كورمەگە قويىلعان قۇندى ەكسپوناتتار قاتارىندا 1986 جىلعى برەجنەۆ الاڭىندا وتكەن جەلتوقسان كوتەرىلىسىنە قاتىسۋشى, كسرو حالىق ءارتىسى ءا.مامبەتوۆتىڭ قانعا بويالعان كيىمدەرى (پيدجاك, جەيدە جانە گالستۋك) بىردەن كوزگە تۇسەدى. تانىمال رەجيسسەر ءوز ەستەلىگىندە: «1986 جىلدىڭ 17 جەلتوقسانىندا كەڭەس ارمياسى سولداتتارى ءبىزدى سوققىعا جىعىپ, جۇك كولىگىنە بىرنەشە ادامدى مىڭگەستىرىپ جاتقاندا, تۇبىندە اقيقات انىقتالارىنا سەنگەنمىن. سول كۇن تۋدى», دەپ جازادى.
سونداي-اق كورمەگە حالىق جازۋشىسى مۇحتار ماعاۋيننىڭ جەكە كوللەكتسياسىنان الىنعان تەمىر ارماتۋرا سويىلدار قويىلعان. بۇل تۋرالى قالامگەر بىلايشا باياندايدى: «1986 جىلى جەلتوقسان وقيعاسىنان 10 شاقتى كۇن وتكەننەن كەيىن الاڭعا ارنايى بەت الدىم. قالىڭ قار كۇرەلىپ, الاڭنىڭ شەتىنە ۇيىلگەن ەكەن. الدەبىر تۇستان تاياقتىڭ ۇشى كورىندى. ساقشىلاردىڭ كوزىن الا بەرە تاياقتى سۋىرىپ الدىم. كەرى قايتىپ كەلدىم دە, تاعى ءبىر تاياقتى ارشىپ الدىم. ەكەۋىن دە ۇيگە اكەلىپ, ساقتاپ قويىپ ەدىم». جازۋشى سويىلداردى 2014 جىلى مۋزەي قورىنا وتكىزگەن.
كورمەگە كەلۋشىلەر نازارىنا 17-18 جەلتوقسان كۇندەرى دىبىستى كۇشەيتۋ ءۇشىن پايدالانىلعان ەلەكترومەگافون, جەلتوقسان كوتەرىلىسى نەگىزىندە «اللاجار» ءفيلمىن تۇسىرگەن رەجيسسەر قالدىباي ابەنوۆتىڭ كەشەنىنەن الىنعان ماتەريالدار, قايرات رىسقۇلبەكوۆتىڭ فوتوسۋرەتتەرى مەن جەكە قۇجاتتارىنىڭ تۇپنۇسقاسى, وزگە دە جەلتوقسان كوتەرىلىسىنە قاتىسۋشىلاردىڭ زاتتىق ەكسپوناتتارى مەن قۇجاتتارى, فوتوسۋرەتتەرى جانە وسى تاريحي وقيعا تۋرالى جازىلعان كىتاپتار ۇسىنىلدى.
كورمەنىڭ اشىلۋىنا جەلتوقسان ارداگەرلەرى قاتىسىپ, ەستەلىكتەرىمەن ءبولىستى. مادەني-تانىمدىق ءىس-شارادا ب.مومىش ۇلى اتىنداعى رەسپۋبليكالىق «جاس ۇلان» مەكتەبىنىڭ, ۇلتتىق قاۋىپسىزدىك كوميتەتى شەكارا اكادەمياسىنىڭ كۋرسانتتارى, الماتى قالاسى پوليتسيا دەپارتامەنتىنىڭ قىزمەتكەرلەرى ونەر كورسەتتى.
الماتى
