فوتو: سۇلتان سەيىتوۆ
استاناداعى ۇلتتىق اكادەميالىق كىتاپحانادا وتكەن رۋحاني ءىس-شاراعا اقىن-جازۋشىلار, زيالى قاۋىم, باق وكىلدەرى, جوعارى وقۋ ورىندارىنىڭ ستۋدەنتتەرى قاتىستى.
اقىننىڭ ولەڭدەرى, باردتىق, شانسوندىق باعىتتا جازعان اندەرى, وي-تولعامدارى, كوسەمسوز جازبالارى توپتاستىرىلعان كىتاپتىڭ تۇساۋكەسەر راسىمىنەن كەيىن مەملەكەتتىك سىيلىقتىڭ لاۋرەاتتارى جازۋشى الىبەك اسقاروۆ, اقىن عالىم جايلىباي, جازۋشى, قازاقستاننىڭ ەڭبەك سىڭىرگەن قايراتكەرى نەسىپ ءجۇنىسباي ۇلى, فيلولوگيا عىلىمدارىنىڭ دوكتورى ايگۇل ىسماقوۆا باستاعان زيالى قاۋىم وكىلدەرى ءسوز الىپ, اقىنعا تىلەۋلەستىك ءبىلدىردى.
«بيىل 60 جاسقا تولدىم. وسى مەرەيتويىمدا حالقىما پەرزەنتتىك پارىزىم رەتىندە ەسەپ بەرگىم كەلدى. جازبا پوەزيامداعى ولەڭدەرىمدى سۇرىپتاپ, باردتىق, شانسوندىق باعىتتا جازعان اندەرىمدى جيناقتاپ, مەملەكەتتىك, ۇلتتىق قۇندىلىق, ەلدىك مۇرات-مۇددە تۋراسىنداعى پايىم-پىكىر, وي-تولعام, كوسەمسوزدەرىمدى تياناقتاپ كىتاپقا توپتاستىردىم. ەكىنشىدەن ەلىمىزدىڭ كىتاپ يندۋسترياسىنا جاڭاشا لەپ اكەلگىم كەلدى. بيىل ءىزىمىزدى باسىپ كەلە جاتقان تالانتتى جاستار اقش-تىڭ, ەۋروپانىڭ اۋقىمدى مۋزىكالىق پلاتفورمالارىنا مەنىڭ باردتىق, شانسوندىق باعىتتاعى تۋىندىلارىمدى ەنگىزدى. ءبىز سول شىعارمانىڭ QR-كودىن وسى كىتاپقا دا جاريالادىق. كەز كەلگەن ادام قولىنداعى سمارتفونىنا وسى كودتى بەلگىلەۋ ارقىلى مەنىڭ YouTube ارناما ءوتىپ, ۇلتتىق ادامزاتتىق قۇندىلىقتارمەن تانىسا الادى. كىتاپتىڭ ساپالىق سىنىنا دا باسا نازار اۋدارىپ, مۇقاباسى قاپتالعان بىلعارىنى شەتەلدەن الدىردىق. ءتۇرلى-ءتۇستى ەتىپ, ءاربىر تۋىندىعا سۋرەت قابىستىرا وتىرىپ قىمبات قاعازبەن باسۋداعى مۇراتىمىز – كىتاپتىڭ مازمۇندىق سالماعىن عانا ەمەس ەستەتيكالىق, كوركەمدىك قۇندىلىعىن دا ارتتىرۋ. توپتاستىرىلعان تۋىندىلاردىڭ نەگىزگى بولىگى پوەزيا بولعاندىقتان دا ەستەتيكالىق تالعامىنا ەرەكشە بايىپپەن قارادىق. كىتاپتىڭ جارىققا شىعۋىنا قولداۋ كورسەتكەن مادەنيەت جانە اقپارات مينيسترلىگىنە, قاراعاندى وبلىسىنىڭ اكىمدىگىنە, «Amanat», «اق جول» پارتيالارىنا العىسىمدى ايتامىن. بۇل كىتاپ – مەنىڭ 10 جىلدىق ەڭبەگىمنىڭ وتەۋى. ەرتەرەكتە ماسكەۋگە ارنايى بارىپ قازاقتىڭ باردتىق, شانسوندىق جانرىنداعى تۋىندىلارىن تاسپاعا باسىپ اكەلگەننەن بەرگى ۋاقىتتا تابانىمدى تاس تىلە ءجۇرىپ اتقارعان جۇمىسىم وسى «قۇت» كىتابىنداعى شىعارمالارىم.
كىتاپتى «قۇت» دەپ اتاۋىمنىڭ سەبەبى قازاق رۋحانياتىنا جاڭا لەپ بوپ ەنىپ, قۇت بوپ دارىسا دەگەن ۇستانىم. ەلدىڭ قۇتى قاشپاۋى ءۇشىن بىزگە ەڭ ءبىرىنشى ۇلتتى ۇيىتا, ۇيىستىرا ءبىلۋ كەرەك. ال ۇلتتى ۇيىتۋ جولىندا قازاقتىڭ قالامگەرلەرى اماناتتى ارقالاۋى ءتيىس. بۇل – مىندەت, ال قازاقتىڭ زيالى قوعامى ءالى كۇنگە بۇل اماناتتى پارىز دەڭگەيىندە عانا ءتۇسىنىپ ءجۇر. قازىر ءبىز مەملەكەتتى نىعايتاتىن دۇنيەگە باسىم كوزقاراسپەن قاراۋىمىز كەرەك», دەدى قۋانىش ماقسۇتوۆ.
اقىننىڭ بۇعان دەيىن 2013 جىلى «ماڭگىلىك مۇڭنىڭ اۋەنى» اتتى باردتىق اندەر جيناعى مەن «تاكاپپار مۇڭنىڭ كەربەز تامشىلارى» اتتى جىر كىتابى جارىق كوردى.
