىنىڭ ءوزى قاتىستى. قازاق تەلەۆيزياسىنىڭ باستاۋىندا تۇرعان ونىڭ شىعارماشىلىعى مەن ەڭبەك جولىنداعى ەرەكشە ساتتەرى قامتىلعان كىتاپ التى تاراۋدان تۇرادى.
«كوزىڭنەن ۇقتىم ءبىر سىردى» دەپ اتالعان العاشقى تاراۋدا زۇلقيا جۇماتوۆانىڭ ءار جىلدارى ءباسپاسوز بەتىندە جارىق كورگەن ءتۇرلى تاقىرىپتاعى ولەڭدەرى توپتاستىرىلعان. ال ء«ومىر جىرى» اتتى ەكىنشى تاراۋدا اۆتوردىڭ اڭگىمە, ماقالا, وچەركتەرى قامتىلسا, كەلەسى تاراۋدا ز.جۇماتوۆانىڭ جۇمىستاعى قىزىقتى ساتتەرى, حابار دايىنداۋ بارىسىنداعى ەرەكشەلىكتەرى, ورتاسىمەن قارىم-قاتىناسى تۋرالى تەلەۆيزيا سالاسىنىڭ ارداگەرلەرى ل.سەيىتوۆ, ق.يگىسىنوۆ, ن.احمەتوۆالاردىڭ ەستەلىكتەرى جيناقتالعان.
ءتورتىنشى تاراۋ «ەستەن كەتپەس سول ءبىر كەز» دەپ اتالىپتى. مۇندا ديكتوردىڭ جۇمىس بارىسىنان, ارىپتەستەرىمەن بىرگە وتكىزگەن شۋاقتى ساتتەرىنەن فوتوشەجىرە, ز.جۇماتوۆانىڭ باق بەتتەرىندە جاريالانعان سۇحباتتارى ەنگەن. كىتاپتىڭ ء«ومىر تولقىندارى» ءبولىمى تاعىلىمدى تۇلعانىڭ رۋحاني باستاۋى, وسكەن ورتاسى, اتا-انا, باۋىرلارى, ۇرپاعى تۋرالى سىر شەرتەدى.
«قارا شاڭىراققا قايتا ورالۋ» دەپ اتالعان قورىتىندى تاراۋدا ز.جۇماتوۆانىڭ قازاق تەلەۆيزياسىنىڭ 50, 55, 60, 65 جىلدىق مەرەيتويلىق ءىس-شارالارىنا قاتىسۋى, 100 جىلدىق مەرەيتويىنىڭ قارا شاڭىراقتا اتالىپ ءوتۋى, جىلى لەبىزدەرى, ەستەلىكتەرى, ارىپتەستەردىڭ ىستىق ىقىلاسى مەن قوشەمەتى, ەستەلىك سۋرەتتەر مەن كورەرمەندەرگە بەرگەن باتاسى توپتاستىرىلعان.
تەلەۆيزيا قارلىعاشىنىڭ ءومىر وتكەلدەرىنەن حابار بەرەتىن جيناقتى ۇلتتىق ارنا قابىرعاسىنداعى ءىزباسار شاكىرتتەرى جەكەلەگەن دەمەۋشىلەردىڭ قولداۋىمەن جارىققا شىعارعان. يگى ىسكە مۇرىندىق بولعان بەلگىلى تەلەجۋرناليست, اقپارات سالاسىنىڭ ۇزدىگى ساۋلە جيرەنشينا ز.جۇماتوۆانىڭ تەلەۆيزياداعى جارقىن جولى كەيىنگى بۋىنعا ۇلگى-ونەگە ەكەنىن ايتادى.
«زۇلقيا مۇقانقىزىنىڭ الەمىنە ەنگەن سايىن قازاق ايەلىنىڭ وتكەن عاسىردا ەركىن كوسىلىپ شىعارماشىلىقپەن اينالىسقانىن كوردىم, ولەڭ جازىپ, جۇرەگىن تەربەگەن سىرلارىن جاسىرماي جارىققا شىعارعانىن, اڭگىمەلەرىنەن سول قوعامنىڭ تىنىسىن ايشىقتاعان, ءوز پىكىرىن ەركىن جەتكىزە بىلگەن, جۇرەگىن مازالاعان ويلاردى بۇكپەگەن سىرشىل جاننىڭ بەينەسىن تاني تۇسەمىز. اشارشىلىق پەن سوعىستىڭ, جەتىمدىك پەن جەسىرلىكتىڭ زارى سۇيەكتەن باتپانداپ وتكەن XX عاسىرداعى قازاق ايەلىنىڭ اسىل ارمانى, مۇڭ-زارى زۇلقيا اپايمەن XXI عاسىرعا ىلەسىپ كەلگەندەي. وسىنشا جۇك نازىك ايەل جانىن قالاي ەزىپ جىبەرمەگەن؟ ول جۇرەگىندەگى ماڭگى وشپەس ماحابباتپەن, جاراتۋشىعا شۇكىرلىگىمەن, سالقار سابىرىمەن بۇگىنگى كۇنگە جەتىپ وتىر», دەيدى ساۋلە جيرەنشينا.
ايتۋلى ءىس-شارادا ل.سەيىتوۆ, ق.يگىسىنوۆ, ز.ەلعونديەۆا, ءا.كوپىش قاتارلى تەلەۆيزيا ارداگەرلەرى اۆتوردىڭ كاسىبي شەبەرلىگى, قيىندىققا تولى تاعدىر جولى تۋرالى اسەرلى اڭگىمە ايتسا, ق.سارسەنباي, م.احەتوۆ, ب.ءمۇرسالىم, ت.ب. ءىزباسارلارى ەسىمى تۇڭعىش ديكتور رەتىندە تاريحقا ەنگەن تۇلعاعا قۇرمەت كورسەتۋ كەيىنگى بۋىننىڭ بورىشى ەكەنىن جەتكىزدى.
عاسىر عۇمىر كەيۋانانىڭ قايراتىن السا دا, كوڭىل كوگىندەگى سەزىم ساۋلەسىنە سەلكەۋ تۇسىرە الماپتى. جان دۇنيەسى التىن ساندىقتاي ابىز كەۋدە كورگەنى مەن تۇيگەنىن شەجىرەدەي شەرتەدى. ەڭبەگىن ەلەپ, سىي-قۇرمەت كورسەتكەن ءىزباسارلارىنا العىسىن ايتقان زۇلقيا مۇقانقىزى كوپشىلىككە باتاسىن بەردى.
«ەڭ الدىمەن ادام بالاسىنىڭ جانى سۇلۋ بولۋى كەرەك. جاننىڭ سۇلۋلىعى دەگەن – ىشكى تازالىق, جاقسى مىنەز. جان بالاسىن جاتىرقاماي, جان دۇنيەسىنە ۇڭىلسەڭ, ءار ادامنىڭ جاقسى قاسيەتى بولادى. ويى تازا ادامنىڭ ءوزى تازا, ءوزى تازا كىسىنىڭ ءسوزى تازا. ادال ەڭبەك ەتىپ, كوپشىلىكتى قۇرمەتتەڭدەر. ادامدىقتان بيىك اتاق جوق. جاڭا قازاقستانىمىزدىڭ كوشىن العا سۇيرەگەن ازاماتتارعا اللا قۋات بەرسىن», دەيدى عاسىر عۇمىر يەسى.
الماتى
