فوتو: ءماجىلىس
«جامبىل وبلىسى اعىن سۋدى ترانسشەكارالىق وزەندەردەن الادى. ونىڭ 82% قىرعىز رەسپۋبليكاسىنان كەلەدى. وسى جىلدىڭ شىلدە-تامىز ايلارىندا قىرعىزستاننان بەرىلەتىن 3,5 ملن تەكشە مەتر سۋدىڭ تاۋسىلۋىنا بايلانىستى سۋ بەرۋ توقتاتىلدى. وسىعان بايلانىستى شىلدە-تامىز ايلارىندا جامبىل وبلىسىنىڭ التى اۋدانىندا اعىن سۋ تاپشىلىعى ورىن الىپ, 9 مىڭ گەكتار القاپتاعى ەگىس زارداپ شەككەن. شىعىن كولەمى 3,6 ملرد تەڭگە. بۇگىنگى كۇنى جامبىل مەن تۇركىستان وبلىسىندا سۋارمالى جەرلەر 300-500 مىڭ گەكتار جەرگە دەيىن جەتەدى», دەدى قايرات بالابيەۆ.
دەپۋتاتتىڭ ايتۋىنشا, بۇل وبلىستىڭ ءبارى ترانسشەكارالىق اۋىل شارۋاشىلىعى ءوڭىرى بولعاندىقتان سۋ ءار ۋاقىتتا قاجەت.
ء«وزىڭىز جامبىل وبلىسىن باسقارعان تۇستا شارۋالاردى سۋدان تارىقتىرىپ الدىڭىز. سۋ سالاسىنىڭ ءمينيسترى بولىپ جۇرگەن كەزدە ماقتاشىلارعا سۋ جەتكىزە المادىڭىز. كۇنگەيدەگى شارۋالاردىڭ شىرىلداپ جۇرگەندە كۇز دە ءوتىپ كەتتى. ءبىزدىڭ ەلىمىزدە بەرىلەتىن ترانسشەكارالىق وزەن سۋلارىن ارتتىرۋ ماسەلەسى قاراستىرىلا ما؟ ماسەلەنى قانداي جولدارمەن شەشپەكسىزدەر؟ قاشانعى كىسىدەگىنىڭ كىلتى اسپاندا دەمەكشى كورشىلەردىڭ كوڭىلىنە قارايمىز؟ كىرىپتارلىقتان ايىرىلاتىن جول بار ما؟ بيىلعى قۇرعاقشىلىقتىڭ كەلەشەكتە قايتالانباۋىنا قانداي كەپىلدىكتەر بار؟», دەدى دەپۋتات مينيسترگە.
ءوز كەزەگىندە مينيستر نۇرجىگىتوۆ بيىل جامبىل وبلىسىندا سۋ تاپشىلىعىنا بايلانىستى شارۋا قوجالىقتار زارداپ شەككەنىن ايتتى.
«جامبىل وبلىسىنداعى تالاس پەن شۋ وزەنى بويىنشا جاعداي سۋلىلىعىنا بايلانىستى بولدى. سەبەبى قىرعىزستاندا سۋ مولشەرى سونداي دەڭگەيدە بولدى. ال ەندى ترانسشەكارالىق وزەندەر بويىنشا كەلىسىمدى قالاي جۇرگىزەمىز؟ قىرعىزستانمەن مىسالى 2000 جىلى ەكىجاقتى ترانسشەكارالىق وزەندەردى پايدالانۋ جاعىنان كەلىسىمشارتىمىز بار. سول كەلىسىمشارتقا بايلانىستى تالاس وزەنى 50-دە 50 مولشەرىندە, ال شۋ وزەنى 42-دە 58 پايىز بولىنگەن. سوندىقتان ءار جىلدىڭ ءوزىنىڭ سۋلىلىعىنا بايلانىستى سۋ كولەمى بولىنەدى. ءبىزدىڭ تاراپتان ونى كوتەرۋ ماسەلەسىن ءبىز قاراستىرىپ جاتقان جوقپىز. سەبەبى ناقتى ءوزىنىڭ پايىزدىق مولشەرى بار», دەدى مينيستر.
ءمينيستردىڭ پىكىرىنشە, ورتالىق ازياداعى بەس مەملەكەت 1992 جىلى تۋرا سونداي كەلىسىم جاساعان. سول كەلىسىمدە بۇرىنعى كەڭەس وداعىنداعى سۋ قالاي بولىنەدى – تۋرا سونداي كولەم راستالعان. اتاپ ايتقاندا, سىرداريا وزەنىندە سۋ كوپ بولسا بىزگە قازاقستانعا 12 تەكشە شاقىرىم سۋ بەرىلەدى. سوندىقتان بۇل جۇمىستار تەك كەلىسسوزدەر ارقاسىندا اتقارىلىپ جاتىر.
