فوتو: اشىق دەرەككوز
بيىل ۇيالى بايلانىس وپەراتورلارىنىڭ تاريفتىك جوسپارلارى بويىنشا باعانىڭ 7,7%-دان 57,3%-عا دەيىن ءوسۋى حالىقتىڭ نارازىلىعىن تۋدىردى. 2023 جىلدىڭ مامىر-شىلدە ايلارىندا عانا ۇيالى بايلانىس وپەراتورلارى وزدەرىنىڭ رەسمي سايتتارىندا اقپاراتتى جاريالاپ, اي سايىنعى ابونەنتتىك تولەممەن 30-دان استام تاريفتىك جوسپاردا كورسەتىلەتىن قىزمەتتەردىڭ قۇنىن بىرىنەن سوڭ ءبىرى كوتەرگەن.
«كاسىپكەرلىك كودەكستىڭ 199-بابىنىڭ 3-تارماعىن ەسكەرە وتىرىپ, ءبىر كۇنتىزبەلىك جىلدا باسەكەلەستىككە قارسى كەلىسىلگەن ءىس-ارەكەتتەردىڭ بەلگىلەرىن قايتا انىقتالۋىنا بايلانىستى اگەنتتىك كاسىپكەرلىك كودەكستىڭ 170-بابى بويىنشا قازىر «كسەلل» اق, «مت–س» جشس (Tele2/Altel) جانە «كار-تەل» جشس (Beeline) ۇيالى وپەراتورلارىنا قاتىستى تەرگەپ-تەكسەرۋدى باستادى», دەلىنگەن اگەنتتىك تاراتقان حابارلامادا.
بۇعان دەيىن اگەنتتىك ۇيالى بايلانىس وپەراتورلارىنىڭ ءبىر مينۋت سويلەسۋلەردەگى قوڭىراۋلاردىڭ قۇنىن جانە تاريفتىك جوسپارلارداعى ءبىر SMS-ءتى بەلگىلەۋ جونىندەگى ارەكەتتەرىندە باسەكەلەستىككە قارسى كەلىسىلگەن ءىس-قيمىلداردىڭ بەلگىلەرىن (كاسىپكەرلىك كودەكستىڭ 170-بابى) انىقتاعان.
