1093 حالقى بار اۋىل بۇعان دەيىن سالىنعانىنا ەلۋ جىلدان اسقان ەسكى دە تار عيماراتتا ەم-دوم الىپ جۇرەتىن. «اۋىل – ەل بەسىگى» جوباسى اياسىندا بوي كوتەرگەن جاڭا عيماراتتىڭ ءىشى كەڭ ءارى جارىق. مەديتسيناعا قاجەتتى قۇرال-جابدىقتارمەن تولىق جاراقتاندىرىلعان. اتاپ ايتقاندا, حيميزاتور مەن فەلدشەردىڭ ەگۋ, قاراۋ كابينەتتەرى, كيىم اۋىستىراتىن, جۋىناتىن بولمەلەرى بار. بۇل كابينەتتەر العاشقى مەديتسينالىق كومەك كورسەتۋ, تۇرعىنداردى يممۋنداۋ, تالداۋ سىنامالارىن الۋ ءۇشىن كەرەك-جاراقپەن قامتاماسىز ەتىلگەن.
– فاپ ءبىر اۋىسىمدا 10 ەمدەلۋشىنى قابىلداۋعا ەسەپتەلىنگەن. ولار بۇل جەردە دارىگەرگە دەيىنگى جانە العاشقى مەديتسينالىق-سانيتارلىق كومەك الادى. حالىققا فەلدشەر, اكۋشەر, مەدبيكە, سونداي-اق جالپى پراكتيكا دارىگەرى قىزمەت كورسەتەدى, – دەيدى اباي اۋداندىق اۋرۋحاناسىنىڭ ديرەكتورى ايگۇل باشەكوۆا.
عيماراتتىڭ جيھازدارى جاڭارتىلىپ, مۇمكىندىگى شەكتەۋلى جاندارعا ىڭعايلى بولۋ ءۇشىن پاندۋس, شاقىرۋ تۇيمەسى مەن قوزعالىس ينديكاتورى ورناتىلىپتى.
مۇنداي يگى ءىس مۇنىمەن توقتاپ قالمايدى. الداعى جىلدارى اباي اۋدانىنىڭ ەلدى مەكەندەرىندە «اۋىلدىق دەنساۋلىقتى جاڭعىرتۋ» ۇلتتىق جوباسى بويىنشا تاعى سەگىز مەديتسينالىق مەكەمە سالۋ جوسپارلانىپ وتىر. يۋبيلەينوە اۋىلىندا فاپ اشىلۋىنا جينالعان جۇرتتى اباي اۋدانىنىڭ اكىمى ءسابيت وسپانوۆ پەن وبلىستىڭ دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆا قۇتتىقتاپ, جاڭا مەديتسينالىق مەكەمەنى ارالاپ كوردى.
قاراعاندى وبلىسى,
اباي اۋدانى
