فوتو: gov.kz
مەملەكەت باسشىسى 2021 جىلى «تاۋەلسىزدىك ۇرپاقتارى» گرانتىن جاس وتانداستاردىڭ جاڭا جانە قولدانىستاعى باستامالارىن قولداۋ ماقساتىندا تاعايىنداعان بولاتىن. گرانت اياسىندا 63 ادام ءوز جوباسىن قازاقستاندا عانا ەمەس شەتەلدە دە ءتۇرلى سالالاردا تابىستى جۇزەگە اسىرىپ وتىر.
مينيستر ايدا بالاەۆا سالتاناتتى راسىمگە قاتىسۋشىلاردى قۇتتىقتادى.
ء«بىز ۇلكەن وزگەرىستەر داۋىرىندە ءومىر سۇرۋدەمىز. جاستارعا دۇرىس تاڭداۋ جاساۋ, سەنىمگە لايىق ازامات بولۋ, ءوزىن-ءوزى دامىتۋ, وقۋ جانە ەڭبەك ارقىلى تابىسقا ۇمتىلۋ سياقتى ەڭ ماڭىزدى جاۋاپكەرشىلىك جۇكتەلگەن. مەملەكەت باسشىسى قاسىم-جومارت توقاەۆ جاستاردىڭ دامۋىنا, ولارعا جاڭا جانە اۋقىمدى مۇمكىندىكتەر اشۋعا ەرەكشە كوڭىل بولەدى. بار ءۇمىتىمىز - ەڭبەك پەن ءبىلىمنىڭ جولىمەن جۇرەتىن, ادامدىق قادىر-قاسيەتتىڭ ءمانىن تەرەڭ تۇسىنەتىن, اتا-بابا ءداستۇرىن قاستەرلەيتىن جاستاردا. بۇگىنگى بەرىلگەن گرانت - سىزدەردىڭ تاباندىلىقتارىڭىز بەن تالانتتارىڭىزدىڭ, قاجىرلى ەڭبەكتەرىڭىز بەن ادالدىقتارىڭىزدىڭ, قوعام ءۇشىن ماڭىزدىلىعىڭىز بەن ءوز الەۋەتىڭىزدى مويىنداۋىڭىزدىڭ سىيى. بۇل قۇرمەت ودان ءارى دامۋ مەن ىنتالانۋعا جەتەلەسىن. ءاربىر قادامدارىڭىز جاڭا جەتىستىكتەر مەن جاڭالىقتارعا جول اشىپ, شىعارماشىلىق, عىلىمي, ىسكەرلىك يدەيالارىڭىز ەلىمىزدىڭ دامۋىنا ەلەۋلى ۇلەس قوسۋعا مۇمكىندىك بەرسىن. سىزدەر قازاقستاندى بۇدان دا ءارى كوركەيتەتىندەرىڭىزگە سەنەمىن!», دەپ قۇتتىقتاعان ۆەدومستۆو باسشىسى ۇزدىك جوبالاردىڭ 30 اۆتورىنا 3 ميلليون تەڭگەدەن گرانت سىيلىعىن تاپسىردى.
بيىل كونكۋرسقا قاتىسۋ ءۇشىن 5 باعىت بويىنشا 3000-نان استام تۇسكەن وتىنىمدەردىڭ قاتارىندا قازاقستاننىڭ مادەني مۇراسىن ناسيحاتتاۋعا, حالىقتىق مادەني داستۇرلەر مەن ونەردى ىلگەرىلەتۋگە, IT سالاسىنداعى عىلىمي زەرتتەۋلەردى, ستارتاپتار مەن جوبالاردى, ەكونوميكانىڭ نەگىزگى سەكتورلارىنداعى كرەاتيۆتى بيزنەس يدەيالاردى ىسكە اسىرۋعا باعىتتالعان جوبالار بار.
ەلىمىزدە 1992 جىلدان باستاپ ءداستۇرلى تۇردە عىلىمي, شىعارماشىلىق, كرەاتيۆتى قىزمەتپەن اينالىساتىن, سونداي-اق سپورت سالاسىندا جەتىستىكتەرى بار جاستارعا «دارىن» مەملەكەتتىك جاستار سىيلىعى بەرىلەدى. سونىمەن قاتار ەلىمىزدىڭ جاس جازۋشىلارى مەن اقىندارى پرەزيدەنتتىك ارناۋلى ادەبي سىيلىقتىڭ يەگەرى اتانسا, دارىندى عالىمدار د.قوناەۆ اتىنداعى سىيلىقتار مەن عىلىمي ستيپەنديالار الادى.
