– ءبىزدىڭ مينيسترلىك پەن «وتباسى بانك» بىرلەسىپ العاش رەت عالىمدارعا جەڭىلدەتىلگەن كرەديت بەرەتىن تۇرعىن ءۇي باعدارلاماسىن ازىرلەپ, ىسكە قوستى. اتالعان جوبا ءبىراز پىسىقتالىپ, شارتتارى مەن تالاپتارى الدىن الا تالقىلانىپ, قازىر نارىققا ۇسىنىلدى. قاناتقاقتى جوبا بانكتىڭ قارجىسىنا ىسكە اسىرىلىپ وتىر. نەگىزى ەلىمىزدە جاستاردى تۇرعىن ۇيمەن قامتۋعا باعىتتالعان بىرقاتار جوبا بارى بەلگىلى. جەرگىلىكتى اتقارۋشى ورگاندار تاراپىنان ۇيىمداستىرىلعان باعدارلامالار اياسىندا دا ءبىزدىڭ ماماندار ءۇيلى بولىپ جاتىر. ال بۇل جولعى جوبانى بانكتىڭ عالىمدارعا قولداۋى رەتىندە قابىلداۋ كەرەك. مينيسترلىكتەن اتالعان باعدارلاماعا قاتىسۋشى عالىمدار اراسىندا سالاارالىق باسىمدىقتار بەرىلەتىنىن يا بەرىلمەيتىنىن سۇراپ جاتقاندار كوپ. مۇنداي باسىمدىق جوق. مينيسترلىككە قاراستى عىلىمي ۇيىمداردىڭ زەرتتەۋ سالالارى ءارتۇرلى بولعانىمەن, قىزمەتكەرلەردىڭ بارىنە تۇرعىن ءۇي باعدارلاماسىنا قاتىسۋعا بىردەي مۇمكىندىك بەرىلگەن, – دەدى عىلىم جانە جوعارى ءبىلىم ۆيتسە-ءمينيسترى دارحان احمەت-زاكي.
«وتباسى بانك» باسشىسى ءلاززات يبراگيموۆا جەلتوقسان ايىنىڭ باسىنان «قازاقستاننىڭ جاس عالىمدارى» باعدارلاماسى بويىنشا ءوتىنىم قابىلداۋ باستالعانىن ايتتى. باعدارلاما اكادەميالىق عىلىممەن اينالىساتىن جاس عالىمدارعا ارنالعان. ءبىر سوزبەن ايتقاندا, ىرگەلى عىلىممەن اينالىسىپ جۇرگەن زەرتتەۋشىلەرگە باعىتتالعان.
– زەرتتەۋلەر كورسەتكەندەي, اكادەميالىق عىلىمدا قاشان دا جاس كادرلار تاپشىلىعى بايقالادى. قازىر بۇل باعىتتا جۇمىس ىستەيتىن جاس عالىمداردىڭ وتىنىشتەرىن قابىلداپ جاتىرمىز. عىلىم جانە جوعارى ءبىلىم مينيسترلىگىنە قارايتىن عىلىمي نەمەسە عىلىمي-تەحنيكالىق قىزمەت سۋبەكتىسىن اككرەديتتەۋ تۋرالى كۋالىگى بار 29 جوعارى وقۋ ورنىنىڭ جانە 24 ۆەدومستۆولىق باعىنىستى عىلىمي ۇيىمنىڭ قىزمەتكەرلەرى قاتىسا الادى. باعدارلاما «وتباسى بانكىندە» جىلدىق 5 پايىزدىق مولشەرلەمەمەن, 10 پايىزدىق باستاپقى جارنامەن كرەديت الۋعا مۇمكىندىك بەرەدى. قاتىسۋشىلار 20 ميلليون تەڭگەگە 19 جىلعا دەيىنگى مەرزىمگە باسپانا الا الادى, – دەپ ناقتىلادى ل.يبراگيموۆا.
وسىلايشا, جاس عالىمدار باسپاناعا قول جەتكىزىپ قانا قويماي, ەلىمىزدە اكادەميالىق جۇمىستارىن ەش الاڭسىز جالعاستىرا الادى. مىسالى, جاس عالىم 20 ملن تەڭگەگە پاتەر ساتىپ السا, العاشقى 8 جىلداعى اي سايىنعى تولەمى 155 مىڭ تەڭگەگە تەڭ بولماق. وسى كەزەڭنەن كەيىن تۇرعىن ءۇي كرەديتىنە كوشەدى جانە كەيىنگى 11 جىلداعى اي سايىنعى تولەم 84 مىڭ تەڭگەدەن بولادى.
– باعدارلاماعا عىلىم جانە جوعارى ءبىلىم مينيسترلىگىنە ۆەدومستۆولىق باعىنىستى جانە عىلىمي نەمەسە عىلىمي-تەحنيكالىق قىزمەتتى جۇزەگە اسىراتىن عىلىمي ۇيىمدار مەن جوعارى وقۋ ورىندارىنىڭ 40 جاسقا دەيىنگى جاس عالىمدارى (40 جاستى قوسا العاندا) قاتىسا الادى. باسپاناعا مۇقتاج جاس عالىمداردىڭ گرانتتىق نەمەسە باعدارلامالىق-نىسانالى قارجىلاندىرۋ شەڭبەرىندە عىلىمي جوبالار مەن باعدارلامالارعا, عىلىمي-تەحنيكالىق قىزمەت ناتيجەلەرىن كوممەرتسيالاندىرۋ جوبالارىنا قاتىسقان, ماگيستر دارەجەسىنەن تومەن ەمەس جانە عىلىمي-زەرتتەۋ جۇمىس ءوتىلى كەمىندە 3 جىل بولۋعا ءتيىس. بۇل جەردە ءوتىنىم بەرۋشىلەر اراسىندا ەشقانداي كەزەك بولمايدى. ولار عىلىمي ۇيىمنىڭ باسشىلىعىنان تۇرعىن ۇيگە مۇقتاج رەتىندە جولداما الىپ, ءبىزدىڭ بانككە جۇگىنەدى, – دەيدى «وتباسى بانك» اق ورتالىق فيليالىنىڭ ديرەكتورى جانسۇلتان ماتاي.
بەلگىلى بولعانداي, قاتىسۋشى تولەم قابىلەتىن راستاعاننان كەيىن 3 ايدىڭ ىشىندە العاشقى نەمەسە قايتالاما نارىقتان ءوزى ىزدەپ تاپقان ءۇيدى الادى. باستىسى, ءۇي الۋعا ءوتىنىم بەرگەن جاس عالىمنىڭ, سونداي-اق وتباسى مۇشەلەرىنىڭ اتىندا كەيىنگى 5 جىل ىشىندە ءۇي بولماۋعا ءتيىس. ءۇي الۋشىنىڭ تۇرعىلىقتى جەرىنە جانە ءۇيدى قايدان الاتىنىنا شەكتەۋ جوق. ايتالىق, الماتى قالاسىندا جۇمىس ىستەپ جۇرگەن عالىم ءۇيدى استانادان دا الا الادى. كەلىسىمگە سايكەس, «وتباسى بانك» جاس عالىمداردى كرەديتتەۋ ءۇشىن 5 جىل ىشىندە شامامەن 16,6 ملرد تەڭگە بولەدى.
